N’Italia acaben d’aprobar una llei, pendiente de referéndum,
de reforma de la xudicatura, na que se separta a los xueces xudicantes d’aquellos
instructores. Esto ye, qu’estos caberos, qu’ellí dicin-yos procuradores, si bien formen parte n’igualdá
de la carriera xudicial, van ser cola llei ñueva una rama absolutamente separtada,
anque de facto yá lo yera, pues ente aquellos xueces qu’escoyíen dedicase a la
instrucción, malapenes había vuelta
atrás, anque pudieran facelo y regresar colos sos collacios a los tribunales xudicantes.
L’asuntu, como equí, y magar ser aprobao na Cámara pola
mayoría del gobiernu y dalgunos más, tien atopao ellí el refugu de la
esquierda, que diz que los xueces van perder independencia, si bien la mayoría
del cuerpu xudicial nun punxo dala oxeción. Entós ¿au tá’l problema? Yo nun lo
veo, al contrario, paezme un avance na direición bona.
El megollu de la llei ñueva ta en que les rames agora
separtaes van cuntar cauna con un CSM, conseyu superior de la maxistratura, el
nuesu Conseyu xeneral del Poder Xudicial, que nel casu italianu va cuntar con
mayor independencia del de nueso pues ellí namái un terciu de los sos
componentes va ser escoyíu pola Cámara, supónxe que ente xuristes –xueces, lletraos
y calderagos- de nivel contrastáu; y el restu, y ehí ye onde s’alluga’l
problema pa dalgunos, van ser insaculaos –pallabru d’usu casi escaecíu y que
quier dicir elixíos per una mano “inocente” d’una bolsa piesllada- pente medies
métodu modernu y ente aquellos miembros de la xudicatura, pa cada rama, coles
carauterístiques requeríes. Un métodu qu’acaba coles “cuotes” pa les
asociaciones o los partíos políticos. Esto ue, o a lo menos ue lo que me paez,
que se gana independencia.
La ogresa Meloni, femenín d’ogru que gueté na RAE pa nun me
pillar los deos cola tecla, al paecer, llevabálo en programa cuando nun yera
más qu’un partíu minoritariu, y agora que dirixe’l gobiernu que lleva camín de
convertise nel más llonevu de la República nun sé-y ocurre otra cosa que caltener
les sos promeses ¡Habráse visto¡
Equí ‘l lacayu sanchista d’apellíu Bolaños tien presentao una
propuesta de llei, que nun creyo que llegue nunca a aprobase, na que tamién se
busca esa dixebradura, pente medies la eliminación de los xueces instructores,
y dexando tou esi aspeutu nes manes de los fiscales, que decidiríen, en
definitiva, qué ye lo que merez l’apertura d’una instrucción y lo que non, y
too ello calteniendo la dependencia orgánica del gobiernu. Imaxínenselo.
Va a resultar que Meloni agora ye un faru de lluz
democrática. Ye lo qu’hai.
Raúl Suevos
A 1 día vencíu de pallares de 2025
No comments:
Post a Comment