De los talibanes llevamos falando munchu tiempu; básicamente dende que los yanquis, col oxetivu de facer la puñeta a los soviéticos qu’entoncenes teníen socupáu Afganistán, entamaron a sofitalos, principalmente col suministru d’armamentu, especialmente misiles antiaéreos, los conocíos como MANPAD, qu’acabaron col dominiu aéreu de los rusos.
La etimología d’esi nome deriva del verbu talib, estudiar, y ellos seríen los que estudien, el Corán, de xacíu. Esto ye, personal mui adoctrináu en según qué coses, y que, como los tiempos atestiguaron, tienen un calter cerriscu y emporfiáu, por dicilo d’una manera sele.
N’Irán l’asuntu comporta otros matices. Ellí los qu’agora manden, con claridá abondo, muncha más que nel periodu anterior, nel que tamién mandaben, pero de forma más discreta, son los pasdaranes; plural de pas-dar, esto ye, guardar y caltener, nel so raígañu farsi, la llingua d’aquellos llares, o lo que ye lo mesmo, los que caltienen la guardia, sobrontiendese que sobro la Revolución, la de los ayatolás.
Los primeros, los talibanes, son ferozmente suníes, o lo que ye lo mesmo, radicales del islam más retrogradu. Y los segundos, los pasdaranes, despiadadamente chiítes, o seya, radicales d’esa rama del islam, lo que mos lleva, cuando mos averamos a esos fenómenos supuestamente relixosos, a facelo dende una posición de prevención fondera.
Too esto vien a cuentu del alcuerdo que l’inefable Trump diz tener algamo colos iraníes que, según la prensa yanqui, comporta l’apertura del Ormuz durante 60 díes, lo qu’implica, indireutamente, reconoce-y a Irán drechos sobro’l pasu. Tameién la venta de petróleu iraní demientres esi bimestre, mientes se dexa lo del uraniu pa aclarar en estos 60 días. Suena a otro pufo del ogro anaranjado.
Equí ye cuando hai que trayer l’alcordanza del Alcuerdu de Doha de 2020, demientes la primer presidencia Trump, que, al cambiu d’un res, dexo -permitanme la espresión- col culu al aire al gobiernu afganu y al so exércitu, y que’l presidente Biden se vio obligáu a cumplimentar al entamu del so mandatu, dexándonos penoses imáxes pal recuerdu nos informativos de tol mundiu.
Anguaño Afganistán vive somrquiáu na penuria más grande, de toa mena, y lo de les muyeres algama cotes que namái se pueden calificar como infernales, anque Trump-y eche la culpa a Biden. Y n’Irán, onde lleven cuarenta años de dictadura teocrática, con un alcuerdu de Trump de por medio, lo más probable ye que les condiciones de la población empeyoren, y toa l’área, magar l’interés d’Israel, y los Alcuerdos d’Abraham, entre nun periodu d’inestabilidá manifiesta, y too gracies a Trump. Ye lo qu’hai.
Raúl Suevos
A 24 díes vencíos de mayu de 2026
Torna en castellán en repdiv.blogspot.com
No comments:
Post a Comment