Nes vieyes xeografíes escolares nun esistía el conceutu actual d’Eurasia, simplemente se cuntaba colos Montes Urales, esa descomanada cadena montañosa que va dende’l Círculu Polar, alló nel mar de Kara, hasta desapaecer nes llanures de Kazastán, 2500 km al sur, y enantes de llegar al Mar Caspio. Un accidente xeográficu que nunca sirvió p’actuar como barrera, pues la so altura mayor nun algama a los 2000 metros, y percima d’ella saltaron ensin problemes los caballos mongoles de la Horda d’Oro. Quiciabes poro l’Imperiu rusu, en cuanto tomó conciencia del so poder, avanzó imparablemente haza l’Este hasta saltar sobre Bering y apoderase d’Alaska. Había qu’asegurar un colchón territorial a la madre Rusia.
Esos Montes Urales, definíen lo que yera Europa, al oeste, y lo que yera Asia, al este, y, pa nós, hasta los filósofos, como Ortega, se referíen a ellos como la frontera cabera d’Occidente: “Europa va avanzar cuando vea asomar la coleta d’un chinu sobro les cumes de los Urales”, añediendo como elementu secundariu “o se produza una convulsión nel magma islámicu”. Sicasí, pa nós, los europeos, guapos y espabilaos, de la Europa tradicional, toes aquelles estepes del más alló de, quedabenmos mui llonxanes, magar los esfuercios de la Xunión Soviética enantes, y Vladimir Putin agora.
Cola invasión d’Ucrania, equí cerquina, casi nel nuesu patiu traseru, entamamos a espertamos, inclusive llegamos a ser conscientes, pola actitú de Biden enantes, y de Trump agora, qu’al Imperiu lo que-y preocupa ye’l Pacíficu y el Oriente Llonxanu, China. Pero, siempres hai un peru, dende oriente alimentase la bederre maquina terrorista de Putin. Dende ellí aportáron-y l’añu caberu millones d’oxives d’artillería y cientos, quiciabes mileta misiles balísticos. Dende Corea del Norte, y tamién repuestos pa la industria militar dende China. Los Urales siguen ensin ser barrera, y el Transiberianu lleva más d’un sieglu xuniendo Europa, la de Rusia, col Pacíficu.
Na semana cabera, daquien, imaxínense vustedes quién, tien volao un importante tramu de la vía férrea transiberiana, dexándola inservible demientres dellos díes, quiciabes una selmana, y afeutando gravemente al fluxu loxísticu rusu, especialmente al militar qu’alimenta la invasión d’Ucrania. Y esto vienmos a demostrar que, en ciertu mou, la guerra d’Ucrania ye yá una guerra mundial que mos afeuta a toos, y especialmente a los europeos, poles nueses múltiples fronteres cola ominosa Rusia de Putin, convien que los nuesos gobernantes lo tengan en cuenta.
Raúl Suevos
A 17 díes vencíos de pallares de 2025
Torna en castellán en repdiv.blogspot.com
No comments:
Post a Comment