Les Terceres Españes

 

Salvador de Madariaga ye, na mio opinión, quien meyor tien sabío describir la España del sieglu XX, especialmente na so primer metá, y les circunstancies, personalidaes, odios y amores que conduxeron a la desgraciada Guerra Incivil qu’afaró la xeneración de los nuesos pás y güelos. Nel so magnu ensayu, España, adxudica parte de la responsabilidá a la incapacidá de los líderes políticos d’entoncenes p’articulase en redor a lo qu’él nomaba la Tercer España. Una faza de población difusa y amplia que coincidía nel so refugu de ciertes actitues, que se podrían identificar col radicalismu políticu, y que, pela cueta abrazaríen el moderantismu. Ensin escaecer, de xacíu, que los ismos casi siempres zarren la trampa de la indefinición nes sos esencies.

Sicasí, como la historia mos cuenta, les sos teoríes, formulaes a posteriori, por otra parte, nun furrularon, y la polarización de los estremos conduxo irremediablemente al conflictu ente hermanos. Dalgo que güei debiera enseñamos, si non a la ciudadanía sí a los cuadros políticos, lo que puede asoceder cuando les sociedaes son sometíes a más tensión de la que pueden soportar. Anque paez que non, que nun deprendemos.

Esa Tercer España, que n’años recien pudiera identificase con opciones estremaes ya intentos políticos pa articulase en forma de partíu políticu, como’l Reformista de Roca y Garrigues Walker, va yá dellos años, o los más recien de Progresu y Democracia de Rosa Díez, o’l caberu intentu del Ciudadanos d’Alber Ribera, foron barríos del panorama políticu con más o menos fortuna y celeridá, y nel so llugar, faltos d’esa bisagra que debiera articular el bipartidismu nel que mos desendolcávemos, apaecieron los populismos estremos, a drecha ya esquierda, y como si siguieren la doctrina d’aquel nefastu Zapatero al qu’un micrófonu abiertu pilló celebrando l’incrementu de la polarización.

Anguaño vemos que son esos estremos, d’un llau y del otru, los que condicionen les polítiques de los grandes partíos, dambos medrosos y como si yá nun foran a responder a les inquietues del votante. Y lo mesmo asocede na nuesa vecindá, na que Francia parece ser el faru de la polarización, con Melenchón y Marine Le Pen marcando’l ritmu de la vida política. Un Nigel Farage nel Reinu Xuníu dispuestu a asaltar el poder, o una Alianza per Alemania que, xunto a Die Linke, asusten a los moderaos xermanos. La polarización, énte la falta de propuestes curioses y racionales, vende’l so productu.

Yá nun ye una Tercer España, tamos énte un panorama de varies Españes, como siempres, anque agora, paecen ser les de los estremos les que deciden el camín a seguir. Ye lo qu’hai.

Raúl Suevos

A 2 díes vencíos de noviembre de 2025

Torna en castellan en repdiv.blogspot.com

El Tacu doráu mexicanu

 

Ún de los platos más pernomaos de la cocina mexicana ye’l Tacu doráu. Una tortina fina de pasta de farina doblada y rellenada de carne picada de xiata o de pitu y dempués frito n’aceite. Tamién se come nos Estaos Xuníos au la emigración del sur tien llevao, amás de la fuercia del trabayu, la so gastronomía rica. Y tamién el TACO se tien convertío nel llamatu más usáu pa referirse al presidente yanqui anguaño, al que yo prefiero calificar como ogru anaranxáu.

Lo de TACO viene d’una expresión coloquial, Trump always chicken out, algo asina como que Trump siempres s’arruga, referío a les sos competencies negociadores, en les que, yá dende la so primer presidencia, y anímolos a recordar el alcuerdu nefastu colos Talibanes, tien amosao cómo detrás de les sos manifestaciones altisonantes, acaba siempres por echase atrás énte los antagonistas grandes. Sí, ya lo sé, cola Xunión Europea nun paez que tenga sío asina, quiciabes porque la Xunión nun ye tan grande como mos pensamos.

Vien esta introducción a cuentu del so aconceyamientu con Xi Jinping, del que torna balagloriándose d’un gran alcuerdu pero que los analistes califiquen como de mui pocu algame, tanto no acordao como na so posible lonxevidá. Y ye que los yanquis paecen nun deprender de la historia, nin siquier de la propia, pues cabe recordar que foi Nixon, cola so apertura, quien dio ales pa que China saliera del marasmu creáu por Mao, y dempués sedría Bill Clinton quien-yos abriera la puerta a la Organización mundial del comercio, na qu’agora son capos.

El propio Trump, coles sos menacies midies y semialcuerdos de la primer presidencia, encargóse d’acelerar la fuxida haza alantre de Xi para que Huawei se tenga desarrollao hasta’l xigante que ye güei, con sistemes d’intelixencia artificial que desafíen, en dellos aspeutos, la supremacía norteamericana. Ellos son, los yanquis, los responsables del esbarafuste mundial nel que mos atopamos, col so presidente actuando como científicu llocu, que promete maraviyes pal so país, o una cierta parte d’él, pero que como contraparte, aporta inestabilidá al restu del mundiu, y esti alcuentru con Xi nun ye más qu’una amuesa.

Los tacos mexicanos son apreciaos en tol mundiu, pero esti TACO, que los estadounidenses escoyeron pa que dirixa los sos destinos, debiera informase enantes de viaxar, que los chinos d’eso saben muncho. Ellos tienen los sos wontons fritos, que dicen tán saborgosos, y saben cómo tratar cualquier tipu de comida lixera, sin medrana a pasar dempués una mala dixestión, dalgo que, lo que ye güEI, nun hai que descartar nel caso del ogru anaranxáu tres tres trimestres de presidencia. Ye lo qu’hai.  

Raúl Suevos

A 31 díes vencíos d’ochobre de 2025

Torna en asturianu en abellugunelcamin.blogspot.com