Alló pela segunda metá de los noventa del sieglu pasao, desempeñabame yo como voceru d’EUROFOR, la Eurofuerza Operativa Rápida Europea, un cuartel xeneral divisionariu formáu por Italia, Francia, Portugal y España, allugáu en Florencia, cuando una mañana llegó un paquete pal comandante, el xeneral Xuan Ortuño, qu’espertó les sospeches ente los que formábemos el so gabinete. Sollertaos los carabinieri, pocu dempués un equipu de Tedax remató la incógnita con una radical esplosión controlada. Y ehí quedó la cosa pa nós, que, cola esperiencia trayida d’España, punximos en conocimientu del ministeriu lo asocedío, anque enllenu de solombres pel momentu.
Meses dempués ETA sacó un de los sos boletines dando cuenta d’un llibru bomba unviáu al xeneral Ortuño, y, supongo que faltos de meyor productu fresco, les redacciones punxeron en marcha, dalgunes más rápides qu’otres, y asina, malapenes tres hores dempués teníemos a Antonio Pelayo, corresponsal d’Antena 3 en Roma, picando a la puerta.
A min tocóme trepar col asuntu, evitando al comandante, y na curtia entrevista intenté como meyor pude “vender” el productu d’EUROFOR, amás d’esplicar que nel so momentu informamos del asuntu a la superioridá. Y yo quedéme mui tranquil cola mío contribución. N’España la cosa dio pa un planu brevísimu de malapenes segundos y la insistencia de la direutora del informativu nel fechu de que nun se informara a España, lo que nun yera cierto. Y aquello yá nun me prestó, pero ye lo qu’hai.
A Pelayo seguí viéndolu nes pantalles col avezamientu que marcaben les noticies, y munchos años dempués, munchos, tevi conocencia de la so condición sacerdotal, dalgo qu’agora, cuando’l so nome sal asociáu a un fechu xudicial de connotaciones sexuales, paez ser lo más importante de la so persona, mui penriba del so otru aspeutu profesional.
Güei mesmu redunda la noticia, y yo que siempres me quedo cola mosca tres la oreya col cómo se traten dalgunos asuntos, foíme a comprobar n’internet qué tratamiento-y daben, resultando que, mayoritariamente, los medios despinten, a lo menos nel titular, la so pertenencia al gremiu periodísticu. Y ye que la cosa vien de lloñe.
La mio percepción, aneya de munchos años, ye que militares, especialmente guardiaciviles, y sacerdotes, son blancu especial de los sistemes informativos, como si nes redacciones pensaran qu’eso multiplica l’efeutu de la noticia; dalgo que nun asocede cuando’l delitu, o la so presunción, afeuta a calquier otra profesión; dándose’l casu, especialmente colos políticos, que na redacción de la mesma s¡intente separtar esa condición pa asacala a la esclusiva personalidá del individuu. Coses.
Raúl Suevos
A 17 díes vencíos de mayu de 2026
Torna en castellán en repdiv.blogspot.com
No comments:
Post a Comment