El Imperiu de la llibertá

 

Tán mui de moda los EEXX. Lleven tandolo casi dende la fin de la Primer Guerra Mundial, anque, si m’apuren, podría afirmase que nacieron pa tar nel candelabru, que diría una de les nueses bellezes patries. Son l’imperiu anguaño, penriba, en casi tolos aspeutos, d’aquellos que nel sieglu caberu tienen pretendío desafialos, y faciendo escaecer a otros anteriores, como’l británicu o l’español. Ye lo qu’hai.

Estos tiempos caberos fálase, quiabes, más d’ellos, pola personalidá estravagante -axetivu piadosu pela mío parte- del presidente actual, decidíu, según paez, a meter al so país en más líos de los que, inclusive conociéndolu, podía naide sospechar; col bloquéu del Estrechu d’Ormuz, consecuencia previsible del ataque a Irán, como asonada cabera, pel momentu.

Esti imperiu tien a Thomas Jeffersson como un de los sos pais fundadores y redactor de la Declaración d’Independencia, au facia especial atención nos drechos del home. Poseyía y caltuvo más de 600 esclavos, viviendo y procreando seis fíos, con una esclava medio xermana mulata de la muyer, a la que nin siquier manumitió enantes de morrer. Un prenda de los drechos humanos, dicho esto ensin cayer nel pecáu de presentismu.

Y ye que l’individuu fo quien acuñó un de los oximorones más renomaos de la historia, al denominar a los EEXX como “imperiu de la llibertá”, y ye que, van convenir conmigo, combinar imperiu y llibertá ye un imposible, como yá dexó esplicao Tucídides tocantes l’imperiu ateniense creáu por Pericles, y remontome tan lloñe pa eludir susceptibilidaes más averaes.

El conceutu imperial ta reñíu cola llibertá, a lo menos de les entidaes subordinaes, y xeneralmente de los sos habitantes, como comprobaron los nativos norteamericanos, masacraos nun xenocidiu qu’algamó hasta finales del sieglu XIX, o los sos vecinos mexicanos, que perdieron la mitá del territoriu, como entidá política, y los sos habitantes la propiedá de les sos tierres en beneficiu de los colonos blanquinos. L’aición imperial algamaría práuticamente tol hemisferiu, que sofriría les botes de los marines dende finales del sieglu XIX hasta los nuesos díes. Siempres por amor a la llibertá.

Y ye que, en realidá, sí que son un imperiu, y yo, funcionalmente, aceuto que ye’l menos malu ente les opciones que tenemos nós, españoles, inclusive europeos, como paraugues baxo’l que abelluganos, al preciu que, d’una forma u otra, haya que pagar; pero lo que me toca los pies ye la so contante apelación a la llibertá; conceuto qu’ellos, dende la so nacencia y  l’“avance haza l’oeste”, matando indios pel camín, esfiltrayen, alzando nel so llugar un imperio d¡hipocresía.

Raúl Suevos

A 29 díes vencíos d’abril de 2026

Torna en castellán en repdiv.blogspot.com