Asturies, paraísu natural...del golf

 

Demientres los años que viví n’Estrasburgu, capital de l’Alsacia, sosprendíame siempres l’aportar de la primavera pol españíu de colores que se producía en munches de les sos villes, dalgunes yá de por si perguapes. Un arreventón floral en forma de maceteros, tiestos, xardineres, y tou tipu d’encontu que pudiera albergar a los primaverales elementos.

Yera esa manifestación productu de lo que se conoz como Villes floríes de Francia, una iniciativa conxunta del gobiernu francés, los ayuntamientos y los productores de flores del país, y que, col esfuerciu tripartitu llogren agupiar sobremanera esos pueblos y ciudaes, faciéndolos más  atractivos pal turismu de lo que yá son, y, al mesmu tiempu, calteniendo o inclusive incrementando los puestos de trabayu nel gremiu floral.

Vien esto a cuentu de la noticia, nun tengo nidio que positiva, de que nEspaña esisten anguaño 340.000 pisos turísticos, cifra que nun engloba a los munchos miles que funcionen ensin declarar oficialmente la so actividad y, poro, ensin devengar fiscalmente. N’Asturies la cantidá ye mui inferior, fálase de 6000, anque amontando esponencialmente según tolos indicios, y a esta deducción mos lleva la burbuya inmobiliaria que sufre nesti momentu Xixón, que, según les axencies, sofítase na compra pa segunda vivienda y alquiler.

Ye un fenómenu que, mui probablemente, va alegrar a los chigreros en xeneral, pero que, aparte de la xentrificación sesgada que lleva a los barrios antiguos, de lo que Cimavilla ye un exemplu, xenera mui pocos puestos de trabayu, y esos non especialmente cualificaos y poro de pocu ingresu. Pa facéselo mirar.

Llegamos agora al asuntu del golf, nuna ciudá, Xixón, qu’en tiempos del alcalde Areces, y en plena desindustrialización de la comarca y rexón, apostó pola creación d’un campu municipal, que fo’l primer en toa España, y qu’anguaño cuenta con cuatro instalaciones en total, dalguna, como’l Real club de Castiello, de les más vieyes de la nación.

Una rexón, el Paraísu natural, na que coesisten unes catorce instalaciones golfístiques, contando col güei pastu de monte y xabaril de los Balagares,  casi toes na estaya costera, que suponen un añadío a los atractivos d’Asturies y que, ensin dulda, cola promoción afayadiza por parte de los implicaos, Principáu, ayuntamientos y entidaes, como en Francia, daríen un saltu de calidá, más allá del cachopu y la sidra, empobinándonos haza unos oxetivos turísticos alloñaos del turismu de mases haza’l que paez que dalgunos mos quieren dirixir.

Golf, que tenemos muncho, y cultura, que tamién la hai a esgaya, cola gastronomía, faen un amiestu esplosivu, y muy rentable. Ye lo qu’hai.

Raúl Suevos

A 17 díes vencíos de mayu de 2024

Torna en castellán en repdiv.blogspot.com