Kursk, la batalla

Esa ciudá rusa pasó a la historia porque na so contorna llibróse, na Segunda Guerra Mundial, la batalla de carros de combate más grande de la historia, y ellí mesmo, desarrollase agora otru gran choque de dimensiones menores pero d’igual importancia pal futuru de la guerra d’Ucrania.

Falamos d’una gran victoria de les fuercies de Zelensky, en tolos niveles, tácticu, operacional y estratéxicu, siendo esti caberu’l más importante, pues cola ocupación d’esti pequeñu territoriu rusu algamaron los ucranianos a obligar a Putin a mover tropes del frente oriental, defendíu con munches penalidaes por Ucrania, au perdía tarrén lenta pero paulatinamente; agora, ellí, contraataquen y recuperen delles poblaciones; y ello, siempres, con pérdes humanes altísimes pa los rusos. Amás d’esto, Rusia tiénse visto obligada a derivar haza Kursk los reemplazos nuevos llegaos al frente, xunto coles fuercies unvíaes dende Corea del Norte.

Cuando acabe la fase anguaño, de retirada ordenada de les fuercies ucranianes, Rusia yá nun va poder pensar que la so frontera ye intocable y vase ver obligada a caltener ellí una masa de fuercia importante énte la medrana de qu’Ucrania pueda repetir la xugada. Too ello convierte la operación nuna decisión estratéxica magnífica, que, operacionalmente, tevo siempres bien pensada en cuantu que l’avance sofitaba los sos flancos en varios cursos d’agua que facíen estremadamente difícil la respuesta rusa, circunscrita a namái dos exes au les llendaes pero perdonducentes fuercies de Kiev tienen estao inflixendo pérdes terrible demientres estos meses.

Esti dispositivu operacional magníficu tiénse visto sorpresivamente desmontáu cuando los rusos foron a atropar les fuercies necesaries, descomanaes, y, sobremanera, los ucranianos viéronse oscurecíos pol corte de la intelixencia aportada polos EEXX tres la visita desastrosa de Zelensky a Washington; col resultáu de que la ruta loxística principal vierase sometía al bombardéu rusu constante, lo que llevó al Estáu Mayor ucranianu a ordenar una retirada que, polo que se va sabiendo, t siendo exemplar y con mui poques pérdes.

Nel planu tácticu, au los drones pequeños de guiao personal, FPV, tienen llevao la guerra convencional a una dimensión nueva, los ucranianos, anguaño con una industria propia, llogren frenar a les mases ruses, tanto acorazaes como a pie, con muncho menos personal, y, posiblemente, preparense pa socupar les llínees defensives yá preparaes sobro la frontera nacional propia.

Kursk, una batalla de movimiento victoriosa nel so entamu, puede ser agora una victoria ucraniana nueva si logren controlar esi movimientu retrogradu de forma ordenada, al mou como lo facia aquel Zorru del desiertu pernomáu. Ye lo qu’hai.

Raúl Suevos

A 16 díes vencíos de marzu de 2025

Torna en castellán en repdiv.blogspot.com