El calendariu y la defensa de Zapatero

 

Pocu tien durao la resaca de les eleiciones andaluces. Llega’l xuez ya imputa, enantes llamabenlo indagao, a Xosé Lluis Rodríguez Zapatero, el de la ceya, el del bon talante, el d’aquello de que nun había crisis, y casu d’habela nós tábemos preparaos, el de que un pocu d’encrespadura vien-y bien al partíu, el de tantes coses… y cola so imputación too pasa a segundu planu, hasta los iniciales dolores de tiesta del señor Moreno cola formación del so gobiernu, too.

La imputación d’un espresidente ye dalgo a lo que, aínda, nun llegaremos. Lo más averao foi aquella equis de la batalla antiterrorista. Pero ye que lo d’agora, amás, resulta como muncho más cutre. Tratamos un asuntu de cuartos, tan enxitosos como los de Pujol, porque nun yeren caudales pal partíu, sinon pa la buchaca particular, y ello da-y unos tintes más miserables. Ye lo qu’hai.

El casu ye que, el partíu de los cien años d’honradeza, atópase con una papeleta mui complicada per delantre, a lo menos hasta llegar al capitulu de “esa persona de la que vusté me fala”, que seguramente va llegar. Porque col calendariu que s’avera esti asuntu pue llevalu, como-y asocedió’l domingo n’Andalucía, a descender a cotes eleutorales nunca enantes vistes nel sistema políticu anguaño.

Les eleiciones xenerales nun pueen dir más alló d’agostu del 27, anque en mayu son les municipales y les alcaldes, los socialistes, temen qu’al so secretariu xeneral y presidente del gobiernu pueda ocurrirse-y xuntales pa amenorgar daños, a costa d’ellos, poro dalgunos, col señor Page a la tiesta, y supongo que tamién el señor Barbón, prefieren adelantales a marzu. Veremos.

Mentantu tenemos per delantre’l xuiciu del hermanísimu, qu’habría d’acabar en xunu; y queda pendiente la sentencia d’Ábalos y la so panda, que según dicen debería conocese enantes del branu, y nel so conteníu total pa septiembre; a ello van-y siguir les actuaciones tocantes la posible financiación irregular del partíu socialista na Audiencia nacional; ensin escaecenos de les peripecies de la señora del señor presidente de gobiernu, que lo que ye güei nun se sabe cómo van dir acabar pero que son un filón periodísticu. En fin, una velea socialista.

Agora llega Xosé Lluis colo de so, y nun queda otra. Nun queda otra que defende-lu a muerte, na esperanza que, conociendo los tiempos xudiciales nel nuesu país, ente pieslle del sumariu, señalamientu de fecha y xuiciu, too se vaya más alló de les posibles feches fatídiques del añu viniente. Hai que defendelu a toa costa.

Raúl Suevos

A 19 díes vencíos de mayu de 2026

Torna en castellán en repdiv.blogspot.com