Ayeri tevi, metanes el camín ente
Xixón y Uviéu, nuna xinta con unos amigos. La pitanza, nestos aconceyamientos
periódicos, casi siempres ye escelente, pero, lo qu’en toles ocasiones algama
cotes de perfeición ye la sobremesa, na que pola edá media venerable de los
participantes yá nun hai la libación d’espirituosos típica y abundosa que notros
tiempos carauterizaba esta mena de conciliábulos, y nel so llugar ye’l rellatu
de dalguna anécdota simpática la que lo sostituye.
Ayeri, uno de los participantes, xugador
de golf esperto y veteranu, rellatómos cómo tiempu ha, en visita a un campu del
sur d’España, conocíu pola so dificultá y llargor, decidió contratar un buggy pa
la so xornada deportiva, atopándose cola sorpresa de que toos taben yá arrendaos.
La encargada del guardacarros, arremangosa ella, suxirió-y que falase con un paisanu
allugáu entós na zona de práutiques, y que diba solu. El so nome y apellíu
pertenecía a una renomada familia de banqueros nacional. Y haza ellí se dirixió
el nuesu xugador falancieru.
Autopresentáu y una vegada
contada la circunstancia, l’usuariu titular del buggy accedió a compartir el
vehículu y el nuesu collaciu de comida, por cortesía obligada y magar que’l
cacharru yá taba pagu pol primer, pensó que lo de so yera ofrecese a pagar la so
parte, pensando nel so fueru internu que’l xugador opulentu fanegueru diría que
non a la so propuesta. Pero non, la rempuesta inmediata foi “son 18 euros”, sacando’l
nuesu valiente carballón un billete de 20 euros, que l’otru garró darréu mientes
dicía que “nun llevo cambiu”; rematando’l d’Uviéu, grandón él, “nun te
preocupes, pa min eso nun ye un res”.
A esi altor de la historia, nin
que dicir tien que’l restu de la mesa tábemos yá esllagrimando de les gargayaes,
lo que facía que de les otres tornaren la tiesta, intrigaos por tala sonadiella.
Unes rises que diben en consonancia cola bayura inmensa que se-y supón a esa
familia de banqueros. Anque aínda mos quedaba per conocer el remate del cuentu.
Y ye que, un par de selmanes más tarde, de vuelta yá na capital asturiana, la
prensa traxo-y al nuesu amigu que’l so collaciu de buggy garrarenlu les
autoridaes tratando de sacar d’España nel so yate, pa la so venta nel estranxeru,
un Goya de la so propiedá, lo que facía qu’aquellos 20 euros parecieren-y entá
más paxareros.
El nuesu collaciu acabó’l so rellatu
manifestándonos que, sicaís, y como solíen dicir les nueses madres y güeles, ye
colos detalles pequeños como unu se va faciendo ricu. Ye lo qu’hai.
Raúl Suevos
A 14 díes vencíos de
mayu de 2026
No comments:
Post a Comment