Seis atunes coloraos, seis

 

El mío deporte favoritu ye’l golf, prautica que realizo davezu nesa maraviella que ye’l campu municipal del Tragamón, que sosprende, por esa condición de municipal, xunto al de La LLorea, a tou foriatu que lu visita; y tamién poles sos otres carauterísticas pal desendolcu de l’actividá, que son escelentes.

Suelo dir alló delles mañanes ente selmana, y esti branu, como nos caberos, la conversación recayía no seco y duro que s’atopaba’l campu, dalgo qu’unos y otros, achacábemos a la falta de llovíos demientres los meses braniegos, si bien nel pasáu nun asocedía tan de xacíu. Al fenómenu, cabría añader, y esto ye apreciación personal, que yá nun hai roxada nos meses de branu. Yá naide sal pela nueche cola chaquetina puesta, o’l xersey colgáu al llombu, pa prevenir aquella “roxada” incomoda, más fina que l’orpín, pero qu’acababa por moyar la mesa de la terraza, y que tamién llegaba a los praos del Tragamón, que cola so humedá yeren a caltener el verdor demientres l’estivu.

Esti añu, amás de la desapaición d’esi fenómenu, atopámonos col arenal de San Lorenzo zarráu a vegaes pol aportar de carabeles portugueses, con tanta frecuencia que yá’l personal conoz la bandera colorada qu’avisa de la presencia d’esi animal antipáticu. Una frecuencia y cantidá mui superior a la de los años caberos. Ello débese, según los espertos, al calentamientu de les augues del Cantábricu, dalgo que los bañistes constaten al entrar nes otrora fríes de les nueses playes.

Son indicadores d’un cambéu climáticu del que vienen sollertando infinidá d’estudios, munchos de los cualos faen mención a la influyencia que l’aición humana tien tenío n’ello, y que los gráficos d’emisión d’esi gas, el CO2, vienen amosando dende que s’estudien científicamente. Pero l’asuntu nun paez importar al personal, pero, los xixoneses, a lo menos, deberíen preocupase. Yo fáigolo.

Fáigolo porque, amás de les señales mencionaes, esti branu pescaronse seis atunes coloraos en frente de les nueses costes, na zona de Cuideru creyo, con un pesu que va de los 160 a los 220 kg, esto ye, unos animalinos importantes. Y dalgún va dicir ¡albricies¡ vamos poder comelu más frescu y baratu, porque neso de la gastronomía les modes tamién faen estragadures, y equí, ente nós, tenemos munchu snob de la mesa que te da una conferencia sobro les partes d’esi animal en cuantu que te descuides, escaeciendo que’l bichu come xarda, sardina, bocarte, calamares y pulpos, que ye lo qu’alimenta al nuesu bonito del Cantábricu, y que, anque seyan parientes, el so mayor tamañu va facer que’l nuesu se vaya más al norte, poniendo en peligru la costera y faciendo subir el preciu de la ventresca, qu’esti añu va a 45 euros la ración en restaurante. Ye lo qu’hai.

Raúl Suevos

A 18 díes vencíos d’ochobre de 2026

Torna en castellán en repdiv.blogspot.com 

El Solariegu de los hutíes

A España nun se-y tien dao mal la industria de la Defensa. Nunca, en dómina moderna, fuimos nel pelotón de la tiesta, pero sí nel grupu perseguidor, y ehí mui bien asitiaos. Nel nuesu haber ta la invención del autoxiro, y tamién el somarín, anque, en dambos casos, la falta de visión política y de capacidá industrial dexaronmos namái l’alcordanza de lo que pudo ser. Ye lo qu’hai, supongo.

Esiste, per embargu, un aspeuto nel que siempres fuimos punteros, enantes y agora, y ye’l de les raciones de previsión; eses caxines que’l combatiente lleva, un pocu como eses bolses que-yos dan a los ciclistes metanes la etapa, y que, como ellos, el soldáu aína a repartir nos estremaos compartimentos de la so mochila.

Poles de nueso dánse bofetaes los nuesos colegas internacionales, y nes bases compartíes n’operaciones esteriores suelen ser oxetu de trapichéu, como les peticiones desesperaes pa ser invitaos pol continxente español a les paelles que la nuesa xente suel facer los domingos. Sicasí, convien sorayar que la calidá de les raciones vien de lloñe.

Na mío dómina mozu, yá tíen llovío, la ración, de la que nun recuerdo tola composición, tenía una llata de estofáu de carne de vacunu de calidá estraordinaria; tamién una de sardines que nun convencía a tol mundiu pero que, con un furacu fechu cola bayoneta y un cachu de tela, camudábase nun candil duraderu; eso sí, abondo fediondu.

Con too, la pieza reina de la caxina yera’l botellín de cognac Solariegu, recuerdu del Saltaparapetos o Asaltatrincheres que dambos bandos repartíen enantes del combate demientres la nuesa guerra incivil. Una prautica común en tolos exércitos a lo llargo de la historia y que, na Segunda Guerra Mundial yá entamó a desplazase haza l’usu de pastilles distintes, con especial interés nes anfetamines.

Ayeri fueron noticia, una vegada más, los hutíes de Yemen. Guerreros que yá se les tuvieron tieses coles avanzadilles de Mahoma, y que siempres tuvieron fama de indómitos ya inconquistables, poro, quiciabes, se dediquen anguaño a matase ente ellos; unos como delegaos de Riad, y los otros de Teherán.

La información daba cuenta del bombardéu del palacio presidencial d’Aden, proclive a los saudíes, polos hutíes partidarios d’Irán; ya illustrábalo una semeyaa con un grupu de fieros guerreros, de güeyos encendíos y un bulto llamativu n’un de los sos papos.

Yera’l kat, una planta arbustiva de propiedaes paecíes a la fuella de coca qu’alló consume’l 80% de los varones y munches muyeres, y a min viénome l’alcordanza del Solariegu y vieyes histories de batalles.  

Raúl Suevos

A 17 díes vencíos d’ochobre de 2026

Torna en castellán en repdiv.blogspot.com 

 

Xusticia y campos de golf

 

Supongo que van pensar que son dos conceutos, los del títulu, difíciles de conciliar, pero convien nun escaecer que nada hai imposible nesti mundiu tan variopintu, y ca día los fechos, en forma de noticies, mos lo confirmen. Como la que m’animó a escribir estes llínees.

Vien la noticia de Washington, la capital del imperiu, ellí onde reina l’ogru naranxáu, que, ente otres carauterístiques, nun tan pacífiques como la que mos ocupa, ye un gran aficionáu al golf, y de nivel según el so hándicap, anque ellí, los EEXX, tamién ye conocíu por facer trampes, y xugar nos sos propios campos, lo que facilitaría descomanadamente la consecución de les sos fazañes deportives.

El casu ye que, ente los sos embagos, non tan sonoros como la so sala de baille na Casa Bianca, púnxose-y qu’un campu de golf público -perteneciente al sistema de parques federales- tien que ser reformáu pa poder xugar torneos internacionales. Una idea qu’asina, de primer mano, nun paez tan negativa, pero que tien cabreao a los xugadores veceros, que lo faen a precios mui económicos pa lo qu’ellí hai que pagar pa xugar al golf, y que ven que cola reforma esta posibilidá díbase acabar pa ellos. Al quexume tamién se xunen les familias que pululen pel parque -porque d’un parque se trata- demientres los fines de selmana. L’asuntu tien acabao con denuncia n’un tribunal federal.

Ellí una xueza decidió parar les reformas mientes estudia a fondu l’asuntu, y l’alministración de los parques dixeron-y que tienen que facer mantenimientu, a lo que la so señoría retrucó que sí, pero que l’avisaran con tiempu abondo pa ver si procede o non. Y equí entama’l baturizu.

La señora xefa del asuntu pela parte gubernamental únvia-y a la xueza un escritu’l viernes, cinco minutos enantes de zarrar l’horariu oficial, dando-y cuenta del derribu de “unos cuantos” arboles, y el sábado ponense a talar, hasta trescientos, dicen. Y tiénse liao parda, como diría una famosa madrilana.

La xueza ta qu’echa fumu, pero a min vienme, una vegada más, que’l poder xudicial, ellí, equí y aculló, ye’l recursu caberu del ciudadanu, y siempres ta a la brega col poder executivu, con independencia del sistema políticu del que se trate. Como equí, onde les eleiciones vinientes va dexar nel limbu la reforma que Bolaños quería imponer, y que diba eliminar a los xueces instructores, dexando esa fase nes manes de la fiscalía - ¿De quién depende la fiscalía? Pues eso- y que, “presuntamente”, dexaría ensin llegar a xuiciu a Begoña y a David, la esposísima y el hermanísimo, Ye lo qu’hai.

Raúl Suevos

A 14 díes vencíos d’ochobre de 2026

Torna en castellán en repdiv.blogspot.com