El Barça y España

 

Confieso d’entrada’l mio escasu interés pol deporte del futbol, anque al tiempu reconozo que yá va abondo tiempu qu’atalanté que la inorancia n’asuntu talu dexábame fuera de gran parte de les conversaciones desendolcaes por varones españoles. Agora, tiempu nel que la muyer también tien entrao nesi contuberniu, paez que les coses del país siguen más o menos igual; futbol y política, nun hai más.

Con eses premises sigo l’actualidá del futbol con ciertu distanciamientu que me permite escapar de les pasiones qu’ello suscita; y cola política intento, seguramente con menos ésitu, siguir la mesma conducta. D’ehí que les vicisitues del Barça m’interesen vivamente, y reparo que, dende la primer presidencia del señor Laporta, les cosaes van de mal en peor nesa casa, casi a la par que la política catalana, con presidentes encarcelaos o imputaos, intervenciones intempestives de los mozos d’escuadra, y, lóxicamente, una actuación ca vegada más deficiente del equipu de futbol no nacional y lo internacional.

Nesa política populista llevada a cabu pelos dirixentes d’esa casa, la contratación de Xavi, gran figura del futbol nacional y del club, como entrenador, guetaba repitir l’induldable ésito que supunxo la llegada de Guardiola al banquillu; pero que la situación seya similar nun asegura que, con persones estremaes, el resultáu tamién lo seya; y el probe Xavi, con llimitaciones nidies nel so desempeñu como entrenador, tien dío, tres una lliga abandonada nel camín polos sos contrincantes l’añu caberu, de mal en pior, hasta’l puntu de declarar va yá dellos meses, nun xestu inéditu, que dearía’l banquillu a la fin de temporada, pa plasmu del mundiu del futbol.

Tiempu dempués, y con más penalidaes que satisfacciones, ayeri sosprendió al país col anunciu de que va siguir al frente del banquillu barcelonista, sacrificando la so pallabra en beneficio y a petición de la dirixencia blaugrana; dalgo que, ye de suponer, va agradecer la so afición, y dicen que tamién la de los sos históricos contrincantes.

Como l’universu ye entrópicu, ayeri quisieron los hados que’l nuesu presidente, el doctor Sánchez, conocíu polos so xestos efectistas y rompedores, anunció que se toma cinco díes de meditación trescendental pa decidir qué fae cola so vida, y de pasu la de los españoles, dalgo que va tener a bien comunicanos el lunes viniente, pos nello entren ciertes insinuaciones dimisionaries. Una situación novedosa pa España, y tamién pa Europa, que mos va tener en vilu a toos hasta esi momentu.

Cola campaña catalana en marcha, y viendo a Xavi, a mí dáme que tamos, una vegada más, énte un histrionismu más del doctor Sánchez. Ye lo qu’hai. 

Raúl Suevos

A 25 díes vencíos d’abril de 2024

Torna en castellán en repdiv.blogspot.com

La memoria de caún

 

Lleo güei nun mediu nacional la vivencia d’una muyer de San Sebastián, 40 años, a la qu’ETA privó va treinta y cinco d’una infancia feliz al llau de los so proxenitores, a ella y a la so hermana, y a los pás de los so pás. Toos ellos, especialmente les neñas, marcaos pol señalamientu posterior de los terroristes que xustificaron l’asesinatu de los so padres a la salida d’un bar del cascu vieyu “por drogadictos y maleantes”.

Al so entierru, casi ocultu, malapenes asistió naide, y por parte de la clas política namái un Gregorio Ordoñez que sedría tamién asesináu dalgún tiempu dempués. Yera la llei de fierro de los terroristes vascos, primero la muerte física y dempués la muerte social de los asesinaos y de los sos allegaos.

Esta neña, anguaño muyer adulta, algamó a colar de la prisión social de les tierres vasques, siempres cola veroña de creer lo que los ruxerux y murmurios d’una población de cobardes trescalara na so mente de neña desamparada, y tres años de periplu humanu per España y otros países, tornó a San Sebastián, xusto a tiempu pa tener accesu al sumariu que l’Audiencia Nacional ponía a la so disposición como heriede de los so pás.

Ellí constaba como, tres el tiru na nuca al so pá, la so madre, receptora de tres disparos, aínda agonizó al llau de la so pareya demientres unos cuantos minutos. Y tamién que tres los preceptivos anális a los sos cadávres nun s’atopó dalu rastru de droga nos sos cuerpos, porque el so pá yera un simple carpinteru que s’afanaba en sacar la so familia alantre, anque el so amor al rock, como a la so muyer, lu llevara a dexar los cabellos llargos y gastar chupa de cueru. Quiciabes motivu abondo pa facelos oxetivu d’esos grandes gudaris vascos.

Güei esta muyer trata de tirar p’alantre na ciudá que la vio nacer, y supongo que tendrá saltao nel so asientu cuando’l candidatu de Bildu, los heriedes políticos d’ETA, calificaba nuna entrevista a los asesinos de los so pás como grupu armáu. Unos asesinos aínda güei ignotos, pues el casu forma parte d’esos 367 entá por resolver. Ye lo qu’hai.

El casu ye que’l tiempu pasa y lo que cuenta ye l’interés eleutoral, el d’unos y otros, ente ellos el del partíu del gobiernu, más interesáu n’algamar sofitos parllamentarios que notra cosa, y pal que la única memoria que cuenta ye la de va ochenta años, pues esa distrae l’atención de les coses actuales, como esos asesinatos entá por esclariar, anque dalgunos seyan socialistes.

Raúl Suevos

A 17 díes vencíos d’abril de 2024

Torna en castellán en repdiv.blogspot.com

Terapies de café

 

Suelo averame de cutiu a media mañana a un café allegáu a casa, de los d’enantes, d’esos con gran porcentaxe de parroquianos diarios, o clientes sistémicos; veceros los nomaríemos n’Asturies. D’esos que caltienen una confianza d’años, complicidá, col guardián de la barra, que suel ser l’amu.

Na mio rutina afáyome nuna esquina, au lleo un de los periódicos de la casa mientes revicio esi café aviáu con afalagu nuna máquina italiana vieya, d’eses ca vegada más difíciles de ver. Dend’ellí, malapenes concentráu na miseria de la política nacional, nun puedo evitar observar y escuchar el grupu de muyeres mayores qu’ocupen un par de meses en frente de la mio posición.

Preside una señora, abondo llendada na so capacidá visual, si ye que nun seya ciega total; acompáñenla dos o tres colegues dependiendo del día, dalguna cola so asistente correspondiente de orixe hispanu americanu; y, a vegaes. tamién s’ayuden d’una silla andadora pa les que tienen la so movilidá amenorgada.

Al llau de la señora presidente, n’ocasiones, siéntase un señor de fisonomía particular. Paez un moteru d’esos de peli yanqui. Chupa negra, texanos negros, botes negres, camiseta negra, pelu tisoriáu a lo marine, con sienes tresparentes, y cadena colgando d’un llateral del pantalón. A vegaes acompáñalu un preadolescente cola mesma pinta, y aire d’adorar a quien paez el so pá.

El tipu duru, que suel pedir a voces una cerveza, resulta ser el fiu de la señora de vista precaria, y tres esa fachada, que pertenez a un conductor de la recoyía de basures nochirniega, escóndese una persona d’una tenreza estrema tantu cola madre, como col fiu, o coles amigues de la primera. Un tipu con unes carauterístiques humanes ensin dulda de grau superior, pero que los prexuicios que casi siempres llevamos enriba, como si d’una mochila imposible de descargar se tratara, faen que, na mayoría de les oportunidaes nun algamemos a decatanos de la calidá personal d’estos individuos.

La simple llegada del paisanu suel ser motivu abondo pa que la tertulia femenina cobre un impulsu inusitaú, con mayor baturiciiu conversacional y nel que les rises suelen ser un elementu que nun falta, y, anque enfrascáu na lectura del mio periódicu nun algamo a enterarme de les importantes cuestiones qu’ellí traten, nun me cabe la menor dulda que l’aparente moteru, del qu’ignoro si tan siquier tien motu, ye un artista de la sociología femenina, a lo menos pa estes señores que tomen el so café mañaneru nel llocal del mio barriu. Ye lo qu’hai.

Raúl Suevos

A 1 día vencíu d’abril de 2024

Torna en castellán en repdiv.blogspot.com

Muyeres mexicanes

 

Nun sé ónde s’entamó l’usu de la espresión feminicidiu, pero nos años caberos tenémoslo sentío o lleío en rellación con México, particularmente con Tixuana, ciudá cargada d’ecos d’aquelles películes del oeste tan enllenes d’estereotipos y terxiversaciones históriques. Ye lo qu’hai.

Ellí, en Tixuana, demientres dellos años, tiénse llevao a cabu un procesu silenciosu d’asesinatos continuaos que dio pie al neoloxismu feminicidiu, tres años de tapecimientu polos poderes públicos y los medios de comunicación, anque anguaño, nun creo que felizmente seya l’alverbiu fayadizu, la ciudá descendió al tercer puestu mexicanu nesa estadística horrorosa.

El casu ye que les muyeres mexicanes tienen sío siempres, a lo menos dende la fundación de la nación moderna pol xeniu de Hernán Cortés, y cola ayuda imprescindible de doña Marina, la Malinche, la base del país. Nun segundu planu discretu y malapenes intuyíu énte la fuercia del machu mexicanu, pero con un llabor de sofitu ensin la cuala la nación, que tan bien canten los Tigres del Norte nos sos pernomaos Corridos, yá tendría sío absorbía pol so vecín norteñu. La esencia de México reside nes so muyeres.

En xunetu va haber eleiciones presidenciales, y si un disparu nun lo enzanca, en México ya Hispanoamérica nunca se sabe, va ser una d’eses muyeres la que va sostituyir al pintorescu, por da-y un axetivu compasivu, Manuel López Obrador, pues son dos, Claudia y Xóchitl. La primera, posible ganadora de les presidenciales según les encuestes, va por MORENA, el partíu del presidente, y la segunda pola coalición opositora.

Dambes tán na so sesta década vital, con munchos años de desempeñu profesional brillante enantes d’entrar en política, la una nel dominiu de la inxeniería y la enerxía, y la otra nes tecnoloxíes de la información, dambes muyeres que se tienen fecho a sí mesmes, y con grandes responsabilidaes polítiques nos años caberos. Dambes una espresión de la bayura del universu femenín mexicanu.

Claudia Sheinbaum, la postulante de MORENA, ye fía d’emigrantes xudíos, el padre askenazi y la madre sefardí, y tres una carrera universitaria perbrillante ya investigadora, acabó como gobernadora del Distritu Federal, arrasando en cuantes primaries internes se tien presentao. Agora son les encuestes les que la dan como ganadora segura en xunetu, y, anque dalgunos temen la influyencia del pernomáu López Obrador, que a la so solombra tien desendolcao la so carriera política, dizme l’instintu, o quiciabes los años, que, una vegada nel Palaciu Nacional de la plaza del Zócalu, antigua casa de Moctezuma Zocoyotzin, va ser el so personal instintu de muyer política lo que va prevalecer.

Que viva México, ¡caraxo¡…y les so muyeres.

Raúl Suevos

A 2 díes vencíos d’abril de 2024

Torna en castellán en repdiv.blogspot.com

Ardanza, que tas nos cielos

 

Duldo qu’haya un llugar au s’entierre meyor que n’España, ye una tradición que llegao’l suspiru caberu, si yes una figura pública, nun digamos yá política, too seyan eloxos y panexíricos, de tala forma que, pal personal perteneciente a les xeneraciones mozes, si presten atención a les noticies de les grandes plataformes, lo que nel momentu anguaño nun paez ser el casu, arriesgense a pensar que’l fináu yera una especie de delegáu del apóstol Santiagu, unviáu pol mesmu pa iguar los desafueros d’España.

Nel casu de les figures de les artes, la asuntu va con matices puestu que se fai necesario estremar si l’entierráu pertenecía a lo qu’enantes se nomaba “de la cáscara amarga”, es ye, d’esquierdes, anque nun sé por qué la RAE-y alxudica un “d’idees avanzaes” que nun dexa de chocame, que nel so casu la despedida pasa a alquirir connotaciones de duelu nacional, con tantu de ditirambos, laudatios y aponderemientos, como vimos nos tiempos caberos con dalguna figura que nun voi citar pa evitar dar carnaza a eso que nel spanglish que mos invade llamen haters. Dalgo que contrasta coles despedies de tonos apagaos que recibieron, por exemplu, Julián Marías, el meyor escritor de la so xeneración, y l’asturianísimu Arturo Fernández, dambos distinguíos por nun callase nin achantase.

Na política recuez el casu de Rubalcaba, aínda güei sacáu en procesión polos mandamases socialistes cuando-yos convien, magar que a él se deba la definición de gobiernu frankestein referíu al del doctor Sánchez. Nun importa, yá ta muertu, y puede servir pa tremolar otra vegada la so imaxe cuala bandiera y con ello distrayer l’atención d’asuntos más terrenales. El so funeral tevo una carga d’aponderamientos direutamente proporcional al odiu entrañable del so secretariu xeneral. Ye lo qu’hai, Y’España.

Con Ardanza quedéme un pocoñín güeyipláticu. Paeciera qu’él fuera’l factótum de la evolución pacífica del País Vascu. Un pergrande líder políticu dice toos los que lu conocieron, pero a min, vienme la imaxe del so patrón nel PNV, Arzallus, el que recoyía les nueces cayíes del árbol que los etarres movíen, col so secretariu Eguibar, troglodita salío d’una cueva guipuzcoana. Difícil que, con esos dos vixilando, Ardanza tuviera iniciativa política. Eso sí, reconozo-y les bones formes.

Foron años de chombu, con una disminución sele de los asesinatos d’ETA, que coincidieron col mandu del Xeneral Galindo n’Inchaurrondo, pero eso nun cuenta; yá se sabe que con ETA acabó Zapatero. Ye lo que sigue habiendo.

Raúl Suevos

A 9 díes vencíos d’abril de 2024

Torna en castellán en abellugunelcamin.blogspot.com

Franco, esi paisanu

 

Esi yera’l títulu d’una película documental que Xosé Luis Sáenz de Heredia realizó nel 1964 con ocasión de cumplise 25 años de la fin de la nuesa Guerra Incivil. El direutor, al paecer, un de los grandes d’aquel entoncenes, yá tenía realizao “Raza”, una película d’esaltación nacional que tenía como guionista al propiu Franco, y según investigaciones posteriores, contaba con dirixir, posteriormente, otru documental dando cuenta de los años caberos del xeneral Franco.

La que mos ocupa tevo como mentores al aparatu dirixente del Ministeriu d’Información, dirixíu por don Manuel Fraga, que, anque dalgunos-yos cueste creélo, aportara al puestu con fama d’aperturista, y que la so mano s’atopaba detrás del indulxente tratamientu que les dreches republicanes recibieron nel documental, dalgo que foi mui criticao polos cuadros más inmovilistes y tradicionales del réxime. Ye lo qu’hai.

 El casu ye que, como tolos mortales, el xeneral morrió, de vieyu, anque non pacetiblemente; y, anque anguaño tantu los sos siguidores del 36, como los sos antagonistes, tán toos desapaecíos, sigue siendo bandiera de dalgunos, anque non, como pudiera pensase, d’aquellos teóricamente más allegaos col so pensamientu. Si bien, siendo gallegu, ye difícil que naide lu conociera verdaderamente.

Lléis de Memoria hestórica enantes, y democrática dempués, y magar los votos algamaos nel Congresu, paecen más un actu de revanchismu que non un exerciciu cabal de llimpieza y compensación moral a los que, naquella dómina desdichada, sufrieron violencies, persecución o cualquiera otra aición negativa en razón de les sos idees polítiques; sobremanera porque namái se contempla un de los bandos implicaos.

Ye chocante, y paez dir pareyo cola esqualidez de la nuesa clas política, toa ella, que les andanaes sucesives amparaes neses lléis coincidan siempres con periodos eleutorales, y ye que, énte la falta d’una aición política correuta, con oxetivos que s’empobinen a meyorar la situación de la ciudadanía como individuos, y de la nación como ente internacional, siempres cae bien tener a mano unos güesos, anque pel momentu seyan anónimos, p’allevantar, una vegada más, esa bandiera del antifranquismu, aneya yá de más d’ochenta años, pero que sirve pa distrayer de la problemática cotidiana, y de los cientos d’asesinatos recientes nel País Vascu aínda por resolver, y au ye probable que ganen les eleiciones vinientes los heriedes de los victimarios d’ETA, blanquexaos pol nuesu gobiernu anguaño.

El paripé, nun merez otru nome, que’l nuesu presidente de gobiernu mos regaló’l xueves nel Valle de los Cayíos nun tien como oxetivu la dignidá de los muertos sinon la distracción de los votantes d’otres noticies más dañibles pa él y el so partíu.

Raúl Suevos

A 5 díes vencíos d’abril de 1954

Torna en castellán en repdiv.blogspot.com

Pollos yanquis y municiones cubanes

 

Paez que, por fin, y gracies a los bonos oficios del presidente checu, un vieyu xefe del Estáu Mayor del so país, la munición pa l’artillería ucraniana escomecipiará a aportar nos frentes de batalla, lo que va contribuir ensin dulda a camudar la situación anguaño, favoratible pa les armes ruses.

La operación, llevada en gran secretu poles implicaciones polítiques pa los posibles protagonistes, va meyor de lo esperao, y, en llugar del millón d’oxives previstu y pagáu pola Xunión Europea, dicen que va algamar el millón y mediu, gracies a la “cooperación” de dalgún supuestu aliáu de la Rusia de Putin. D’ehí’l secretismu en cuantu al orixe y allugamientu d’esos arsenales.

Nos mio díes caberos en L’Habana, nel branu del 2013, pude güeyar personalmente’l nerviosismu de los agregaos militares norcoreanos, dalgo que, confiésolo, nun me dio pa pensar nel so posible motivu, hasta que, yá tornao n’España, saltó la noticia del apresamientu d’un barcu cargáu de repuestos militares cubanos con destín a la industria militar de Kim Jong-un. Asina ye como funciona’l negociu del tráficu armamentísticu.

En rellación cola munición pa Ucrania contamos con dellos candidatos posibles ent’esos supuestos “amigos” de Putin dispuestos a traicionalu, anque unos son más improbables qu’otros, como la propia Corea del Norte, suministradora principal de Putin actualmente, si bien con munición de calidá deficiente según les noticies. Pero esisten otres posibilidaes ente aquellos más necesitaos, por razones polítiques o económiques, o dambes.

Nesti apartáu tenemos dos opciones posibles, países con tradición d’armamentu soviéticu, aisllaos políticamente y necesitaos de meyorar les so rellaciones colos Estaos Xuníos, que sedría’l patrocinador de los bonos oficios checos énte la paralís provocada en Washington polos republicanos dominantes nel Congresu. Venezuela y Cuba son les opciones de mio.

A min pídeme’l cuerpu que seya Cuba, que merca’l pollu a los yanquis per milenta tonelaes y necesita imperiosamente que Biden allevante la etiqueta que Trump-y llantó na semana cabera de presidencia como País patrocinador del terrorismu, dalgo qu’afeuta tarreciblemente a les rellaciones entrambos, particularmente al fluxu de turistes norteamericanos, güei desapaecíos de la islla.

La munición de 152 mm, d’orixe soviéticu y tan apreciada por Fidel, que vaya vusté a saber en qué estao de conservación tará, puede convertise agora nuna palanca pa desbloquexar les rellaciones cola alministración yanqui de forma que Raúl Castro pueda algamar el so oxetivu de morrer na cama, dalgo que l’hambruna del país puede echar a perder, como amuesen les manifestaciones caberes de Santiago de Cuba. Ye lo qu’hai.

Raúl Suevos

A 19 díes vencíos de marzu de 2024

Torna en castellán en repdiv.blogspot.com