El senador Palpatine y Anakin Skywalker

 

Con cierta frecuencia reponen nalguna cadena la serie de películes de la Guerra de les Galaxes, y nella, ente otros, sobresalen dos personaxes que pertenecen al llau escuru de la Fuercia; trátase de Darth Sidious, al que conocemos al entamu yá convertíu en emperador de la Galaxa, pero qu’enantes, nuna de les precueles, yera un senador perimportante de la Federación, esto ye, Papaltine; y el so ayudante, Darth Vader, al que tamién, nunu de los capítulos, conocemos como el mozu Anakin Skywalker, o lo que ye lo mesmo, el fiu de la princesa Admidala y Luke Skywalker.

El personaxe de Papaltine, según George Lucas, el so criador, inspírase en dictadores históricos, como Xulio Cesar o Napoleón, o’l mesmu Richard Nixon; pero’l d’Anakin ye más complexu, anque tamién podemos atopar na historia mozos con futuru rescamplante que deciden llanzase en brazos de les fuercies, más curioses y rápides, del llau escuru. Sicasí, vien esto a cuentu de lo que ta a puntu d’asoceder nos EEXX con l’aparentemente seguru accesu al poder, a partir del payares viniente, de Donald Trump, una versión yanqui del nuesu Gil y Gil, o del italianísimu Silvio Berlusconi, toos ellos constructores, con currículu xudicial ampliu, veníos a guetar glories mayores nel mundiu de la política.

Donald Trump tien anunciao repetidamente que va tomar venganza escontra aquellos que nun lo sofitaron na so salida del poder tres perder les eleiciones, y debe ser una amenaza creíble puestu que na convención del so partíu tolos so vieyos detractores, incluyendo a Nikie Halley, antaináronse a xura-y llealtá; tamién el Anakin nievu, J.D. Vance, un senador mozu y arrellumante que nel pasáu llegó a denominalu como’l Hitler de los EEXX, y agora abraza al so señor dende la so nominación como vicepresidente, y les so posibilidaes futures teniendo en cuenta que Trump “namai” va poder tar cuatro años nel poder. Ye lo qu’hai.

Que l’Llau escuru avanza ye una realidá si tenemos en cuenta que’l tribunal Supremu yanqui vien de declarar que los actos del presidente tán despenalizaos, faiga lo que faiga; un privilexu, qu’enantes nun taba nidio y que Trump va usar pa dirixir a los EEXX haza un cesarismu nel que los famosos “checks and balances”, frenos y equilibrios, del sistema norteamericanu pasen a segundu, o tercer planu, o simplemente van desaniciáse.

España queda lloñe, va pensar dalgún, pero Washington ye la capital d’esti imperiu nel que toos mos movemos, y lo qu’ellí pasa a toos mos afeuta, a lo menos n’Occidente, especialmente n’Europa, teniendo a Putin de vecín. Vienen tiempos difíciles y témome que la orden de los Jedi ta acabada, desgraciadamente.

Raúl Suevos

A 19 díes vencíos de xunetu de 2024

Torna en castellán en repdiv.blogspot.com

Estenando la borrina

 

Tán aínda los analistes, y asina va siguir demientres un tiempu, discutiendo sobro si yeren galgos o podencos, como naquella fábula d’Iriarte que pasó a ser frase del acerbu verbal de los nuesos pás. Otros, más illustraos ellos, traten de discernir si tamos énte un casu de tactismu o tacticismu entemeciendo con ello lo qu’atañe a un cuerpu orgánicu o a la milicia, anque a vegaes dambos ámbitos actúen de forma similar.

El casu ye que la decisión, sorprendente pa dalgunos y lóxica pa otros, que’l líder máximu de VOX tomó tocantes los so alcuerdos de gobiernu col Partíu Popular, na mio opinión, ye un movimientu que vien a estenar la borrina na que s’atopaba somorguíáu tol nuesu sistema políticu, nel que dende va tiempu se fai de too, pa plasmu del sofríu ciudadanu, menos gobernar. Con esti rompimientu, más pasional qu’una simple ruptura, ya sabemos au s’alcuentra caún.

El partíu principal de la oposición va poder agora, “sin ataderes morales”, dedicase a rebañar los votos en desamparu qu’entá queden de lo que fue Ciudadanos y que, dicen, nun aceutaben l’estigma d’asociase, anque fuera pente medies de terceros, con la drecha ultramontana. Agora yá tienen a un PP impolutu. Falta saber cuántos son.

Amás d’estos centristes teóricos, perdíos ensin rumbu nel  mar procelosu de la política de nueso, los populares van poder escomencipiar a face-yos arrumacos a los, siempres dispuestos a recoyer nueces, muzos del PNV, tan progresistes ellos. Y, si falta ficiera, ¿por qué non? Los trabucaires de la vieya Converzencia, anguaño mocedá de Puigdemont. Y ye qu’un votu bien val una misa ¿nun yera asina?

Pel llau de la drecha el señor Abascal, a quien un populista d’última xeneración vien   de birla-y 800 mil votos europeos, tamién afina’l so perfil lliberándose del PP y reafirmando una de les so bandieres principales, la Inmigración, una asuntu qu’a lo llargo del branu, cola llegada de cayucos a Canaries, ve siguir ferviendo y metiendo presión a la olla política española, y de pasu a la europea. Ye una apuesta a mediu y llargu plazu, que va costar entender a dalgunos, pero que dexa al partíu preparáu nel casu de que, como dalgunos abarrunten, mos atopemos en vísperes d’unes eleiciones anticipáes. Veremos.

Quédamos el doctor Sánchez, a estos altures ye ociosu falar del so partíu, que se tien declarao mui contentu cola separación de les dreches pero que, en realidá, pierde la segunda coartada, tres lo del CGPJ, pa meter al PP na so manida fachosfera, y que va tener que bregar, muncho, pa xustificar les so alianzes con filoterroristes ya independentistes, a cualos más xenófobos toos ellos. Ye lo qu’hai.

Raúl Suevos

A 15 díes vencíos de xunetu de 2024

Torna en castellán en repdiv.blogspot.com

L'ablayamientu del muelle

 

Camuden les modes, cambien los usos económicos, y tresformense les sociedaes en xeneral col pasu del tiempu inesorable. Y con ello va mudando la fisonomía de les ciudaes, dalgo que, tamién en Xixón, tien asocedío y tá pasando anguaño.

Vien esta parolada anicial al filo d’un paséu al tapecer pela fachada marítima lleváu a cabu va dellos díes por tres amigos con un más qu’aceutable y llonxevu pedigrí como playos. Un apiancar que, tres el Muru, llevómos a la zona del Acuariu, pa lluéu tornar sobro los nuesos pasos pa algamar l’espigón de Santa Catalina, esi que toos conocemos como Lequerica, pol nome del so inxenieru constructor.

A la vuelta, yá anochando, decidimos tomar asientu nuna terraza pa hidratanos con una cerveza, nun recién inauguráu restaurante, l’único que queda, creo, na parte baxa del muelle. Y ellí, mientes reviciábemos el bien merecíu refrixeriu, decatámonos de la solitú del Muelle y la so redolada, ensin pasiantes a esa hora tardía, baxa iluminación, y güérfanu del rumor que suelen contener les zones urbanes vivaces.

Nun pudimos evitar el recordar con señardá aquellos branos xixoneses, col barriu altu enllenu de sonadiella gracies a la economía puxante qu’impulsaben la Tabacalera, la actividá pesquera nel puertu, y, en xeneral, el puxu de la siderurxa, los astilleros y la minería. Un tou que facía que les nueches xixoneses se convirtieran, a lo llargo de tol branu, y anque orbayara, nun ruxideru de personal per tol centru, con especial atención al muelle y Corrida, pa dempués espandise haza’l Parque del Piles o’l Xardín, o les verbenes de barriu que a lo llargo y ancho del conceyu se llevaben a cabu con ocasión de les festividaes de caún. ¡Qué tiempos¡

La economía manda van dicir dalgunos, y cierto ye, pero tamién observo qu’en Xixón nun supimos xestionar el devenir de los tiempos, quiciabes dende Areces p’acá, y eso nótase nos munchos proyeutos qu’una vegada nacíos fueron quedando abandonaos. ¿Acuerdense del metrotren? Esa Tabacalera tou continente ensin conteníu, esi Palaciu de Revillagigedo y colegiata siempres a la gueta d’autor, o esi fallíu hospital de peregrinos na Casa Paquet.

Agora tenemos Metropoli, tamién la Selmana Negra, y, amás, vamos tener casetes en Begoña –les gaviotes van tar felices, aún más- pero nun dexen de ser opciones simplones y populacheres que duldo que devuelvan a Xixón la exuberancia y bayura braniega qu’un tiempu tevo. Y mentanto, un Muelle ablayáu va siguir siendo metáfora de la xentrificación acelerada que sufre’l vieyu barriu de Cimavilla. Ye lo qu’hai.

Raúl Suevos

A 6 díes vencíos de xunetu de 2024

Torna en castellán en repdiv.blogspot.com

Calomarde 2.0.

 

El nome correspuende a un municipio pequeñu de Teruel, cerque d’u naz el Taxu y en plena comarca d’Albarracín, pero tamién ye l’apellíu de un políticu renomáu del sieglu XIX del que mos queda aína na fala común aquella frase de : “manes blanques nun ofenden”, rempuesta que’l susodichu-y dio a la guantada recibida d’una Infanta d’España al enterase ésta de que llograra la robla del rei felón, Fernando VII, pa derogar la Pragmática sanción y reinstaurar la Ley Sálica, lo que dexaba fuera del tronu a Isabel II, por ser muyer.

El tipu yera d’orixe perhumildosu, pero llistu como la fame, lo que lu llevó a estudiar lleis en Zaragoza pa darréu medrar na corte madrilana, primer a la solombra de Godoy, pa dempués, cola restauración absolutista, facese imprescindible pal monarca, algamando a ser ministru de Gracia y Xusticia, que yera como se denominaba entoncenes al ramu encargáu de les rellaciones coles Cortes y la Xusticia.

El talu Calomarde taba en tolos axos, siempres actuando en beneficiu del rei, aquel felón, y en desterciu de lo que suponíen los poderes emanaos de les Cortes de Cádiz y la Constitución de 1812. Cayería cola desapaición d’aquel rei nefastu y la llegada al poder del movimientu lliberal, pa acabar los sos díes esiláu en Toulusse.

El nuesu ministru de Gracia y Xusticia anguaño, amás de Presidencia, el señor Bolaños, recuérdame tremendamente a aquel baturru, si bien ésti ye nacíu na Corte, anque como aquel de familia humildosa, y tamién dotáu con lluces ya inxeniu induldables como pa tener desarrollao una carrera rescamplante como estudiante y dempués como lletráu; si bien ye, yá como executor de los designios del so mentor y patrón, el doctor Sánchez, cuando tien algamao, nun voy dicir el favor de la ciudadanía, pero sí el so reconocimientu y notoriedá.

Bolaños dispón de más poder que Calomarde, por delegación como él, y la so carriera como “desfacedor” d’entuertos, o executor de mandatos espinosos –recuerden el desahuciu franquista del Valle de Cuelgamuros- atestíguenlo, pero tien sío cola negociación y desbloquéu del Conseyu del Poder Xudicial cuando tien algamao les cotes más altes, como aquél cola derogación de la Pragmática, y si bien nun tien sío abofeteáu, nun cabe dulda que tien concitao les ires de munchos, ente oposición y xudicatura, sobremanera cuando afirmó que l’alcuerdu “nun ye vinculante”, magar la so robla al pie. Ye lo qu’hai.

Viendo el discurrir de la vida de Calomarde, tan dependiente del so señor, y tan abandonáu a la so suerte tres la so desapaición, convendría que su reproducción actual anduviera con tientu, pa cuando haya que renovar les covachueles.

Raúl Suevos

Torna en castellán en repdiv.blogspot.com