La batalla golfística de Long Island

 

Cuando’l personal viaxa a Nueva York lo habitual ye nun salir de Manhattan. Yo creo que lo más lloñe qu’algamé foi a la so parte alta, au s’atopa la Hispanic Society y la Visión d’España de Sorolla. Casi naide atraviesa’l Puente de Brooklyn, por mui peliculeru qu’ésti seya, y el casu ye qu’ellí, nesi barrio anicia esa islla, abondo llarga, d’ehí’l so nome, 190 kilómetros, y que cuenta, pa lo que mos interesa, na zona conocía como bahía de les ostres, con una instalación golfística nomadada Bethpage, que ye onde acaba de celebrase la Ryder Cup d’esti bieniu.

Ye la islla un llugar con historia bélica abondo, y tamién mui europea, pues aquello, que yera tarrén de los algonquinos, foi socupao por puritanos holandeses, anque ente ellos la mayoría yeren franceses hugonotes escapaos tres la matanza de San Bartolomé. Ellí, en Long Island, les engarradielles y matances dábense davezu, hasta que la cosa llegó a mayores na guerra anglo-holandesa, perdía polos segundos, que cedieron el territorio a los fios de la Gran Bretaña, qu’ellí al llau impulsaron l’esporpolle de Nueva York; y ellí tamién se celebró la batalla ente independentistes, al mandu de Washington, y realistes, ganada polos segundos y que faría qu’estos territorios fueren los caberos en ser abandonaos polos casaques coloraes.

La batalla d’esta selmana foi incruenta, pero mui dura, con dos primeros díes nos que los europeos paecíen afarar, un domingu que s’entamó con espectatives de traxedia pa los yanquis pero que, a lo llargo de la tarde, púnxomos de los nervios a los europeos, con un públicu que paecía futboleru. Y ye qu’esta competición, na que Europa xuega como un todu, consigue que los sos protagonistes, rivales a lo llargo de la temporada, acaben en llágrimes cuando s’algama la victoria; como ayeri, na que pudimos güeyar a tipos supuestamente axataos, como McIlroy, Lowry o Olazabal, fundíos d’emoción.

A mín, qué quieren que-yos diga, prestárame ver al nuesu Sergio García, que faltó per segunda vegada, xunto a Rahm, y alegróme que’l triunfu de nueso s’encimentara nel xuegu por pareyes, lo que da aínda mayor sentíu al conxuntu. Y too ello nun campu preparáu por los de casa, que deben tar rabiando, pa favorecer a los de so. Anque tamién debo dicir qu’eché en falta más simboloxía europea nos conxuntos lucíos polos nuesos –entá recuerdo la maraviosa vestimenta de les moces de la Solheim- quienes, pa rematar, adornaronse coles sos banderes nacionales na entrega del troféu, dexando de llau la europea. Una pena.    

Raúl Suevos

A 29 díes vencíos de septiembre de 2025

Torna en castellán en repdiv.blogspot.com

Alló pel Monte Barro

 

En ca requexu d’Italia esiste la posibilidá de llevase unu una sorpresa, xeneralmente prestosa, y de cutiu estraordinaria, sobremanera si se trata de naturaleza y llugares; y güei tocaba visitar el monte Barro, una montaña de ciertu altor, 920 mts, que tien la particularidá d’agospiar na so parte superior una vieya ermita qu’anguaño ta tresformada en centru de natura y escursionismu, y que se la conoz como Eremo Monte Barro, nel cordal que separta la zona de los llagos de Lecco, espectaculares, y los de Galbiate, non menos esplendidos, y villa esta cabera au mora’l grande Adriano Celentano dende va yá abondo d’años.

El monte ta cubierto de vexetación exuberante, ente la que destaquen les mases de castaños, güei cargaos d’oricios y a puntu pa la so recoyida, y mientes ascendemos pela sinuosa y estrecha carretera, escenariu habitual de los munchos ciclistes aficionaos que pululen pela zona, observo los carteles que señalen les estremaes rutes pa senderistes. El día ta fresquino, les primeres borrasques serondales yá tienen llegao, con inchentes en dellos casos, y, una vegada arriba, subímonos al techu miradoriu del restaurante dende onde se puede güeyar la vista maraviosa de la zona de Galbiate haza’l sur, coles torres del centru de negocios milanés al fondu, nesti momentu azotaes por una tormenta. Dempués xiramos haza’l norte y tomamos una sienda curtía en subida que mos lleva hasta un miradoriu que domina los dobles llagos de Lecco, col so respaldu ablucante de montañes alpines, que aínda nun pueden cuntar col adornu nivosu que les espera nos meses vinientes. Dende ellí l’estomagu reclámamos la ruta del restaurante.

El bar trattoria, pues d’eso se trata, cuenta con un menú cencieillu pero contundente, típicu pa senderistes y semeyantes. Entamamos con un platu de la zona, pizzocheri allá valtelinese, esto ye, pasta del tipu que señala’l nome, acompañaos d’acelgues y patates, condimentaos con mantequilla, y quesu al gustu en platín aparte. Una bomba calórica y sorprendente, pues les acelgues dan-y un gustu diferente a la mayoría de pastes.

A esti primer siguió-y un stracotto de cinghiale con polenta, esto ye, estofáu de xabalí con polenta -esa especie de pure a base de farina de maíz y qu’a mín préstame muncho- que taba verdaderamente esceicional y al qu’acompañó un vinu tintu de la casa que nun taba nada mal. Namái quedaba’l postre, que güei yera un tiramisú caseru de los qu’únicamente s’atopen en llugares d’esta mena. 

Quedaba piesllar la pitanza, y ello fue con un café y, ye lo qu’hai, una grappa barricatta, esto ye, aneya, conmeniente pa una bona dixestión.  

Raúl Suevos

A 24 díes vencíos de septiembre de 2025

Torna en castellán en repdiv.blogspot.com 

La cuestión palestina desmádrase

 

Paso dellos díes na Lombardía visitando a la familia y per mui pocu llíbrome de situaciones accidentaes na ciudá de Milán. Primero cola fuelga xeneral y manifestaciones convocaes pola esquierda y sindicatos pa protestar pola destrucción, de tou tipu, causada pol Exércitu israelí en Gaza, y que, na capital milanesa, desembocó nuna batalla campal y asaltu a la perguapa Estación central de la ciudá, obra, a éstes, de Benito Mussolini, y a la que los italianos nun camudaron nin una llámpara. Escenes caótiques y preocupantes.

El día dempués, un nubifragio -asina nomen ellí a lo que n’Asturies conocemos como nuberu- soltó tanta auga en tan pocu tiempu que’l ríu Seveso abandonó el so calce, anubriendo parte de la ciudá y de la provincia. Ye lo qu’hai, tiempu y manifestaciones suelen ser incontrolables.

Mentanto Meloni andaba per Nueva York, por aquello de l’Asambleya anual de la ONU, y como a ella van-y bien les encuestes eleutorales, non como a otros, descolgose anunciando que va proponer a la Asambleya italiana’l reconocimientu del Estáu palestín, a condición de que Hamas entregue los rehenes qu’ainda caltien y abandone la Franxa de Gaza. O lo que ye lo mesmo, que pasa del asuntu y de la oposición.

Y ye qu’a Giorgia van-y bien les coses. El país crez, non muncho, pero crez. Y la so coalición conservadora tamién lo fai, especialmente’l so partíu, Fratelli di Italia, y, pela cueta, la esquierda nun llevanta la tiesta, poro abracen causes como la palestina, que-yos lleven dempués de los 60 policíes feríos en Milán, a tratar de desmarcase d’esos “detallinos”.

En Francia y el Reinu Xuníu, los votantes musulmanes son innumberables al llau de los d’orixe o confesión xudía; y tantu a Macron como a Starmer les encuestes van-yos francamente mal, poro gárrense a cualquier cosa que flote, nun quieren afondase. Máxima en toes partes, flotar a toa costa.

Nel nuesu casu, España, tenemos al doctor Sánchez, que fai un añu obligó a retratase a Margarita Robles por usar la pallabra xenocidiu mientes una entrevista na cai, tratando de camudase nel campeón palestín d’Occidente, xenocidándomos a nós pel camín, especialmente nel aspeutu militar, y too ello pa tratar de quedase colos votos de Sumar Y Podemos, y asina algamar qu’el PSOE nun caiga per baxo de los cien escaños.

Muncha Palestina en Moncloa pero la realidá ye que la muyer y l’hermanu acaben de ser unviaos a xuiciu, y lo de Gaza yá lo esplicó Felipe González, qu’Hamas suelte los rehenes, y Netanhiaju quédase ensin xustificación.

 Raúl Suevos

A 24 díes vencíos de septiembre de 2025

Putin necesita a la OTAN

 

Nun hai nada como la medrana pa controlar la mente y el corazón de les mases. Los historiadores tiénenmos dao cuenta pormenorizada –quiciabes el exemplu meyor seya la Guerra del Peloponesu- de cómo esi sentimientu modula y nel so casu empobina la opinión de les multitudes, a vegaes acertadamente, y na mayoría de les ocasiones, tramite los demagogos del momentu, haza la ruina del país; como-y asocedió a l’Atenes de Pericles.

A esa xestión de la mente colectiva los politólogos llamenlo dominar el rellatu, y los militares, que va tiempo lo conocen, usen nel so llugar el “dominiu cognitivu”, y ellos, como especialistes nel arte de la guerra, afirmen que y’ehí, nese dominiu, dende enantes de qu’entamen les hostilidaes, au s’anicien a ganar les guerres. Pero tamién aseguren, esos mesmos espertos, que ye mui fácil escomenzar una guerra, decisión que compete al ámbitu de lo político, y mui difícil desaniciala, tamién responsabilidá de los mesmos. Eso talo aprendiendo bien Vladimir Putin.

Lo d’Ucrania veníalo aperiando el vieyu espía soviéticu dende enantes del 2014, cuando con unidaes ruses ensin insignies distintives anexonó Crimea y ocupó gran parte del Donbass, baltando de pasu un avión holandés con 400 pasaxeros a bordu. Atesorara cantidaes inxentes pa financiar l’intentu actual d’ocupación de Ucrania y compensar les pérdides que les sanciones económiques supondríen, pero nun calculó bien la duración, porque nun contó col heroísmu ucranianu y el sofitu medíu d’Occidente nestos tres años d’enfrentamientu.

Anguaño Vladimir tien un millón cien mil baxes de combate sobre la mesa, tres cientos mil muertos comprobaos; la so economía, mayoritariamente de calter estractivu, caese a pedazos por efectu de les sanciones y los drones ucranianos que golpeen infraestructuras en llugar de poblaciones. Namái China ya India-y  merquen la so disminuida producción, a precios de saldu. Rusia ta a puntu de caer, pero Vladimir nun sabe como vendé-y-lo, non yá a la so población, de calter bovín, sinon a los oligarques qu’hasta’l momentu lu sofiten, y perciben como’l so tingláu ta a puntu d’esbarrumbase. Nun sabe cómo presentar una non victoria que suena a derrota.

Rusia ta condergada como potencia rexonal a mediu plazu, Azerbaiyán, Irán y les repúblicas centro asiátiques recuerden-y-lo cada día, namái la so condición de potencia nuclear-y da un ciertu estatus, y  Vladimir, más alló de l’alfombra colorada de Trump, yá llucha pola so permanencia personal, y y’ehí, nesa supervivencia, onde un alcontrón cola OTAN lu ayudaría a vender un tratáu de paz con Ucrania, presentándolu como fuercia mayor énte un enemigu mui superior. Ye lo qu’hai.

Raúl Suevos

A 20 díes vencíos de septiembre de 2025

Torna en castellán en repdiv.blogspot.com

Véndese "Marca España", nel Rastru

 

La paternidá política de la Marca España, como conceutu, pertenez-y a Mariano Rajoy que la punxo en marcha alló pol 2012 como política d’estáu y con un Altu comisionáu al frente. El so oxetivu yera la promoción, desendolcu y caltenimientu de la imaxe de la nación de nueso nel esterior, y pa ello, ensin que sunpuxera incrementu nos presupuestos del estáu, llantó al frente a Carlos Espinosa de los Monteros, el so creador, un aristócrata, funcionariu y empresariu d’ésito qu’algamó qu’esi conceutu siga siendo dalgo familiar n’España, y tamién nel estranxeru magar los avatares que sufrió nel tiempu.

Pa cuando’l doctor Sánchez aportó al gobiernu una de les sos aiciones primeres fo camuda-y el nome pol d’España Global; convertir el conceutu en Secretaria d’Estáu, y poner a dirixilo a una saltimbanqui de los partíos políticos, Irene Lozano, periodista especialista en poner en papel la vida d’otros, como fo’l casu de la hagiografía que-y preparó al so xefe, el presidente del gobiernu. Ye lo qu’hai.

Nel 2021 liquidóse aquella Secretaría, y dende entoncenes naide s’acuerda d’ella. Si en cambiu de la Marca España que triunfó como conceutu y sobrevivió al so creador y Altu Comisionáu. Tantu ye asina qu’estos díes caberos, especialmente’l domingu, y énte les imáxes del final atristáu de la Vuelta, yera’l nome más utilizáu por periodistes y personal en xeneral, en toa España.

A mín, que nun tengo fuentes d’información especializada, ocurrióseme ver en internet qué yera lo qu’asocedía na prensa esterior, y yá al cayer la nueche taba na mayoría d’ellos, con mayor o menor estensión. Güei los análisis, supongo, van poder incidir nel fechu insólitu de qu’esta campaña, sofitada na presencia d’un equipu israelí na Vuelta, que nun fo espulsáu magar les presiones recibíes dende’l gobiernu, tien sío impulsada verbalmente pol propiu presidente, col resultáu final de lo asocedío ayeri na capital del país.

En Francia tienen unos mercadillos informales a los que llamen Videgrenier, vaciagraneru, u se vende too aquello que na casa ocupa espaciu pero que se tien quedao obsoletu o, pol motivu que seya, inservible. Ye lo mesmo que, con tamaños estremaos y con referencia nel de Madrid, equí nomamos Rastru, y ye ehí au vustedes tienen que guetar la Marca España, que magar que la tengamos viva nel nuestru pensamientu y llenguaxe común, el nuesu gobiernu vien de tirala pelos suelos, como güei van poder comprobar les audiencies de mediu mundiu nos sos televisores.

Raúl Suevos

A 15 díes vencíos de septiembre de 2025

Torna en castellán en abellugunelcamin.blogspot.com