Nun fo’l d’Alhucemas el primer desembarcu anfibiu de la historia, nin muncho menos. Na guerra del Peloponesu cuéntamos Tucídides casos estreamos nos que tanto atenienses como lacedemonios emplegaron esti tipu d’operación pa sosprender a los sos alversarios. L’emperador Carlos tamién la emplegó nel norte d’África con suerte diversa; y yá en tiempos tan modernos como la Primer Guerra Mundial, los británicos y los sos aliaos acollecharon un fracasu sonoru en Gallipoli escontra, ente otros, un mozu Mustafá Kemal Ataturk. Pero fo n’Alhucemas u per primer vegada en tiempos modernos dívase llevar a cabu tala complicada operación con ésitu. D’ello va agora cien años, y los Aliaos estudiaronla enantes de Normandía.
Ye un aniversario a tener en cuenta pues la operación, conxunta, yá que cola mayor parte de la nuesa Armada, también emplegaba globos aerostáticos, y, de xacíu, a les fuercies del exércitu, encarregaes del peligrosu desembarcu y aseguramientu de la tiesta de playa, contaba con un continxente significactivu de la marina francesa que daba’l toque combináu al asuntu.
La operación nun diba escontra Marruecos, pues tola aición española nel área llevábase a cabu con anuencia del sultán, incapaz de controlar a los históricamente levantiscos rifeños, tremendamente independientes dende enantes de la llegada de los romanos a aquelles costes, y entoncenes, baxo la direición d’Abd el Krim, responsable del nuesu desastre perdolorosu d’Annual, autoproclamaos en república independiente.
La operación militar rescamplante paecía merecer un ciertu recordatoriu, y a ello se llanzara l’Almirante xefe del Estáu mayor de la defensa, esi tan pocu vistu dende lo de la Dana, pero, nesta España de nueso siempres hai dalgún peru cuando del Exércitu se trata, y la señora ministra tien decidío que nun se fale más del asuntu, dalgo que despierta les duldes sobro’l motivu. ¿Sedrá por nun fadiar al nuestru siempres susceptible vecín? agora que mos llevamos bien tres tragar colo del Sáhara; ¿o sedrá porque’l desembarcu protagonizólu una Lexón al mandu del entoncenes coronel Franco?, el mesmu que tenía diseñao y dirixio’l desembarcu d’ensayu previu en Ksar Sguir con eses mesmes tropes.
Dambes paecen razones abondo pa un gobiernu a la defensiva, ensin idea de retrocesu, cabría dicir en términos militares, y con poques fuercies, pues siempres paecen falta-y, a lo menos, siete unidaes. Y con parte de les sos propies fuercies siempres dispuestes a pasase al enemigu, especialmente nesti tipu d’operaciones militares.
Marruecos siempres ye peligrosu pal gobiernu Sánchez, y a Franco meyor nun tocalu, nin siquier nesi cincuentenariu de la so defunción, que diba a socupar tol añu. Ye lo qu’hai.
Raúl Suevos
A 12 díes vencíos de marzu de 2025
Torna en castellán en repdiv.blogspot,com
No comments:
Post a Comment