Ye una mañana gris en Zaragoza, cargada de nubes, de les poques que se dan nuna ciudá na que’l cierzu, na so versión Moncayo, nun-yos dexa malapenes apaecer, y cuando lo fae llévales a pasu de Xenerala valle abaxo, pero güei ye distinto, les borrasques grandes que, una tres otra, barren el país, son tan fuertes que’l cielu caltiénse encapotáu con un ambiente embruscáu peles cais, como preparando’l ánimu pa recibir noticias males. Y les nueves acaban por llegar, les peores, que non por previsibles se faen menos doloroses. Coló’l Chío.
El Chío, el Chordi, Cíordia, José Antonio, el navarru de la risada perenne, el tipu capaz de poner bona cara y unes rises a les circunstancies peores tien tirao la toalla esta vegada, y decidió dir a xuntase col so vieyu binomiu, el Fali, otru campeón de les rises y la socarronería, que-y abrió’l camín nun va muncho. Y ye que tamos pasando una racha mui mala. Va ser la edá.
El Chío y yo aportamos xuntos a la capital aragonesa allá pel 72, yá tíen llovío dende entoncenes; dambos provincianos, yo al internao de PROA, una academia preparatoria pal ingresu na Xeneral, y él a ún d’aquellos pisos concertaos qu’acoyíen a opositores en réxime familiar. Siempres tenemos caltenío esa rellación d’amistá y proximidá que dan la vida dura de los opositores y dempués de cadete na Xeneral. Más tarde, zaragozanos dambos per vía matrimonial, caltuvimos el vínculu a lo llargo de los años.
El Chío pasó por casi toles unidaes de Zaragoza, con especial mención a la Xeneral, au la so forma de ser convirtiólu nuna alcordanza pergrata, cosa rara, pa les promociones a les que cooperó a formar; y pa nós, los sos collacios tevo siempres a puntu la so visión positiva de les coses de la vida, cola escepción de lo qu’asocedía nel so pueblu, Allo, enantes tierra frutosa de requetés navarros, como él, y que nos años caberos tíen dío sucumbiendo a les idees batasuneres, un aíre velenosu que va invadiendo non namái’l so pueblu sinon tola Comunidá foral, y qu’a él amargaba-y la esistencia.
La so engarradiella cabera tien sío escontra esa enfermedá traicionera, de cares y versiones múltiples, qu’a vegaes caltiense escondía y manifiestase cuando yá ye tarde pa face-y frente, y qu’al Chío robó-y la oportunidá d’esfrutar de los sos nietos, xunto a la muyer, Carmen; y a nós la so alegría, salpicada de dichos al vieyu estilu navarru. Día gris y triste güei en Zaragoza.
Raúl Suevos
A 14 díes vencíos de marzu de 2025
Torna en castellán en repdiv.blogspot.com
No comments:
Post a Comment