¡Menuda movida¡ Nada menos que retorniar la Estatua de la Llibertá a los franceses, que foron quienes alló pel llonxanu 1886 regalaron-y-la a los norteamericanos pa conmemorar los cien años de la independencia d’esa nación. Y vien ello de la mano d’un políticu francés apareciente, Raphael Glucksmann, esponente de la esquierda lliberal ñueva, que llucha por levantar tiesta tres los caberos y desastrosos años de los socialistes; al que se-y tien ocurrío pidir la devolución de “La llibertá qu’alluma’l mundiu”, nome auténticu de la obra, en vista de los acontecimientos que se desarrollen nel Imperiu dende l’aportar de Donald Trump, otra vegada, al poder.
Como se pueden maxinar, trátase más bien d’una boutade, al más puru estilu francés, que gueta socupar páxines primeres pero que, a última hora, únvia tamién un mensaxe fondu sobro’l modu cómo’l presidente yanqui y los sos siguidores lleven los asuntos del so propiu país, y de pasu los del restu del mundiu. Y ye qu’ellos, dende la so nacencia, algamaron a controlar siempres el rellatu de la democracia y la llibertá. Ye lo qu’hai.
La realidá ye bien distinta, y tá nos llibros, poro la mayoría desconozla, pero, dende la revuelta seminal escontra los impuestos sobro’l té en 1973, engrescada polos pudientes mercaderes de Boston, too tien sío de corte aristocráticu, nel sentíu aristotélicu de gobiernu d’unos pocos, lo que sedría señalao, negru sobro blancu, na propia Constitución de los EEXX. Y con esti espíritu, depredador no fonderu, tienen dío creciendo dende entoncenes, a costa de los sos vecinos, foran aboríxenes americanos, a los qu’esterminaron enforma, o, primer la Corona española, y dempués les repúbliques hispanoamericanes, con especial dedicación y espoliu nel casu de los mexicanos.
Ye la historia de los EEXX un rellatu imperialista, mui bien camufláu, yá que tal, nel que supieron crecer en cada envite y, amás, recoyer l’agradecimientu de los perdedores, como nel casu européu, au les vieyes potencies se desangraron en dos guerres tarrecibles, hasta que, casi esgotaos los contendientes, los yanquis llegaron como llibertadores a salvar a los europeos, que yá nun torneríen a llevantar tiesta nel ámbitu políticu, y sí nel económicu gracies a la Xunión Europea.
Toca agora un capítulu d’aislacionismu yanqui de la mano de Trump, que pieslla USAID, la superaxencia d’ayuda humanitaria, y la Voz d’América, radiofonía en llibertá pal mundiu, y a la portavoz de la Casa Blanca namái se-y ocurre retrucar a Glucksmann diciendo-y qu’ensin ellos güei Francia falaría alemán; lo que nun dexa de ser cierto.
Raúl Suevos
A 18 díes vencíos de marzu de 2025
Torna en castellán en repdiv.blogspot.com
No comments:
Post a Comment