Nun ye’l campu de golf del Tragamón un llugar mui llamativu. Sacantes los sos veceros habituales, pasa desapercibíu pa la mayoría del personal pues, anque se pue dicir que se trata d’un campu urbanu, atópase como arrequexáu ente distintes instalaciones o infraestructures; al norte’l campus tecnolóxicu de la universidá da-y un toque de modernidá; pela cueta, al suroeste, les frondosidaes del xardín botánicu, col so aspeutu selváticu na salida del ochu, proporcionen-y un desconamáu aire de naturaleza primixenia. Peles sos partes baxes el riu Peña Francia, humildosu, pero con un ciertu toque de naturaleza virxen, au aínda se ven families d’ánades y dalgunes garcetes, completa un cuadru que fae que los xugadores más frecuentes lu aprecien enormemente y nun tean dispuestos a camudalu pol so hermanu mayor, que lo güeya altivu dende los altores del Infanzón.
Estos díes, tres los vientos del nordeste que casi lu agosten la selmana pasada, nun s’amuesa col so meyor semblante; y la pequeña fola de calor qu’acabamos de sofrir tien venío pa rematar la faena, a la espera de que dalguna nueche d’orbayu apangue la sequía de les sos cais amarillentes. Pero pocu importa too esto si la mañana s’muesa benina pal xugador aficionáu, en dalgunos de los lances más repetíos y frecuentes, como la salida del dos.
Ye ésta, la segunda cai del campu, tamién la segunda en dificultá, pues metanes la salida, un plataneru descomanáu, xigantescu a la vista del xugador medianu, “l’arbolón”, abrabanca’l disparu direutu haza alantre, lo qu’obliga al golfista a executar un guelpe en “fade”, esto ye, a construyir una parábola controlada na que la bola vuela primeramente a la esquierda pa dir progresivamente acombándose haza la drecha, p’acabar nel llugar que’l xugador preestableciera.
Ye un guelpe que na circunstancia del Tragamón, esto ye, col riu llendando la cai pela esquierda, dificulta enormemente l’acción, y nel mio casu llevaba yá un tiempu amarutándome l’entamu de la mañana, con incontables boles unviaes al augua, pa sustu de les poques y pequeñes truches que revicien del afluente del Piles. Güei, por fin, y en compañía de dos collacios, pa dar fe, tevi’l placer de dibuxar esa llínea que separta la frustración del gozu, lo que tien coadyuvao, quiciabes pola euforia, a que’l restu del xuegu discurriera per niveles inusualmente altos pal mio nivel golfísticu.
Fue namái un momentu, mañana voi saber si casual o frutu de los munchos intentos previos, pero la satisfacción y el placer, anque efímeros y fugaces, ficieron d’ésta, una partida, un instante, pa l’alcordanza.
Raúl Suevos
A 25 díes vencíos de xunu de 2026
Torna en castellán en repdiv.blogspot.com
No comments:
Post a Comment