Empobinábame yo está mañana, Muru alantre, camín del Muelle, a la gueta del mio paséu y vermú, cuando me decaté de la cantidá pocu común de guiris, en xeneral d’edá madura, xubiletes pensé, anque tamién noté más d’un grupu familiar. Camín del Ayuntamientu la densidá del personal llegaba a ser casi agobiante, anque’l día, nubláu y menaciando agua caltenía la xente lloñe del arenal. Ellí, na plaza consistorial, la balasma yera mui superior a lo avezao nun festivu de septiembre, pero, la imaxe atanante viénome al salir pel pasadizu a la Plaza’l Marqués. Nin una mesa llibre, oiga, toes completes, extrañamente pa eses hores que acostumen a tar casi col personal poniendo les meses ¡Qué ésitu turísticu¡
El personal qu’a estos altores del paséu llevaba visto nun paecía pertenecer a esa clas económica que suelen trayemos a la vista eso que llamen prensa del corazón, nin tampocu los noticiarios televisivos dedicaos al mesmu sector social, más bien paecían pertenecientes a un tipu d’Inserso qu’aínda nun dominamos nel nuesu país, pues pude dame cuenta de que munches de les silles eléctriques qu’esta mañana atopaba tamién paecíen pertenecer al mesmu grupu. Ello ye que, nes meses ocupaes na esquina del Palaciu de Revillagigedo, les consumiciones paecíen ceñise estrictamente al cafetín y pocu más.
Nos Xardines de la Reina pude comprobar a simple vista la razón de tantu turista mañaneru. Una mole, dalgo asina como un Empire State Building trayíu de Nueva York y baltiáu nel Musel, podía güeyase a simple vista sobresaliendo perriba de los mástiles de los balandros del muelle, la Rula y el muru de Lequerica. Un cruceru descomanáu que mos anubría col so formigueru humanu nel día de la Santina y con tou Xixón, casi tou, pieslláu de trancón, colo que nun-yos quedaba nin una d’eses tiendes de baratillu pa gastase un par d’euros nun imán pal frigoríficu de casa.
En Corrida, para rematar, reparé cómo un par de pareyes vieyes, bien vieyes, sentaes nun bancu, sacaben unos canapés, supongo que guardaos con enfotu economicista nel bufet del barcu, pa dir tirando la mañana, y quise pensar qu’a lo menos, quienes esto controlen, tendríen en cuenta la festividá pa nun los llevar d’excursión a Cuadonga; anque too ye posible.
Añu de record d’incendios, de temperatures y de turistes, y equí, n’Asturies, paez qu’andamos un pocu a lo lloco con estos asuntos, porque ¿qué quieren que-yos diga? a mín lo d’esta mañana lloñe d’animame dexóme con un ciertu posu d’inquietú. Ye lo qu’hai.
Raúl Suevos
A 8 díes vencíos de septiembre de 2025
Torna en castellán en repdiv.blogspot.com
No comments:
Post a Comment