Tien sío ésti un branu aforfugante, pola calor, les noticies de les quemes en mediu país, y, sobremanera, equí en Xixón, pola saturación descomanada de visitantes que tuvimos. Nada que ver colo d’otres partes d’España, van dicir dalgunos, pero a la qu’equí nun tamos avezaos. Ye lo qu’hai.
Ayeri, pa desagraviar la estación, xunto con un grupu d’amigos del golf del que formo parte nun va muncho, tevi ocasión de desquitame en dellos aspeutos. Fúmonos a xugar a Villaviciosa, campu conocíu pola yerba autóctona qu’alfombra –ye un dicir- les sos cais, y, sobretoo, pola rapidez y les inopinaes y traicioneres cayíes de los sos greenes. Y anque yera amigable, xugamonos el vermú por pareyes y yo tevi el placer de ser pieza primordial pa facer pagar a los otros. Dalgo notable dada la mio precariedá golfística. Mañana pa nun escaecer, a lo menos pa min.
Dempués tomamos la ruta d’Oles, ellí enrriba, ente Tazones y la Venta les Ranes, parroquia au s’alluga un restaurante escelente y reconocíu, La Llosa, que sufre demientres l’estivu la turniada de madrilanos y otres especies, pero qu’ayeri ponía a la nuesa disposición, y la d’unos pocos clientes, les sos terraces, el so bon serviciu y, sobretoo, lo meyor de la so carta.
Tres unes botelles de sidra y unes birres afuera, yá na mesa y con compañía d’un albariñu escelente , atacamos el paté de tiñosu, que fuera conocen como cabrachu, y, cuando aínda tábemosnos maraviando cola so testura suave y sabrosa, apaecieron les tarteres con unes primoroses verdines con almeyes, en cantidá pa que dalgunos repitiésramos. Pa actu seguíu, casi ensin alendar, salieran les ventresques desomanaes, troceaes dilixentemente nes bandexes pola xefa de sala, y que, acompañaes d’unes patates panadera delicioses, y unes tazes de pistu, desfacíense en boca. Quiciabes la meyor que tengo tastiao no que va d’estación, aparte les de casa, de xacíu. Espectacular.
Yo creyía qu’aquello yá yera abondo, pero non, cuando taba pensando si mete-y mano a la pestaña, o pistolechu, pa mín la carne más delicada y esquisita de la pieza, sacaron les fuentes col rollu de bonitu, que m’obligaron a ser prudente y escaecer aquellos remates de la ventresca y dedicame con procuru a los recién llegaos. ¡Que fartura¡ señores.
Quedaben los postres, que llegaron en forma d’unos pastelillos saborgosos, con base de bizcochu y turrón, en cantidá abondo pa que repitiera quien quisiera ensin ser acusáu de llambión. Todo ello rematao con un cafetín y ensin que naide osara pidir un chupitu o semeyante, supongo que por medrana a un subidón de tensión o un control de la Benemérita. A lo menos eso me pasó a mín pela tiesta. Tala pitanza quedó en 45 euros per capita, lo que nun me paeció caro n’absoluto, pues más alló de la calidá estraordinaria, les cantidaes recordaben a les d’una boda asturiana.
Quedaben les fotos de rigor, p’alcordanza d’una xornada inolvidable, y dempués el camín a casa, unos haza Uviéu y los más haza Xixón, pela vieya Carretera de la Costa, pa lo que m’afité con un discu de Led Zeppelín, ventanielles abaxo y el soníu a tope, y pa cuando baxaba de Peón haza Arroes, coles sos curves encadenaes, en perfeuta comunión musical y volantística, quedábame tiempu pa pensar que la vida tien los sos momentos, y los bonos hai qu’intentar revicialos pues nun sabes cuándo se va repetir.
Raúl Suevos
A 10 díes vencíos de septiembre de 2025
Torna en castellán en repdiv.blogspot.com
No comments:
Post a Comment