Torna'l gobernín

 

Esta España de nueso tiénse convertío nun sinvivir. Tan pronto viaxamos nun cohete económicu, anque nun se sepa mui bien haza qué destín, como escargatamos na historia patria a la gueta de restos arqueolóxicos de calter políticu. Too seya pol entretenimientu del personal, ye lo qu’hai.

El respigu d’esta selmana vieno de la mano de los nuesos vecinos lleoneses, primer los miembros de la diputación provincial, col so votu favoratible a una autonomía lleonesa, con Salamanca y Zamora de comparses involuntaries, y darréu cola declaración del alcalde de Lleón, significándose por una autonomía asturlleonesa, y a min, esto cabero, qué quieren que-yos diga, provocóme un axorizu, casi un latigazu, dende’l güesu de la risa hasta la ñuca.

Y ye que casi tolos díes paso nel mio analayar pela siempre Plaza del parchis, enantes del innombrable Xeneralísimu y anguaño del Institutu, que nunu de los llaterales álzase aínda rescamplante, tres llimpieza recien, un edificio magníficu, art decó, de Manuel del Busto, que de la so obra tenemos actualmente esposición na Casa de Xovellanos. Una construcción que, más allá de la so pureza de llínees, fue nel so momentu la see del “Gobernín”, aquel inventu d’esistencia curtia montáu por Belarmino Tomás –que yá l’armara n’ochobre del 34-   nel branu del 37, tres la cayida de Santander gracies a la traición de los gudaris vascos, y que s’autotitulaba como gobiernu del Conseyu soberanu d’Asturies y Lleón; tan soberanu y lonxevu como aquella Xunta Xeneral y Soberana del Principáu  d’Asturies creada al entamu de la nuesa Guerra d’Independencia.

El gobernín, sicasí, ye obligao reconocelo, sofitábase nuna cultura milenaria que s’anicia con Estrabón, que nos sos escritos púnxomos a toos, asturianos y lleoneses, nel mesmu sacu, y que’l mesmu Franco continuó con delles federaciones asturlleoneses y un distritu universitario qu’en Lleón tenía una facultá de veterinaria estraordinaria. Metanes quedaría toa una historia que dexa atrás Asturies cuando García I tresllada la corte d’Uviéu a Lleón, y de la qu’anguaño queda, como vestixu y prueba, l’asturlleonés nel somontanu, y el bable nestes partes de la cordillera.

La realidá ye que siempres mos llevamos bien, y de forma fluyida, con un Valencia de la O, que glaya al vientu cómo los asturianos van secar a aquelles tierres, y con unos trenes que nel branu lleguen atarraquitiaos colos lleoneses guetando la novena de las augües de San Lorenzo. Pero d’ehí a una autonomía ñueva…

Quiero pensar, magar que la propuesta seya plenamente legal y lexítima, que se trata de un globu d’aíre más, de los munchos que la política nacional mos regala casi a diario, y que, nel fondu, unos y otros, busquen namái distrayer, poro, al mou asturianu, digo-yos: dexái-vos de gandayaes.       

Raúl Suevos

A 29 díes vencíos de xunu de 2024

Torna en castellán en repdiv.blogspot.com

El vieyu marqués de Marcenao

 

Nel uvieín parque de San Francisco tien un bustu que la so memoria recuerda, y en Santa Marina de Vega, la so villa natal, tamién tien otru; pero en Madrid foron más lloñe y dedicaron-y una cai, la del marqués de Santa Cruz de Marcenado, xusto detrás del palaciu de Liria, y au s’atopa la vieya Escuela d’Estáu Mayor del Exércitu; y nun ye pa menos, pues les Reflexones militares del marqués foron el manual militar de referencia demientres tol sieglu XVIII, con siguidores reconocíos como Napoleón, y dicen que tamién, anque ensin pruebes, Federico’l Grande.

El casu ye qu’ellí tevi como invitáu a la imposición de faxes d’Estáu mayor a los egresaos nuevos de la promoción cabera d’esi vieyu Cuerpu, anguaño especialidá, que s’imparte na see actual de la Castellana pa los tres exércitos y cuerpos comunes, pero que, tres la entrega de diplomas por SM el Rei, treslládase a los antiguos claustros pa, nun actu del Exércitu y la Guardia Civil con ceremonial que recuerda l’ingresu n’órdenes d’otru tiempu, o sectes, significa-yos la parte relixosa del asuntu, pues supónse que, nes sos manes, nos años vinientes, van dir depositándose les mayores responsabilidaes de los exércitos d’España, que la so cúpula tá formada, na so totalidá, por diplomaos d’Estáu mayor.

Les Reflexones de Marcenao siguen siendo estudiaes, pues munchos de los so principios  caltienen la so validez, pero estos diplomaos van a atopase con un mundiu militar en plena fervedura, cabria falar de revolución total, pues el campu de batalla, como amuesen los frentes ucranianos, o la redolada urbana de Gaza, yá nun ye lo que yera; con un ciclu d’intelixencia tan veloz qu’ensin el concursu de la Intelixencia artificial nun sedría aprovechable, con unos ensames de drones énte los que la infantería atópase inerme, con la intervención directa de la empresa civil –véase Musk y el so hiperlink- y los so intereses económicos, con unes armes autónomas que van facer tremar el procesu decisional. Un campu de batalla de milenta rostros menaciantes, camudantes cadía.

Va se un desafíu d’adaptación constante al que van tener qu’enfrentase, tamién nel ámbitu políticu, pa lo que tienen cursao al mesmu tiempu un máster en Política de defensa y seguridá global na Universidá complutense, que-yos debe dar la capacidá pa pescanciar lo qu’asocede nel mundiu y la so influyencia nes aiciones y decisiones nes qu’ellos van ser llamaos a intervenir, primero como asesores, y nunos años como decisores.

La vieya Escuela d’Estáu mayor guarda como una ayalga, na so zona más noble, la vitrina de mármol coles faxes de munchos de los cayíos n’actu de serviciu, recordatoriu pa los titulaos nuevos. Ye tamién lo qu’hai.     

Raúl Suevos

A 22 díes vencíos de xunu de 2024

Torna en castellán en repdiv.blogspot.com

Bistecca a la asturiana

 

Ye la Toscana una de las rexones más conocíes d’Italia, con Florencia como faru históricu y mundial de tolo que representa, fondamentalmente’l Renacimientu. A ella siguen-y en fama, Siena, Pisa, o la pequeña Carrara, por aquello de los mármoles, ente ellos el que sirvió de base pa que Miguel Ángel esculpiera’l David. Pero Toscana tien munchos más elementos pa reviciu y delicia del mundiu; un d’ellos ye la Maremma, una comarca costiera, que pel sur algama’l Lazio, con una tradición ganadera milenaria, coles so vaques de raza chianina –cuernos llargos y capa ente gris y blanca- y los non menos penomaos vaqueros a caballu, los bútteri.

El asuntu bovín acabaría ehí, ensin más, si nun fuera porque ye cola so carne que se produz la pernomada bistecca fiorentina, troféu máximu de la gastronomía toscana y, pente medies el turismu, conocía y apreciada nel mundiu enteru. Una fama que fai que seya pocu menos qu’imposible atender a la demanda cola producción de la Maremma. Ye lo qu’hai.

La bistecca ye casi’l doble de gruesa que’l chuletón tradicional de nueso, y el trucu pa la so preparación consiste en sometela a la brasa, non yá peles dos cares, sinon tamién polo que sería’l cantu au aínda tien de caltener el güesu. Too un arte si s’axusta, como tien de ser, a les dimensiones y pesu de la pieza.

Vien esto a cuentu porque el mío meirazu, que presume de ser un esperto carnívoru, unvióme ayeri un semeya d’una carnicería, Da Lusia, en Vimercate, tierra lombarda, onde s’esponíen dos  pieces de ternera asturiana –roxa de los valles supongo- pa iguar la nomada bistecca, al ¨módicu¨ preciu de 50 €/kgr, que más allá de la calidá induldable del productu, llenóme de contentu al comprobar que los nuesos sufríos ganaderos, acosaos directamente pol llobu y l’osu, ya indirectamente pola alministración, que d’un llau los abrasa alministrativamente y del otru dexalos indefensos énte la competencia de la gran industria agroalimentaria, aínda son a ampliar les sos riedes de distribución pa asina dar un respiru a les sos pequeñes esplotaciones. Bien por ellos.

Asturies debe y puede pensar y actuar más allá de los típicos llugares comunes de los políticos, y debe facelo rápido, pues el tiempu apremia.

Raúl Suevos

A 15 díes vencíos de xunu de 2024

Traducción en bable en abellugunelcamin.blogspot.com

Cuarenta de mayu

 

Esti domingu pasáu yera la víspora d’esa fecha mítica. Hasta’l cuarenta de mayu nun te quites el sayu, que diz el sabiu refraneru castellán, y peles cais de Xixón podía apreciase perfeutamente que’l personal andaba en tracamundiu; por munches razones.

Había dellos llugares y situaciones p’apreciar l’estáu d’esa enayenadura nuna mañana que lloñe de ser esplendia, tocantes el tiempu, paecía enllenar de duldes l’ánimu de los andariegos. Unos pasiantes que yeren ensame allá perdayuri, pero qu’espresaben especialmente lo estraño de la situación nun Muru de San Lorenzo nel que podía apreciase personal en camiseta al llau d’otros que portaben ensin problema l’anorak de l’hibiernu pasáu, y distinguir a los playos auténticos pol paragues preventivu que garraben en mano. Un muru atestáu de xente que güeyaben, de regüeyu dalgunos, y con ansiedá la mayoría, haza esi arenal en baxamar, con una inmensidá de metros cuadraos vacíos de cuerpos tostándose al sol, que ye lo que tocaba a estos altores, y con una Escalerona rindiendo honores al Sporting, dalgo que non asocedió cola Enseña nacional con ocasión del Día de les Fuercies Armaes. 

Quiciabes la semeya más triste dábenla aquellos que rodaben les sos maletas de fin de selmana pel Paséu, con una espresión ente murnia y encurniada, como si daquien-yos tuviera engañao tocantes cola prometida “Florida” del norte; esa Asturies que dalgunos columnistes pinten con un futuru turísticu gayasperu gracies al cambéu climáticu. Esos güeyaben l’arenal como’l presu que mira los praos dende la so celda. Ye lo qu’hai, dirán dalgunos.

El restu de la ciudá, atarraquitada hasta’l requexu caberu, ensin un buecu na más humildosa de les terrces, con cafés, sidreríes y garitos atestaos perdayuri, daba imaxe identica; hasta paecía qu’hubiera atacamientu pa votar subiendo pela cai La Merced, na Mesa electoral qu’ellí s’alluga. Yera la ciudá una espresión viviente y dinámica de aquel “toos a la cai”, que supongo que daquien tendrá glayao dalguna vegada en dalguna parte. Como si quedase en casa fuera un pecáu, nesa víspora de fecha tan mítica.

El casu ye que güei yá tamos nello, y el sol paez xugar con nós, sonriendo a ratos, y otros amosándose focicón, y siempres con un nordestín que caltien a raya a los bañistes. Nin siquier el Sporting pudo iguar la xornada ayeri, pos el resultáu fiede más a traxedia, o a cadávre si se prefier, qu’a otra cosa.

Cuarenta de mayu, n’alcordanza d’aquellos otros tiempos, cuando llovía, y nel Muru había espaciu de sobres.

Raúl Suevos

A 10 díes vencíos de xunu de 2024

Traducción en asturiano en abellugunelcamin.blogspot.com

El Foru itálicu de Roma

 

Tenémoslu estos díes nes nueses pantalles. Tráemoslu la imaxe de los Campeonatos europeos d’atletismu que se celebran na capital d’Italia. Una semeya que’l vienres, primer día d’una serié que va durar una selmana, resultaba impactante mietres la prueba de marcha atlética femenina en cuantes que discurría ente pinos mediterráneos y cipreses, típicos elementos arbóreos de la zona del Lazio, au s’alluga la ciudá del Coloséu, anque lo que más sosprendía yera la sucesión d’estatues marmórees descomanaes en representación de modalidaees atlétiques estremaes, tantes y tan guapes qu’unu de los comentarists esclamó que taben, ensin dulda, nel área deportiva más bella del mundiu.

Y nun ye pa menos, el Foru Itálicu, como’l barriu del EUR, Esposición Universal de Roma, ellí allegáu, representen una de les operaciones estétiques más ambicioses del réxime fascista de Benito Mussolini, que pente medies del urbanismu y l’arquitectura pretendía unviar un mensax políticu en clave nacional ya internacional cola construcción de un macru complexu deportivu espectacular nel so momentu, y aína anguaño, como amuesen les imáxes.

El casu ye qu’ellí sigue, pa reviciu de quien lo quiera apreciar y pa usu de tol sistema deportivu italianu, aparentemente integru, ensin que los estremaos gobiernos italianos quitaran-y nin una llosa de mármol, como amuesa la plaza central, na que podía lleese nel suelu distintes plaques cola lleenda “Duce anno I”, qu’imaxino facíen referencia al hipotéticu Novo imperiu que’l paisanu pretendía construyir.

L’enfoque italianu haza’l pasáu ye radicalmente diferente del de nueso, puedese ver a lo llargo de la península, con exemplos magníficos como la Estación Central de Milán, y ellí, magar tar llegalmente prohibíu’l fascismu y el so aponderamientu, tienen una mentalidá artística y práctica pernidia, y nun se destruyen o dexen esbarrubar, faltos de la caltenencia fayadiza, obres que tienen un valir artístico altu. Ehí lo dexo.

N’Asturies, tres años d’abandonu, paez que, por fin, comprendimos que la Universidá Llaboral de Xixón ye una obra impresionante amás de conducente, magar ser iniciativa de Girón de Velasco, un de los xerifaltes franquistes, y, como nel Foru Itálicu, dánse-y los usos académicos y artísticos que’l magnu edificiu puede contener. Nun ye mal camín.

El caso ye que los campeonatos d’atletismu celebrense metanes unes eleiciones europees de fondu significáu pal futuru d’Europa. Un futuru, pa dalgunos, enllenu de menacies de tipu estremáu, nel que la conocencia de la historia y la cultura, va ser d’importancia vital p’afrontalu con ésitu. Ye lo qu’hai.

Raúl Suevos

A 8 díes vencíos de xunu de 2024

Torna en castellán en repdiv.blogspot.com

Vermú musical

 

Paez que la Misa dominical foi quedando vieya ente los usos y vezos del gruesu de la población; non asina’l vermú dominical que solía siguir a l’antedicha, a lo menos no qu’a min me toca; y ye que, sobre too en Xixón, sobremanera nel Dindurra, lo de la colación mañanera, l’alcordanza d’aquella parva tan asturiana, acompañada de la llectura de La Nueva España, tien dío convirtiéndose en casi una obligación pa quien esto escribe.

L’otru día, va yá delles selmanes, taba embebíu na llectura de una tribuna nidia y descarnada sobro la oficialidá de la Llingua, roblada por Xuán Xosé Vicente, cuando la voz de una moza, a la qu’acompañaba un batería y un teclista, sacóme de les mio elucubraciones pa centrame nella y nel mio vermú. Rythm and blues y Marvin Gaye, con un “Son of the preacherman” mui sentíu; y dalgo de bailable rockabilly al que respondíen un par de pareyes danzantes, seguramente amigos de los artistas. Un conciertín pequeñu que nun importunaba les conversaciones de los parroquianos, avezaos al mal soniíu del local, única pega de la restauración espectacular de la obra de Manuel del Busto llevada a cabu nun va munchos años, cuando el café tevo al borde de la desapaición.

Güei tocaba cantante solitariu cola so guitarra, tamién con repertoriu variáu ente’l que me quedo con una versión de aquel Chan Chan de Compay Segundo; anque tamién me sobra tiempu pa fixame nel universu que m’arrodia mientes suena la música y voi dando sorbos pequeñinos al mio vermú. A la mio esquierda un mozu oriental armáu de tablet paez interesáu en sacar fotografíes, y, supongo, cargales na so rede social, mientes a la drecha una madura solitaria, tamién con tablet, vése asaltada polos so dos vieyos vecinos, que mediu la obliguen a entrar en conversación, polo que m’entero qu’ella ye amante de los cafés, a los que pelegrina pel mundiu, y el más añosu de los intervinientes vivió munchos años en Nueva York, como ella, colo qu’enganchen platica sobro l’asuntu de la ciudad de ciudaes. Nun ángulu, frente a min, una familia de cuatro xeneraciones alborózase al rodiu d’un carru de bebé que porta, supongo, al caberu de la saga. Y a lo ancho y llargo, ente les esbeltes, llistaes y ¿abullonaes? columnes d’esta vetusta casa xixonesa, afánense ellos y elles, los mozos y profesionales camareros.

A la fin, la llectura del periódicu, o’l vermú selmanal, pasen a un planu segundu énte los mileta detalles que t’ofrez esti universo minusculu que representa’l Dindurra. Ye lo qu’hai.

Raúl Suevos

A 2 díes vencíos de xunu de 2024

Torna en castellán en repdiv.blogspot.com

Creciendo a la rusa

 

La invasión d’Ucrania, de la que’l febreru pasáu se cumplieron dos años, va empobinándose haza’l peor de los pronósticos, l’enquistamientu, esto ye, una guerra d’atrición prolongada na que dalu de los contendientes ye a derrotar al alversariu pero, pel camín, produz una destrucción inxente, que nel casu del agredíu, Ucrania, dexa laminaes les infraestructures del país.

Nel llau rusu, a salvo pel momentu de los bombardeos escontra instalaciones civiles de tou tipu, gracies a que los ucranianos se cinquen a estructures militares o enerxétiques, por decisión propia y pol vetu de dalgunos países suministradores al emplegu de les so armes sobro territoriu rusu, les coses nun ye que vayan mui bien, y esta selmana ya tienen sobrepasao el mediu millón de baxes de combate, esto ye, muertos y feríos, según cifres d’Ucrania, que sí, tarán inflaes, pero aínda asina son llerciosos.

La situación descrita paez contradictoria col fechu de que la economía rusa vaya como un cohete que diría’l presidente de nueso, el doctor Sánchez; y ye que’l PIB crez entá más que’l d’España, que según l’antedichu, anque nun seya cierto, ye la que más creció na Xunión, y asina va siguir  l’añu viniente, que tampocu.

Pero en realidá nun hai contradicción; el señor Putin tien puesto al so país en mou economía de guerra, esto ye, el gruesu de los recursos va a alimentar el ministeriu de defensa y la industria axunta. Les reserves del país, engordaes previsoramente demientres dellos años por Putin, tánse inyectando nesa economía, tamién los ingresos de les ventes de productos enerxéticos, principalmente a China ya India. Toa la producción se dirixe a fabricar material de guerra, pa que seya destruyío nos campos ucranianos.

Tamién gran parte de la población masculina n’edá productiva va al mataderu ucranianu, dexando buecos descomanaos ensin cubrir nel texíu productivu rusu. Pero ellos tamién producen PIB, especialmente nes rexones más probes, zones fértiles pal reclutamientu, que ven agora llegar les pagues d’inutilidá física a unos, y de viudedá a otres, xenerando un espexismu d’esplendor económicu nesos llares. Pan pa güei…

Toa esa realidá tráxica lleva en volandes el PIB rusu, un pocu como’l nuesu, que, afortunadamente, ta lloñe de la guerra, pero que, con un turismu puxante y alimentao polos fondos de la XE, unos a fondu perdío y otros a devolver con interés nulu, permiten al nuesu gobiernu dopar la economía con tou tipu de subsidios, anque faiga tamién xenerar delda pública adicional, que yá van pagar los nuesos fíos, o los nietos.

Crecemos, en ciertu mou, a la rusa. Ye lo qu’hai.

Raúl Suevos

A 1 día vencío de xunu de 2024

Torna en castellán en repdiv.blogspot.com