Nun puede asoceder equí

 

Dicho asina queda muncho espaciu pa la imaxinación. Son tantes, infinites, les situaciones nes que podemos pensar; inclusive l’equí puede ser aplicao a llugares múltiples, pero la realidá que se nasconde tres esa frase ye la del títulu de una novela vieya, tantu como del añu 1935, cuando un autor galardonáu, premiu Nobel de lliteratura en 1930, primer ente los escritores yanquis n’algamalo, y de nome Sinclair Lewis, decidió escribir un rellatu distópicu que sollertara a los sos conciudadanos sobro lo que taba asocediendo na vieya Europa, au’l fascismu de Mussolini y el nazismu de Adolph Hitler teníense fecho col poder nos sos países y taben en plena transformación de la sociedá.  

La novela, que’l so títulu orixinal ye It can’t happen here, puede alquirise por dellos pocos euros na empresa del tipu que tien llevao a lo más alto del cielu, que non al espaciu, al desacobardáu Jesús Calleja, y nella cuenta la historia, recuerden que namái ye ficción, na qu’un paisanu gana-y la nominación a Franklin Délano Roosevelt, esto ye, un demócrata, porque’l populismu nun tien color, prometiendo, equí convien garrase al sillón, devolver la prosperidá y la grandor a América, acabar col crimen y la violencia que trayen los emigrantes, tamién coles mentires de la prensa, y devolver la dignidá a los escaecíos, recuperando los valires americanos auténticos.

Nun había redes sociales nin televisión entoncenes, pero les campañes eleutorales yá yeren mui sensibles a los discursos populistes, anque l’autor nun cuenta que per aquel tiempu los dos grandes partíos contaben con un comité de sabios, esaniciao nos años sesenta, que podía refugar un candidatu, anque ganara les primaries, dalgo qu’asocedió en varies ocasiones énte’l peligru pa la democracia que pronosticaben dalgunos candidatos.

Dempués, yá na presidencia, el líder nuevu, recorta’l poder del Congresu, persigue a los sos rivales políticos dende’l ministeriu de xusticia, noma xueces allegaos pa los estremaos tribunales, pon al frente del gobiernu a homes de negocios averaos a la so persona, y, a la fin, crea una milicia armada que respuende namái a los sos propositos. Too ello colos aplausos iniciales del pueblu norteamericanu que, pa cuando quier reaccionar, atopáse viviendo nuna dictadura de tipu fascista, o chavista si vustedes prefieren, o castrista, o putinista, da igual, una dictadura.

La historia nun tien final feliz, pues acaba en guerra civil; y si la obra fo reeditada con ocasión de la primer presidencia de Trump, nun paez, vistos los resultaos anguaño, que muncha xente la mercara o la lleera, pero, el corolariu ye que too puede asoceder. Dalu país, tampocu el de nueso, ta a salvo.  

Raúl Suevos

A 3 díes vencíos de febreru de 2025

Torna en castellán en repdiv.blogspot.com

D'Hendaya a la Casa Blanca

 

Mientes güeyaba’l duelu verbal, n’inglés, nun podía torgar l’alacordnza de dalguna “negociación” na que yo tengo participao en calidá de persona principal, o les más de les vegaes como sofitu a la interpretación al mio xefe. Yeren situaciones agotadores, porque’l falar nuna llingua que nun ye la de to siempres lo ye, especialmente si nun yes bilingüe y el to dominiu d’esa llingua ye precariu. Nin que dicir tien que la medran a enquivocate, a tener mal entendío una espresión, un xiru, una ideya, ye un añadío aforgugante que te martiriza interiormente, y qu’esixe una templanza especial.

Na conquista del Imperiu azteca, doña Marina, la Malinche, algamó gloria universal y paez imposible nun-y otorgar gran parte de la responsabilidá nos ésitos d’Hernán Cortés. Ella daba al so xefe la imaxe de la realidá que se nascodía detrás de les pallabres de los sos oponentes, y a la vegada’l tiempu pa pensar la rempuesta más afayaiza a los sos intereses. Dalgo, esi tiempu tan importante pa mordese la llingua y meditar la rempuesta, col que’l xeneral Franco contó n’Hendaya nel so pernomáu alcuentru con Adolph Hitler.

Cuenten que’l líder nazi comentó al finalizar que prefería una cita col so dentista enantes que tornar a aconceyase con Franco. Tamién dicen que’l Caudillo amosó un repertorio ampliu de bones maneres, agradecimientos, adulaciones…y negativas a les principales propuestes nazis, lo que diba caltener a España alloñada de los combates de la Segunda Guerra Mundial.

Ayeri a Zelensky tenían-y preparao una emboscada semeyante. La escena del Despachu oval ye lo que yera, y, en redol al presidente ucranianu, poles sos actitues, hasta los periodistes paecíen decidíos a esfiltrayar a la víctima propiciatoria que representaba l’home del xersey de combate. ¡qu’horror¡ ¡qu’aquelarre diplomáticu¡  

Lo que güeyamos ayeri nes pantalles de televisión va der recordao demientres muncho tiempu, el liderazgu moral que los Estaos Xuníos tiene reivindicao demientres los ochenta años caberos tiense esbarrumbao fechu pedazos gracies a Trump y Vance ¡qué falta d’altura y estilu¡ namái queda’l poder del Imperiu, namái la soberbia d’un autócrata que se sabe’l más poderosu del mundiu, y al qu’un humilde dirixente d’una nación invadida y baxo asediu d’otru prepotente demientres tres años, con miles de vides de los sos conciudadanos perdíes, y cola concencia de tener sío engañaos y abandonaos dende que roblaron l’Alcuerdu de Budapest en 1994 y entregaron a Rusia les sos tiestes nucleares, trató de parar los pies.

Les mentires de Trump algamen el nivel de neollingua orwelliana, pero lo d’ayeri, como siempres, va ser xulgao en función de les simpatíes polítiques de caún. Yo toi con Zelensky, qu’agora namái cuenta con un plazu llendáu, direutamente rellacionáu colos niveles de munición que caltenga nos sos arsenales, y al que, más que nunca, Europa tien de sofitar hasta la estenuación, quitando qu’aceutemos  el nuesu papel de vasallos ensin drechos tocantes al Imperiu.  

Raúl Suevos

A 1 día vencío de marzu de 2025

Torna en castellán en repdiv.blogspot.com