Y aportó’l día dempués. El día
que yá les eleiciones andaluces queden atrás y tamién, con elles, la serie llarguísima
de cuatro eleiciones rexonales que mos tienen caltenío a toos, participantes o
non, pendientes del enantes, el demientres, y, a partir de güei, del dempués. Y
neso tamos.
Güei toos, especialmente los que
se ganen la vida como analistes, dediquense a sacar les conclusiones de lo asocedío
y, en munchos casos, a agorar lo que va venir, esto ye, cuando se celebren les
eleiciones xenerales. Y yo nun toi mui d’alcuerdu con delles de les consecuencies
que s’estrayen, de mou y manera que, dende mi siella d’observador, atrévome a sacar
les míes.
El gran perdedor, ensin parches
nin edulcorantes, ye’l sanchismu, anque’l gran paganu ta siendo’l socialismu, y
quienes más lo sienten y presienten son los cuadros del partíu, que ven cómo en
ca oportunidá les sos opciones pa ocupar cargos pagaos col erariu públicu van amenorgando,
lo que a los cesantes actuales y futuros agora tiempos de probeteria, nuna
España que, magar el cuentu del PIB, sigue siendo un emporiu del desemplegu, o
del emplegu basura.
De la observación de los datos de
les cuatro eleiciones repárase que nel exe de les esquierdes namái crecen
aquellos que supieron desligase a tiempu del sanchismu, sumismu o podemismu.
Esos grupos, na esquierda más radical, son los qu’amonten los sos votantes, y
cabe entrugase si nun será porque, a la fin, diéronse cuenta de lo que
realmente supón el sanchismu. Escuru futuru paez averase.
Llámame l’atención l’interés de
los medios en resaltar el “parón” de Vox, que namái sube un escañu n’Andalucía,
pasando de llau ensin alteriáse nel fechu de qu’Alvise, al que nun quisieron mercar
el so xantaxe, tien-yos “robao” más de 150 mil votos, lo que-yos tendría dao
tres escaños más, cumpliendo asina les encuestes optimistes. Poco importa, la so
palanca ye igual d’importante, como nes tres eleiciones anteriores. Ye lo qu’hai.
La victoria de Moreno, yelo ensin
discutiniu. Una mayoría que nun ye absoluta; dalgo perdificilí col nuesu
sistema eleutoral y que debería servir pa gobernar Andalucía, con los peaxes qu’haya
que pagar a Vox. Una derrota sanchista qu’únvia avisos tenebrosos a los
socialistes que, como Page o Barbón, van tener que pasar peles urnes l’añu viniente.
Unos resultaos, con casi un 60% de votu conservador nuna rexón enantes
socialista, que nun abarrunten nada positivu pa un partíu socialista peslláu
por Sánchez tres la so segunda secretaría xeneral, qu’arriesga la
insignificancia.
Raúl Suevos
A 18 díes vencíos de
mayu de 2026
No comments:
Post a Comment