Si vustedes dediquen un tiempu, non muncho, al estudiu de la emancipación hispanoamericana, van escubrir darréu una figura paradigmática: el caudillu. Un home que, xeneralmente, dende unos oríxes humildosos, y casi siempres pente medies la fuercia armada, acaba faciéndose col poder políticu de la nación ñueva, y caltienlu demientres dellos años baxo un faramacu de sistema democráticu nel que les eleiciones, más o menos trucaes, teníen un valir especial.
Ñacieron inmediatamente dempués de la nacencia de les naciones ñueves, con unes constituciones, munches d’elles inspiraes na española de 1812, y con unes sociedaes que casi desapaecieran na so composición anterior a les guerres. Nun teníen un referente social, nin cultural, nin moral, pues lo español, d’onde toes elles nacíen, debía ser condergáu, baxo una mínima coherencia; y lo indíxena yera despreciao poles clases criolles, por consideralo inferior. Una situación difícil y complicada, na que les clases humildoses nun cuntaben un res. Menos aínda los indíxenas, que si nun yeren eliminaos calteníense nun estáu de semiesclavitú.
El sieglu XX traxo a casi tolos países la concencia política y con ella los movimientos revolucionarios, col so refluxu de sufrimientu pa gran parte de la población; y, pa un observador ye fácil decatase cómo, col amparu siempres d’unes constituciones que se camuden frecuentemente n’interés del poder de turnu, el pendilexazu políticu ye casi una constante naquel hemisferiu. Un caudillu modernu, que yá nun necesita siempres del uniforme militar, pero sí se cubre con una capa de populismu, algama’l poder; Evo Morales, Correa, Bukelé, Castro, Trujillo, Chávez, los Kichner, Milei, López obrador; y lu caltién hasta qu’un fuerte pendilexazu políticu lu espulsa del so tronu.
Agora, en Colombia, asistimos a una historia yá coñecida. Dos aspirantes, un populista d’esquierdes y otru de dreches arrequexen a la única postulante aparentemente racional, y ello asocede porque’l cuerpu eleutoral, col atavismu de dos sieglos, gueta inconscientemente un caudillu que los dirixa, lo qu’otra vegada va llevalos a la frustración y el desesperu. Ye lo qu’hai.
El caudillismu produz una atraición tan potente, nel so disfraz anguaño de populismu radical que, hasta los EEXX, enantes referente y paradigma de too occidente, abracen esa forma irracional de gobiernu, con un esponente que nel futuru van estudiar les escueles de ciencies polítiques, personificáu en Donald Trump, y que paez atopar émulos notros países y circunstancies. Tamién n’Europa.
El caudillismu/populismu namái pue alcontrar respuesta na educación política de la ciudadanía, dalgo que, en xeneral, les sociedaes modernes paecen tener descuidao, coles consecuencias que se pueen observar güei.
Raúl Suevos
A 3 díes vencíos de xunu de 2026
Torna en castellán en repdiv.blogspot.com
No comments:
Post a Comment