Tamos asistiendo estos díes a lo que dalgunos sociólogos llamen cambeos epocales, esto ye, movimientos nos comportamientos o na manera de pensar de la sociedá que suponen dexar atrás lo qu’enantes paecía inamovible, o lo que ye lo mesmo, el cambéu de paradigma, n’espresión más típica d’estudiosos, científicos sociales, o simplemente snobs.
Y ye que, cola movida sangrina que supunxo la invasión d’Ucrania -sí, invasión ye la pallabra- la opinión pública europea escomencipió a esmolese, a removese, como si sofriera una comeción provocada por un alimentu en mal estao, o reaccionara a una alerxia desconocida. Pero, aínda con ello, cuanto más al sur y al oeste s’atopaba’l suxetu observador, paecía como si l’asuntu nun mos acabara d’afeutar. Hasta que llegó Trump, de nuevo, per segunda vegada, y entoncenes, como cantaba aquel vieyu estribillu de Carlos Puebla, na so pernomada pieza “Y neso llegó Fidel”, acabóse la diversión, llegó’l comandante y mandó a parar; y toos se punxeron a tremblar, incluyendo a los hasta agora felices europeos.
L’efeutu Trump, na mio opinión, puede ser tan devastador como lo fue nel so momentu el de Fidel Castro pa los cubanos, coles sos consecuencies anguaño na Islla bonita. Pero, tocantes la seguridá –n’España, al gobiernu nun-y presta falar de rearme- paez que tienen tocao a arrebato, entamando pol afitáu trabayu sicolóxicu social que lleva a qu’en pocu tiempu la mayoría de los españoles tea a favor d’esi rearme innombrable, lo que nun dexa de ser chocante nun país que siempres tien presumío del so antimilitarismu y pacifismu, sobremanera nos partíos que güei sofiten al nuesu gobiernu. Ye lo qu’hai.
El casu ye que vamos a meter los caudales que demientres dellos años recortamos, anque namái seya por nun dar el cante européu, pero, na mio opinión, erraríamos si lo ficiéramos güeyando a Rusia, que mos queda mui lloñe, o namái, como en tiempos pasaos, en crear puestos de trabayu en rexones qu’eleutoralmente mos interesen, y ye que, la Defensa va de menacies, y estes deben de priorizase por proximidá y potencialidá, y ehí, la nuesa visión debe mirar al sur, au s’asiste a un procesu de rearme, ehí sí, que debiera preocupanos.
EEXX puede ser una gran ayuda pa Europa, llevándonos a crecer nesa necesaria construcción europea, particularmente nel área de la Defensa, pero España, obligada a actuar llealmente cola Xunión, nun debe escaecer que los sos riesgos y menacies vienen d’abaxo, y debe rearmase pensando nello, y non notra cosa.
Raúl Suevos
A 22 díes vencíos de marzu de 2025
Torna en castellán en repdiv.blogspot.com
No comments:
Post a Comment