La situación atípica na que mos atopábemos aportó al aniciu del so final cola declaración del doctor Sánchez esti vienres caberu. En principiu paez lo meyor que podía pasar puestu que la nación pasa polos momentos más movíos dende’l 75, incluyendo los años de chombu d’ETA que, si bien sanguinos, nun suponíen tantopeligru pal nuesu sistema de convivencia como la situación anguaño provocada polosindependentistes. Si viviere’l mio suegru, que tenía’l so puntu dramáticu, diríaqu’España ta peor que nel 36.
El casu ye que, conociendo’l percal, tarrezo qu’unos ya otros van intentar que los sufríos votantes mos fixemos nun par de faroles tres los que vamos tener que correr, yavotar, ensin pensar nin güeyar nada más. Tolo demás va ser escuridá, ruiu ya fumu, y ye lo qu’a ellos-yos interesa. A mín non.
Por edá viví tola tapa constitucional d’España ya creyo que hai estremaos tipos de votantes. El que vota a tal porque ye lo que siempres se votó en casa; el que vota a cual porque esa ye la so ideoloxía ya nunca la va camudar, l’otru que vota en función delcumplimientu de lo prometio anteriormente, el d’allá que lo fai precisamente en función de les promeses del programa, y tamién ta’l de la moto que se dexa llevar de los formadores d’opinión de la prensa. Entá hai más tipos, como los votantes anti-sistema,los abstencionistes convencios o los que deciden nel minutu caberu. Al final toos son votos.
Yo, nun teniendo ideoloxía, voté a cuasi tol espectru, esquierda, drecha y centru perotamién tengo votao en blancu, tratando con ello de significar el mio refugu al sistemapolíticu nel so conxuntu. L’ausencia total d’información al rodiu esti votu nos medios de comunicación al día viniente les eleiciones, cosa que nun algamo a entender, llevóme a reconsiderar esa posibilidá y agora voto en función del mio programa políticu.
Sí, el programa de mio, mui cortín, cuatro, cinco puntos tolo más, pero que considero prioritarios pa que yo otorgue’l mio humilde votu a cualquier formación política. Nunalgamo con ellos, dende lluéu, tolo que requier un programa de gobiernu d’un país como España, pero son los que yo entiendo como fundamentales y poro voi buscalosnos programes de los oferentes de servicios que vamos alcontrar na feria eleutoral.
La xusticia, la independencia de los xueces y la dotación de medios personales y materiales pal so exerciciu, ye pa min el primer ya más importante d’esos puntos,http://repdiv.blogspot.com/2018/11/iustitia-ultima-ratio-civis.html y lo que vemos estosdíes nel Tribunal Supremu sirve pa recordamelo, como lo lleven faciendo de forma sistemática otros tribunales no tocante a la corrupción de los políticos. El primer de losmios puntos.
Dempués de la xusticia vien la reforma del sistema eleutoral que creyo que ye deficientey conduz a que’l valir del votu seya muncho desigual en función d’ónde se vivan’España y da demasiáu poder a los partios nacionalistes. La poca representatividá departios nacionales como IU, güei disuelta en Podemos, o la yá cuasi estinta UPyD son una amuesa nidia d’esti desequilibriu. Amás de lo anterior, la necesidá de llistes abiertesyá ye un gritu xeneralizáu http://repdiv.blogspot.com/2019/02/el-modelo-electoral-aleman.html , a última hora, esta sedría la mio segunda prioridá.
Europa ye la viniente preferencia. Nun puedo entender el futuru d’España fuerad’Europa, de fechu nun puedo entender el futuru de dalu país européu fuera la Unión Europea ya tarrezome que’l Brexit va damos una amuesa clara del friu que fai ensinl’abrigu d’ella. El mundu ta mui axitáu ya nun puedo nin quiero maxinar lo que sedríade nós ensin esa institución http://repdiv.blogspot.com/2018/10/manuel-valls-barcelona-y-el-espiritu.html , de mou que l’enfoque européu de los programes va ser pa min daquémui importante a estudiar.
Hai munchos más elementos nun programa eleutoral pero nun hai nengún programa que responda esautamente a lo que caún de nós queremos. Estos tres elementos son prioritarios pa min, tamién l’estáu autonómicu m’esmolez y creyo que nalgunosaspeutos necesita una reconducción, la educación y la sanidá nun pueden ser elementos que faigan sentise estremaos a los españoles en función la rexón que vivan. Eldespoblamientu del campu, l’avieyamientu la población, la emigración, les pensionestamién cuenten pero too nun puede dir nel programa d’ún.
Nos díes vienientes de seguro vamos oyer más descalificaciones que propuestes. Va haber tantu ruiu que va resultar difícil enterase de cuáles son les soluciones de lospartios, va ser como comprar nun mercáu llenu de vendedores glayando la so mercancía y pa evitar confundise ya tornar a casa con más coses de les necesaries o con otres quenun queremos convien dir con una llista colo que de verdá buscamos. Esa llista ye la que representa el mio programa, con ella pretendo evitar que los glayos de los vendedores me lleven a mercar daqué que nun quiero y recomiendo que caún se faiga la so llista con independencia de conseyos y proclames d’amigos, comentaristes o políticos. El programa ye de caún.
Raúl Suevos
a 16 de febrero de 2019
repdiv.blogspot.com
abellugunelcamin.blogspot.com
No comments:
Post a Comment