Nun foi un día cualquier

 

N’Ucrania, país anguaño afaráu pola guerra y que les sos vicisitudes sigo cotidianamente, conocen el nome de munchos de los sos héroes, a los que gasayen de formes múltiples, dalgunes d’elles, desgraciadamente, de forma póstuma. Nel restu del mundiu occidental, y tamién nesi país, lo habitual ye glosar y celebrar les fazañes de los héroes deportivos, como a nós mos asocede con Jon Rahm y  enantes con Ballesteros. Cuando’l deporte que practiquen nun ye de los qu’arrastren mases, como nel casu de la natación artística, nel qu’una moza tien tornao a casa con un sacu de medalles tres el mundial del ramu, los festexos son de menor duración y esaltación. Ye lo qu’hai.

Y cola xente del común, o la xente corriente, si vustedes prefieren ¿qué pasa? Pues normalmente nada, ehí se queda, nela alcordanza del protagonista de la supuesta fazaña, y si acasu, si los hubiera, de los acompañantes. Y ehí ye au llega la mio rebelión personal, yá que güei, nel campu de golf municipal del Tragamón, en Xixón, tengo sío’l protagonista de una xesta, qu’anque mañana va ser yá escaecía polos qu’ellí taben, yo voi tratar con estes llínees de que perdure nel tiempu.

El fueyu 6 d’esti campu, que pa quien nun lu conoza voi dici-y que tien namái  nueve fueyos y t’allugáu dientro de la ciudá, ente’l Campus y el Xardín botánicu, detalle esti que lu fai particularmente curiosu, ye un par cincu y handicap 1, esto ye, el más llargu y dificil del campu, con una salida complicada, y el restu la cai en cayida haza la drecha, dalgo que cuando llega’l brano amonta la dificultá de la mesma pues ye mui difícil suxetar les boles y torgar que se vayan rodando fora de cai, lo qu’agranda la dificultá. El green ta defendíu por un bunker maldadosu nel que ye mui fácil acabar, ente xuramentos, cuando un yá cree tener llegao a meta.

Yo güei salí mui bien y mui llargo col driver; superando’l cambiu de rasante qu’espera a cien metros y ensin tocar los llaureos descomanaos que formen un muru pela drecha; llogrando que la bola rodara dempués pela cuesta abaxo pa descansar metanes la cai. 

A continuación dí una madera 3 mui bona que me tien dexao la bola yá un pocu pasao la parte baxa de la cai, entamada la subida y a unos 140 metros del green; y p’algamalu  pegué una madera 5 tamién escelente que, tres golpiar el muru llateral del vieyu viveru de plantes que llenda la cai pela esquierda -sélo, soi un cobarde y nun m’atreví a dir direutamente pola bandiera- tienme depositao la bola al altor del green, nuna zona de yerba basta con un lie reguleru.

Vi la posibilidá de triunfu y, anque me temblaben les moñeques, pegué-y un rodadín sele col pitching haza bandiera, que güei taba abaxo, al pie del gran pianu que separta’l green en dos mitaes, y nel so llau drechu. Fízelo pa nun me quedar cortiu, pensando que si non entraba la bola, a lo menos, tornaría. Pero non, la bola quedóse quieta, colgada n’equilibriu inestable a un metro y mediu penriba’l buracu, pa la mio perplexidá y cabréu. Y entoncenes asocedió.

Como si de mín se apiadara, la bolina blancucia –yera una de les más vieyes de la bolsa- escomencipió a rodar, primero selequino, dempués casi con priesa ¡qu’entra, qu’entra¡ gritó’l mio collaciu. Y anque yo nun quería creyelo, sí, entró ¡Berdie¡ Qué maravía.

LLuéu, nel chigre, tocóme convidar la sidra, dalgo que fice con inmensou placer, casi’l mesmu col qu’agora lo escribo, pa enzancar qu’esto se escaeza, pues sé que, con una fazaña como esta, y otru protagonista, un bon periodista deportivu puede escribir un llibru.

 

En Xixón a 29 díes vencíos de xunetu de 2025

Torna en castellán en repdiv.blogspot.com

Otra vegada la Ceya, arrispía, canoxa y depilada

 

Yera una historia vieya, de les que s’esmorecen col tiempu, p’allegría de los sos protagonistes, creyía yo, anque, una vegada más, les mío capacidaes como sociólogu queden míseramente espuestes. Y ye que, colos años, paecía qu’aquella operación de la Ceya, o lo que ye lo mesmo, el manifiestu qu’un grupu de figures conocíes de lo que dalgunos llamen Cultura, y munchos cultureta, asoleyaron en sofitu al nefastu Zapatero, y acompañaron col xestu del furabollos dobláu sobro la ceya, pa que nun mos quedara dala dulda, quedaba escondíu no más fondero del baúl de les pifies de caún de los roblantes. Pero non.

Tendría sío lóxico. El ñetu del capitán Lozano, Rousseau pa los masones lleoneses, representa la ruptura del socialismu español cola socialdemocracia, tamién la deriva haza’l populismu d’esquierdes, y, l’emplegu de la mentira como doctrina fondamental pa caltenese nel poder -dalgo que’l so sucesor anguaño, el doctor Sánchez, deprendió dende mozu- y que supunxo un final aciagu del so gobiernu en plena crisis económica mundial, por él refugada con cabezonería. La so trayeutoria posterior como lacayu del dictador Maduro y les sos mediaciones escures con sátrapes varios paecíen motivu abondo pa tomar distancia con tolo qu’a él se refiriera. Pero non.

Tornen güei los de la ceya. Más vieyos, con menos pelo, y el que queda nes sos ceyes, a lo menos nos varones, amuesase canoxu, arrispíu, tiesu, como correspuende a la edá provecta de la mayoría. Tampocu son tantos. Hai dalguna falta, como la d’esi Sabina que paez tener descubierto la realidá de les coses tres los sos desencuentros con Hacienda, y falta dalgunu más, que nun voi citar por castigar la so impertinencia de la vez primera.

Son xente apesebrada na so mayoría, bien por conciertos en ciudaes afines col partíu del patrón, o por rellación con ONG del ramu gubernamental, conferencies en congresos y cursos braniegos, publicaciones d’obres que casi naide llee. En xeneral yá nun son creadores independientes, si dalguna vegaxa lo foron, pues l’asturianu de pro y un de los más aparecientes de la llista, hasta al xeneral Franco llegó a cantar. Ye lo qu’hai.

El so manifiestu anguaño, lloñe d’ayudar, dexa n’evidencia los apoyos escarsos ya interesaos con que cuenta’l maríu de Begoña na cultureta española anguaño. Un mundiu, el de los panfletos, que ta bien lloñe d’aquellos arbitristes de los tiempos de la Illustración española, y qu’a min me duel ver qu’aínda cuenta ente los sos roblantes con un Serrat al que yo otorgaba mayores lluces.

Raúl Suevos

En Xixón a 26 de xunetu de 2025

Torna en castellán en repdiv.blogspot.com

Festival y cultura de Defensa

 

Mientes paseyo’l Muru nun puedo dexar de pensar que l’espectáculu auténticu ta nel públicu qu’añu tres añu s’allega en masa a esta cita braniega, con unos neños que la van recordar, como a mín m’asocede col día d’Asturies de la mio infancia llonxana. Y ye que la gran sablera xixonesa lluz impresionante nos tres dominios, tierra, mar y aire. Tantu que dalgún podría pensar que somos un pueblu belicosu, o militarista, o simplemente consciente de la so Defensa. Pero non, nada d’eso hai.

Diz la señora alcaldesa que pal añu viniente, vixésima oportunidá pal festival, quier qu’ésti seya grandiosu, y quiciabes tea pensando n’adornar el Muru con bandieres españoles pa qu’un alieníxena aterrizáu por érru nel arenal nun piense que ta en Terranova.  Si bien ella, la verdá, productu del so país, nun tien la culpa.

Mientes güeyo baxar a los paracaidistes de la Guardia Civil, esos que como los TEDAX, los rescatadores de montaña del GREIM, los buceadores del GEAS, o’l restu de los sos collacios de verde, nun son profesión de riesgu, a diferencia de municipales y policíes autonómiques –acoyonante- permítanme la porcayada, pásame pela memoria la visita recien del Elcano y la fragata Blas de Lezo, con visita esitosa y multitudinaria a dambos, y los ecos últimamente repetitivos sobro’l futuru de la puxante industria de defensa implantada na rexón. Too ilusión baldía, no qu’a cultura de Defensa se refier.

Tenemos dos lleis orgániques que mos definen lo que ye la Seguridá Nacional y la Defensa Nacional, malapenes conocíes polos miembros de les Comisiones de Defensa de Congresu y Senao; nelles vemos que la primer engloba a la segunda, pero too ello nun sirve un res si la nación, la ciudadanía, nun ye consciente del so significáu, y ello nun puede asoceder si nun se desarrolla una cultura, si nun s’introduz nos currículos d’enseñanza. El festival, que ye aéreu, non de Defensa, malapenes supón un ruxíu efímeru, como’l de los motores del Eurofighter.

Alemania tien solicitao a la XE la esención temporal del 3% de déficit, como otros 15 países de la Xunión. La Rusia de Putin dicen qu’acesma. Pel sur, Arxelia y Marruecos ármense hasta los dientes, anque dica agora, el nuesu vecín namái mos únvia patrulles d’esploración, como esos 50 menas llegaos ayeri a nadu a Ceuta. Tamos metanes un temporal y el capitán de nueso decide por llibre el cómu y el qué, sabiendo que n’España, magar el festival, nun hai cultura de Defensa y los sos alministraos bovinos van siguir paciendo na calma de la ignorancia.

Raúl Suevos

A 27 díes vencios de xunetu de 2025

Torna en castellán en repdiv.blogspot.com

Los tesoros de la Caxa

 

Nun ye Nicanor Piñole’l rei del verde asturianu. Hai otros pintores que tamién lo tienen trabayao, y con ésitu notable, pero como pa gustos esisten les colores, y nesti casu’l dichu adáptase maraviosamente a la situación, a mín ye’l xixonés el que más y meyor algama a trescalame. Quiciabes porque, amás del tonu atristáu y llentu que los sos paisazes paecen rezumir, trabaya tamién unes escenes costumbristes que mos lleven direutamente a aquelles dómines qu’anguaño paecen tan llonxanes.

El Muséu Piñole ye pa mín cita obligada ca ciertu tiempu, y esti branu, cola esposición temporal de los fondos de la coleición del Bancu Sabadell, heredaos daquel carbayón Bancu Herrero, del que namái queda, parcialmente’l nome y, sobremanera,  l’edificiu fabulosu de Manuel del Busto na cai Fruela d’Uviéu, yera una visita más que xustificada, anque, sorpresivamente, atopéme solu nes sos sales.

Y mereció la pena, anque namái fuera por ver esa familia “camín del Cristu” qu’encuadra otra vegada’l paisaxe de Prendes y la costa ente Torres y Candás, con una madre arremangosa, de manes grandes y curtíes, que llama poderosamente l’atención del visitante. Pero foi la “romería” la que m’atraxo especialmente, por un detalle en concretu, el paisaxe de fondu, que parez difuminase colos horizontes sucesivos y que me trae l’alcordanza del fondu que Da Vinci-y da a la Xoconda, anque nun tengo nin idea sobro si esiste dalguna rellación nel procesu creativu de Piñole.

Camín yá de casa asaltóme’l procesu de la dixestión sobro lo visto, y sobro lo que nun veremos, me temo. Y ye que, el fechu de qu’una institución privada como’l Sabadell-Herreru ponga a disposición una parte pequeña de la so coleición que correspuende a la obra de Piñole tá mui bien, pero, según creyo recordar, Masaveu aparte, yera la de la Caxa d’Aforros d’Asturies la más importante, anque esto ye namái intuición, pues nun me consta qu’al tiempu de la so desapaición se ficiera inventariu de los sos fondos; tampocu cuando estos pasaron a ser los de Liberbank, y, que yo sepa, muncho menos cuando la direición y xestión de lo que queda o quedaba pasó a residenciase en la puxante Málaga baxo’l nome d’Unicaxa; lo que mos dexa güérfanos, o ignaros, a lo menos de parte de los nuesos raigaños culturales. Ye lo qu’hai.

La decadencia de la rexón de nueso traduzse principalmente na nuesa mansedumbre como suxetos políticos y lo qu’escoyemos, lo que lleva al estáu de postradura económica y social actual, que namái los que nun quieren ver pueden negar o aceutar resignadamente.

Raúl Suevos

A 20 díes vencíos de xunetu de 2025

Torna en castellán en repdiv.blogspot.com

Repunando a los repunadores

 

Confieso que, por vergoña, nun m’atreví a poner el títulu que correspondía realmente, “Refugación de la refugación”, al-Tahafut al-tahafut n’árabu, del discursu-ensayu que desarrolló’l gran Averroes pa retrucar, y refugar, aquel Tahafut al-falasifa, o lo que ye lo mesmo, Refugación de la filosofía, qu’asoleyó en 1091 el más pernomáu de los teólogos islámicos, Al Ghazalli, nel que ponía a parir a Avicena, y de pasu a Aristóteles y Platón.

La obra d’Averroes, la so torna n’español, duerme, a la espera de que daquien l’asoleye, nun archivu familiar de Pola de Sieru, au la dexó’l so autor, l’escaecíu coronel capellán don Carlos Quirós, y nella’l filósofu cordobés balta toa la construcción intelectual de al Ghazalli, mui ortodoxa y beneficiosa pa los presupuestos del poder. L’asuntu diba costái’l destierru al cordobés cuando los Almohades, los yihadistes de la dómina, aportaron a Al Andalus. Ye lo qu’hai.

Los repunadores d’anguaño, los ghazallis, na mio opinión y al socaire de los sucesos de Torre Pacheco, son los que s’enfoten en quitar importancia a les algaráes achacándoles a grupos interesaos d’ultras, como los qu’en Paiporta atacaron al doctor Sánchez supongo, al tiempu que canten les escelencies y la necesidá d’aceutar el multiculturalismu, emplegando esti neoloxismu pa despintar que los problemes de convivencia que se dan n’Europa, y poro n’España, producense namái con una cultura, l’Islam.

Nun esisten problemes de convivencia colos grupos procedentes d’Asia, o d’Hispanoamérica, tampocu colos del África sosahariana, sacantes si son de confesión islámica, magar que, como tolos grupos migrantes na historia, tienen tendencia al agrupamientu en barrios específicos au cuenten, o creyen cuntar, con redes d’apoyu cultural. Les sos problemátiques, cuando se dan, sónlo de calter delictivu tradicional, y trataos por policía y xueces, como correspuende.

Estos ghazallis modernos, interesaos ellos, nun ven más alló de los votos posibles, y la mano d’obra barata, y escaecen que l’Islam ye una relixón universalista, belixerante y violenta yá dende la toma de Xáibar nel 628 y el degüellu posterior de los varones xudíos y la esclavitú de les sos muyeres; nun pescancien qu’énte la cohesión terrible que presenta la so cultura, los sistemes democráticos representativos amuesen una debilidá estructural que va ser aprovechada pasao un tiempu; nun se decaten, nel casu español, que les banlieues franceses y los barrios piesllaos suecos, o belgas, mos avisen de lo que vien; nun comprenden que, más alló de lo políticamente correuto, hai que desendolcar polítiques que pongan cotu a la emigración descontrolada y a les naturalizaciones regaláes. O preparar el pescuezu, como mos avisaron los mozos de la Rambla de Barcelona.

Raúl Suevos

A 19 díes vencíos de xunetu de 2025

Torna en castellán en repdiv.blogspot.com