Hebo una dómina, na mío mocedá, na que la mío afición principal consistía en mercar llibros. Nun había una tendencia definida; pela cueta, lo mesmo cayía la Casa de Bernarda Alba, naquellos llibrinos meraviosos d’Austral, como don Claudio Sánchez Albornoz y el so Reinu d’Asturies. Yera yo, naquel periodu, un llector en fase de formación, ensin ayudes esternas, y siempres movíu polos mios impulsos más o menos xuveniles.
Un d’aquellos arranques, creyo recordar que tres güeyar una película centrada nesta figura que’l cine tien adornao con carauterístiques casi épiques, llevóme a mercar “La verdadera historia de Billy el guaḥe, contada por Pat Garret“. Yera una obra, la cinematográfica, na qu’hasta Bob Dylan tenía’l so papelín, tres componer la música, y, de xacíu, l’actor protagonista, el mocín, Khris Khristoferson, que daba imaxe a Billy, yera un tipu francamente curiosu: Pat Garret y Billy el güaḥe, yera’l títulu, y Sam Peckimpah el direutor. Dicen que fo la meyor, anque’l Billy más guapu fo’l de Robert Taylor, de los años 40 del sieglu pasáu.
La realidá, que tampocu yera la contada por Garret nel so libriín, nel que guetaba xustificase, yera muncho más aciaga que lo que la épica de Hollywood mos vendía. El mozu, fíu d’emigrantes irlandeses aportaos nos Estados Xuníos fuyendo de la gran carpante provocada pol xugu inglés, teníase quedao solu ya indixente a los 14 años nel suroeste del país, a onde llegara la so má viuda tratando de meyorar la so tuberculosis gracies al clima.
Faltu de sofitos y conseyos, el “buscase la vida” convirtióse nun caminar per senderos alloñaos del orden y la llei, esto ye, la delincuencia, hasta que’l sistema, qu’entoncenes yera abondo radical y brutal, tayo la so carriera de foraxíu a los 21 años, según dicen.
Nel llibrín vien una semeya del individuu, que nun resulta nada fotoxénicu; pela cueta, la so apariencia, magar el rifle y el revolver, presentanos un gañan un pocu desastráu, bien que, supónse, viste les sos gales meyores pa la ocasión. Y a min, güeyando la versión moderna d’aquel daguerrotipu, vienme’l pensamientu d’esos MENA, que son de cutiu motivu de discutiniu políticu n’España y que, como esi Billy, güérfanu de familia y afeutos, mui frecuentemente acaben cayendo n’estremaos lumpen modernos, cuando non atrayíos al llau escuru del Islam, onde la so precariedá anímica, y la so rensía social, van ser encaminaos haza formes de violencia muncho más letales de les que’l pernomáu foraxíu yanqui desarrolló nos años ochenta del sieglu XIX. Ye lo qu’hai.
Raúl Suevos
A 5 díes vencíos de mayu de 2026
Torna en castellán en repdiv.blogspot.com
No comments:
Post a Comment