El primer va-yos sonar a la mayoría. Ye un personaxe de ficción creáu por Tom Clancy, que lu desarrolla a lo llargo d’una veintena de noveles d’aición nes que son les operaciones más o menos tapaes de la CIA la fonderada nel que too se desendolca. Nelles, el nuesu protagonista, vieyu oficial de los Marines, ye un analista especialista en transacciones bancaries, pero que, llegáu’l casu, ye a embarcase naquel “Ochobre Colloráu” que patroneaba un, como siempres, persolidu Sean Connery, p’acabar resolviendo situaciones susceptibles de poner en peligru l’Imperiu norteamericanu.
El personaxe, con cierta frecuencia, apela a la so condición d’analista simple, pero acompañándolu nos sos desplazamientos, montaos nes llínees apasionantes de Clancy, podemos percibir la infraestructura descomanada de medios y personal que sofita l’aición política esterior de los Estaos Xuníos. Porque la xestión d’un imperiu ye complicada y costosa; fuélo pa Ciro’l Grande, fuélo p’Augusto, tamién pa Carlos V, y menos pa los británicos, pola so habilidá pa esplotar persones y territorios. Ye lo qu’hai.
Robert Kaplan ye menos conocíu. Autor celebráu de llibros nos que combina almirablemente viaxes ya historia, tien sío tamién sosecretariu d’estáu en Washington con Bill Clinton, quien, tres la llectura del so “Fantasmes de los Balcanes”, decidió la implicación de los EEXX nel conflictu de Bosnia i Hercegovina. Pa min ye la de so una de les opiniones a tener en cuenta en cuestiones de xeopolítica, y poro trato de siguilo nos medios nos qu’escribe.
Estos díes tien espublizao en Político Magazine un artículu nel qu’afirma que Donald Trump nun sabe xestionar un imperiu, lo cualo deduz de los recortes que piensa llevar a cabo, dalgunes yá en marcha, en munches, si non toes, les axencies del gobiernu de los EEXX. Axencies de tou tipu, dende la seguridá, l’análisis, o l’ayuda humanitaria, como USAID, que los sos sacos d’arroz o trigu tenemos visto a lo llargo de los años en requexos múltiples del mundiu, y que lo primer que t’entruguen pa sofitate un proyeuto ye: ¿En qué beneficia al gobiernu de los EEXX o los sos oficiales?
Toos esos homes y muyeres repartíos pel mundiu desarrollando les sos funciones, sacupen informes que van servir pa crear intelixencia y soportar los dosieres y espedientes que más tarde van ayudar a los altos oficiales norteamericanos a tomar les decisiones que facen qu’una potencia seya dalgo más qu’eso.
Imperio supón capacidá y voluntá, les que fai un sieglu caltienen los EEXX. Rusia tien la segunda pero falta-y la primera; y China construye les dos mui rápidamente.
Raúl Suevos
A 10 díes de marzu de 2025
Torna en castellán en repdiv.blogspot.com
No comments:
Post a Comment