Esta mañana mientes lleía dellos periódicos dixitales, nún d’ellos, de los más importantes, atopéme con una información que daba cuenta de les seis noticies más lleíes nesi mediu. Dos d’elles informaben del alcuentru d’un toreru d’aneya fonduxe con una supuesta amiga nuna cafetería londinense, otros dos apurríen la filiación completa de la susodicha, y a lo cabero, quedaben dos más dedicaes a dar cuenta de la trayectoria personal y detalles de la fechoría d’un asesín descuartizador, resalvo lo de presuntu porque nun siendo profesional tampocu me siento obligáu.
Estes son, con la que ta cayendo sobro’l país, les coses que, al paecer, interesen a los españoles. Nin la formación de gobiernu, nin l’embaranzu d’Inés Arrimadas, nin los ten que tienes de la Cume de la OTAN tenida en Londres, tampocu l’alcuentru retrasáu ente’l Madrid y el Barcelona paez llamar l’atención de los llectores d’esi diariu; y teniendo en cuenta qu’eses rellaciones de noticies formense de manera automática cada vegada que damos un clic na que mos interesa nun queda otra que pensar que son rigorosamente ciertes. Al español mediu, tipu, del montón o como ustedes quieran llamalu, los asuntos oficial, política o académicamente importantes importen-y una higa, eso ye lo qu’hai.
Escribía va yá tiempu Salvador de Madariaga que sacar del analfabetismu a la xente pa que leyere páxines que nunca debieren habese escrito yera esfuerciu inutil y polo que se ve ye posible que nun anduviere descamináu. Les sos idees cuasi enllacen direutamente, lo cualo nun ye estrañu pues yeren coetáneos, con Ortega y Gasset cuando sollertaba escontra les mases que, creyéndose santificaes pola fuercia que dan los sistemas democráticos modernos, refugaben ser conducies poles élites rebelándose escontra elles. Viendo lo visto nun paez que’l tiempu quitare razón a dalu d’ellos.
Cabe nel casu d’Ortega, sicasí, facer dalguna salvedá, pues les sos élites lo yeren. El perteneció a esa España frutu de la Institución llibre d'enseñanza y a la Xunta d'ampliadura d'estudios que daría llugar a una xeneración académica d'altísimu nivel y que la Guerra incivil malograría. Tampocu-y diba a la zaga l'estamentu políticu que, anque incapaz d'evitala, tenía, en xeneral, una mayor talla intelectual y moral que la qu'agora mos representa. Talla por demás fácil de superar.
Formamos los ciudadanos d’esti país un fatáu pastueñu, fácil de dirixir, que va al engañu con dondura, por mui malu que seya’l lidiador, que lo ye. Un fatáu qu’actúa como si supiere que nada cabe facer col reglamentu de lidia que mos toca sufrir y que, cuando se-y faz dalgún retoque estéticu, namái tien como oxetivu meyorar la posición del lidiador.
Lo cierto ye que yá nun hai toreros como los d’enantes. Los d’anguaño abusen del toru y del respetable y cuando se retiren hasta se regodeen cola mofla como’l qu’estos díes mos presenta les sos memories ensin tener dao un bon pase en toa la so carriera y esperando que, disfrazando los munchos pinchazos y descabellos lu aplaudan como cortador de rabos.
En fin, que viendo lo que los españoles lleen nun ye d’esperar que les mases se rebelen y, per otru llau, col reglamentu taurinu a valir, ye mui difícil, por nun dicir imposible, qu’apaeza un bon toreru n’España. Tenemoslo mal.
Raúl Suevos
A 5 d’avientu de 2019
Torna en castellán en repdiv.blogspot.com
No comments:
Post a Comment