Esencies

 

Yera una de les mio primeres correríes nel Puestu al que llegara nun facía muncho procedente de la Academia; una de les dures, de les que se sabía la hora d’entamu pero non el final. Al fondo del valle devinábase Campu Casu, y les cuestes camín de la braña nun paecíen terminar nunca. La redolada d’aquellos valles, con xente aínda pel monte, yá nun yera’l d’unos años enantes, con patrulles de contrapartida y encuentros frecuentes con muertos y feríos, pero entá asina nun yera cosa de descuidaese, y
eso añedaba un cansanciu adicional al que suponíen los desniveles y el pesu del equipu, col tirante de la bandolera de la pistola serrando’l cuellu mientes tratabes de nun odiar la capa pensando que, posiblemente, fuera imprescindible dalgo más tarde.

Álvarez, el Guardia primera, avisóme en cuantu lu columbramos alló al fondu, mui pegáu a la llende de la viesca: “Nesi caseríu, casa Pachón, pasen información y a vegaes acoyenlos en casa, asina que muncho güeyu”; poro mos sosprendió dalgo más tarde la muyer corriendo que venía al nuesu alcuentru. “Corran,
corran”; y tres miranos l’ún al otru. ellí mos fumos, garrando’l mosquetón con una mano y cola otra el tricorniu.

Nun abarruntamos que, nel fondu la cuadra, díbamos a atopar col paisanu de la casa mientes engarriaba tirando del xatu que nun quería salir del cuerpu la madre, que muxía de dolor. Álvarez, ensin pensalo, güeyóme mientes se quitaba la guerrera y sofitaba’l fusil escontra la paré, al mio llau, y punxose a tirar de les pates del xatín hasta que l’animal tevo fora y la madre, solliviada, púnxose a lambelu énte la güeyada desafogada del home y la muyer.

Yera ochobre, y yá taba mayada la manzana; l’agradecimientu vieno en forma de sidra dulce fresco de bodega, y unes cares franques y amigables que contrastaben con la adustez cola que yéramos recibíos n’ocasiones anteriores. Dalgún tiempu dempués cayeron los bandoleros caberos del valle, y naide pescanciaba cómo la Guardia Civil consiguiera la información pa dar con ellos naquel monte enantes
hostil ya impenetrable.

Pasáu dalgún tiempu, tando yo de puertes y mientes los francos de servicio esperaben p’Academies, entrugué-y a Álvarez pol asuntu, pero nun me contestó, namái sonrió socarronamente, y yo entendí.

Ochobre de 2022

Torna en castellán repdiv.blogspot.com