Ye una historia bien vieyo pero, demientres la so primer presidencia, Trump yá-y echó en cara l’antigua querella a Justin Trudeau. Y ye que l’asuntu debió escoce-yos abondo, tantu que más de doscientos años dempués aínda lo tienen presente. Y nun ye pa menos.
Yera 1812, y la moza nación yanqui, espansionista y depredadora dende enantes inclusive de la so nacencia oficial, vio la oportunidá d’apoderase de les tierres de la corona británica más al norte, dao que los ingleses taben emplegándose a fondu n’Europa escontra les tropes napoleóniques. Yera una mala idea, que nun furrularia.
No que güei ye Canadá, apañaronse como pudieron con unes milicies formaes por colonos franceses y británicos, cimarrones negros fuyíos de la esclavitú y hasta les propies tribus indies que yá taben al tantu de cómo los “civilizaben” los sos vecinos del sur. Y con esto algamaron a frenar a los invasores, non ensin qu’estos saquexaran y prendieran fueu a la ciudá de York, anguaño conocía por toos como Toronto. Pero aguantaron lo suficiente y la invasión nun llogró los sos oxetivos.
El 11 d’abril de 1814 Napoleón abdicaba y roblaba’l Tratáu de Fontainebleau, para desgracia de los yanquis, que diben ver llegar p’agostu una escuadra cargada de infantería esperimentada y dalgunos milicianos, al mandu del xeneral Robert Ross, que diba entrar ensin malapenes resistencia hasta Washington, au un francotirador casi lu mata al averase a parllamentar, dalgo que, probablemente, conduciría a que les sos fuercies prendieran fueu a la Casa Blanca, aínda cola xinta preparada sobro la mesa pal presidente Madison y la muyer. Lo de Toronto paecía vengao.
Dempués la escuadra enfiló haza la costera ciudá de Baltimore, que también diba tomar, anque esta vegada sí, un “paco”, equí a los francotiradores hebo un tiempu que los llamábemos asina, acabó cola so vida, lo que paez marcar una tradición norteamericana, pues en 1836, nel Álamo, los asediaos recibieron con una fusilada a los parllamentarios unvíaos pol xeneral Santana, lo que diba llevar a qu’ésti s’amosará con crueldá desoforada tres la capitulación final. Ye lo qu’hai.
La parte importante de lo de la Casa Blanca, que-y decíen asina polos manteles, pues aínda nun taba pintada nesa color, ye que sirvió pa cimentar la indisoluble unidá ya espíritu del pueblu canadiense, que dempués de les hostilidaes construyiría una rellación d’amistá fuerte, casi xermandía, colos norteamericanos, y qu’agora ve como un presidente, que nun destaca nin por modales nin cultura, torna a tentar la invasión de Canadá, esta vegada non cruenta, y con ello consigue apigurar formidablemente a la nación, dalgo que se va comprobar con seguridá nes eleiciones convocaes pal abril viniente.
Raúl Suevos
A 28 díes vencíos de marzu de 2025
Torna en castellán en repdiv.blogspot.com
No comments:
Post a Comment