A munchos de quienes esto lleen
el nome de Giovanni Falcone pocu o nada-yos va dicir, per edá y tamién per alloñanza
xeográfica. Yera un procuratore, lo qu’equí conocemos como xuez instructor. En
Sicilia, nos tiempos más duros de la Mafia, particularmente la daquella rexón
italiana, pues pa los que nun lo sepan, voi dici-yos qu’esi fenómenu delictivu
tien espresión en tol país, con denominaciones estremaes según la rexón, Camorra,
Ndrangheta, Sacra corona, etc.
Na sociedá italiana’l so nome remueve
les coraes, pola so fin, la masacre de Capaci, una bomba nel sosuelu de l’autopista
qu¡acabó cola so vida, la de la muyer y los sos escoltes, y, sobremanera, porqu’él
foi’l que punxo en pie la figura del arrepentíu na xusticia italiana, sofitáu pel
so collaciu Borellino, al que la mafia siciliana diba asesinar pocu dempués d’él.
L’arrepentíu, siempres por
conveniencia, amenó grandes controversies na xusticia italiana, y tamién na
sociedá del país, que venía sofriendo’l cáncer mafiosu dende munchu tiempu atrás.
Finalmente foi aceptáu, y anguaño ye una figura llegal, colos sos claroscuros
personales, pero que, en fin y en pos, tien sentao xurisprudencia y exemplu non
namái ellí, n’Italia, sinon tamién en más países, como España.
Vien esto a cuentu de los discutinios,
a nivel periodísticu fondamentalmente, tocantes la figura del individuu Aldama,
al que, d’una parte y según la color político, auguren un gran amenorgamientu
de pena pola so colaboración, y d’otra, nieguen la mayor, aduciendo la so poca
importancia pa la resolución de la causa. Ye lo qu’hai.
La realidá ye que, los llegos en xurisprudencia
y simples espectadores de la cosa pública, ensin el concursu del susodicho, y magar
les innumerables grabaciones del porteru del puticlub, ye difícil que llegáremos
au tamos güei, esto ye, a la espera de la sentencia qu’en tiempos vinientes va
dictar la sala del Tribunal Supremu; poro, y si, como dicen, la soberanía y el
so brazu xusticieru, reside na ciudadanía, o lo que los populistes llamen pueblu,
conviennos que al talu Aldama’l Supremu-y valore la cooperación, anque seya
interesada, y que-y rebaxe al máximo la pena que pudiera corresponde-y, porque,
con ello, van abrir la puerta a otros arrepentíos, como n’Italia, onde gracies
a esa figura, imperfeuta como la vida mesma, tienen conseguío caltener a raya,
mal que bien, a esi fenómenu que chupa la sangre del país, y qu’equí se llama
corrupción.
Confío nel Supremu, en tol
sistema xudicial diría, y espero que estiren la llei al máximo de lo permitío,
pela cuenta que mos tien.
Raúl Suevos
A 10 díes vencíos de
mayu de 2026
No comments:
Post a Comment