A más d’un asturianu’l títulu válu llevar a recordar les estaciones del vieyu tren automotor que subía hasta Laviana efectuando paraes a lo llargo de la Cuenca Minera, pero non, nun sé trata de trenes nesti casu, pero sí que la referencia pasada mos lleva a los tiempos del barcu a vapor y a les estaciones carboneres necesaries imprescindibles pa, superada la navegación a vela, establecer rutes oceániques en tolo que daba’l Globu.
La idea fo desarrollada pol capitán Alfred Mahan, un teóricu de la xeoestratexia qu’alló pelos finales del sieglu XIX, y enantes de la nuesa desgraciada guerra Hispano-norteamericana, escribió dellos llibros sobro “la influyencia del poder naval na historia” y “l’interés de los EEXX nel poder naval”, nos que dexaba entever la necesidá apremiante pa Washington d’apoderase de los restos del Imperiu español p’asina poder establecer les estaciones carboneres imprescindibles, lo qu’algamaría tres afondar la nuesa flota en Santiago y Cavite, empresa na qu’él, yá almirante, emplegóse como conseyeru políticu.
Güei yá nun son necesaries eses estaciones. La Navy yanqui funciona con portaviones y somarinos nucleares que pueden pasar dellos años ensin repostar combustible, pero’l poder xeopolíticu actual ye rehén tamién d’otres víes de comunicaciones; aquelles peles que se desplacen los bytes y los púlsares, esto ye, les que soporten tola tecnoloxía de la información na que se mueve’l mundiu anguaño. Y ehí tamién se definen estaciones y dominios.
Más alló de los drones que tresformen la redolada de la guerra convencional, como vemos n’Ucrania, el dominiu del espaciu, como amuesa la red de satelites Interlink de Elon Musk, ye fondamental pal control del campu de batalla, y la XE, na que, pel momentu namái opera la red francesa Eutelsat, axiliza la puesta en marcha de la red IRIS, prevista pa un güei tardíu 2030. Ye lo qu’hai.
Pero esisten otres redes, como’l cableáu somarino de fibra óptica, que son y van ser oxetivos estratéxicos d’un enemigu posible (imaxínái-vos) y que son y van ser oxetu de diseños defensivos nuevos, tantu activos como pasivos, pa tratar de torgar o enzancar lo que s’avecina. Unos cables, víes, pelos que discurren esos trillones de datos en tiempos ca vegada más reducíos, datos que necesiten d’unes estaciones, nodales, de les qu’estos díes nun para de falase, en clave de proyeutos, n’España, con particular atención n’Aragón, tierra que tien enerxía verde, solar, eólica ya hidráulica, xunto a un gran riu que refrixere les instalaciones. Too ello a falta d’una nuclear que’l quixote español desmantela.
Raúl Suevos
A 21 díes vencíos de marzu de 2025
Torna en castellán en repdiv.blogspot.com
No comments:
Post a Comment