En Cuba nun llueven iguanes

 

Pudiera paecer una noticia por ausencia u omisión, puesto que, na Florida vecín, tiñazada estos díes por un vientu xélidu del Norte que fae baxar les temperatures hasta estremos pocu usuales per aquellos pagos, los periódicos tienen abierto cola información del llovíu d’iguanes, socedíu que, por inhabitual, anque non únicu, conviertese ca vegada qu’asocede en noticia de primer páxina. Y ye qu’ellí, en Florida, les iguanes son abondo abondoses, yá que, inofensives, tienen algamao en dalgunos casos estatus d’animal de compañía, y poro, cuando les temperatures baxen más de lo que’l cuerpu de los animalucos, de sangre frío, puede soportar, les iguanes defiendense entrando n’envernía repentina, lo que xunío al fechu de que la mayoría son de la rama arborícola de la familia, fae que, de guelpe, se vayan cayendo de los árboles, pa sustu y sorpresa de más de unu.

En Cuba tamién hai iguanes, poques, dicen que’l gruesu de la población camudárase en primer platu demientres el Periodu especial, aquel que traxo la desapaición de los sosidios únviaos dende la URSS, a la so vegada desapaecía ente’l pesu de la Perestroika de Gorvachov; pero les qu’aínda sosisten deben tar bien envernaes pues na Islla bonita tienen algamao estos díes récord de temperatures baxes; con poca o denguna ropa d’abrigu, pues ellí ye tradicionalmente innecesaria; con poques caloríes nel cuerpu, pues ellí la caza de la proteína nun ye un deporte sinon un exerciciu de supervivencia; con cases ensin  pieslles operativos en ventanes y puertes, pues ellí’l clima tropical aconseya que corra l’aire, sacantes nestes contaes ocasiones; con veinte hores de corte eléctricu en L’Habana, aínda más en provincies, lo que torga d’intentar calefactar les estancies por esa vía.

Too ta en contra de Cuba, entamando por esi réxime depredador y tiránicu, más entá que’l chavista, que caltien a los sos ciudadanos nuna situación de semiesclavitú dende va yá más de sesenta años. Tampocu l’interés económicu ye un sacaliñu pa que l’ogru naranxáu s’implique con fondura, dalgo que munchos cubanos esperaben yá na primer presidencia; ellí l’azúcre yá nun funciona como nel sieglu pasáu; l’interés turísticu ye rellativu n’un Caribe enllenu de sableres paradisíaques; y la señardá de los cubano-americanos, de los que Marco Rubio ye’l primer representante, nun llega pa una aición en fuecia. A lo menos per agora.

Probes cubanos que nun pueden envernar, y yá nin siquier-y importen a la esquierda regresista d’Occidente que tien bandieres más cool a les que siguir, y Díaz Canel nun ye Fidel. Ye lo qu’hai.  

Raúl Suevos

A 4 díes vencíos de febreru de 2026

Torna en castellán en repdiv.blogspot.com

Nun hai remplazu, pero hai peligru

 

Paecía que les folaes d’indignación popular que los “sucesos” de Gaza provocaron, orquestaes pola esquierda regresiva, pasaren a meyor vida tres la fin de los combates sobro’l tarrén y la tratanza viniente pal intercambiu de rehenes y calábres d’una y otra parte. Agora entrárase na etapa de les elucubraciones urbanístiques de la mano del xenru del ogru naranxáu. Dalgo más prosaico, anque menos sangrín.

Ellí averao, na Siria vecín, agora bendicida con una visita a la Casa Blanca del so líder, yihadista islámicu reconvertíu n’estadista, les coses de la política aínda tán lloñe d’apangase, pues ente’l cobru de la “xusta” venganza escontra la etnia de los Assad, anguaño sometíos a paecida persecución a la qu’ellos perpetaron, tamién se trata de “reasitiar” a los peshmergues kurdos, emburriaos haza’l norte poles fuercies de Damasco y abandonaos polos sos “padrinos” yanquis. Coses del petróleu. Ye lo qu’hai.

Y agora, al paecer, ye’l turnu de los chiitas duodecimanos, ¿o yerén septimanos? que gobiernen la vieya Persia cola man dura, sangrina, que namái los rexímenes teocráticos son a emplegar, pues ye sabío que, nel nome de Dios, too, hasta les fechoríes mayores, se puede xustificar.

Y ye que, si vustedes se fixen, l’Islam, creyencia relixosa o política, lo que vustedes prefieran, impera nun númberu de países descomanáu, dede la lloxana Oceanía hasta les costes atlántiques; dándose’l casu de qu’en dalu d’ellos se da lo que nós, Occidente, entendemos como sistema democráticu. Más aínda, ellí au hai Islam dase tamién l’ausencia de llibertá individual, entendía esta como la llibertá de pensar, lleer, escoyer, o simplemente dise.

N’Europa, heriede d’un humanismu sofitáu no griegu, latín y cristianu, tenemos lo contrario, llibertá absoluta, espayada si vustedes quieren por redes de poder más o menos sutiles o evidentes, pero llibertá. Quiciabes poro mos lleguen folades d’emigrantes dende esos países qu’enantes citábemos, y que vienen con unes vivencies político-relixosas que, una vegada en posesión de drechos civiles, pueden representar un peligru pal nuesu sistema políticu, y más importante, de valires.

Nun se pueden piesllar les puertes ensin renegar de los nuesos propios principios, pero sí ta al nuesu algame’l cambéu de les lléis de mou y manera que prevengan posibles futuros peligros, como sedría, por exemplu, la prohibición constitucional de partíos de raigañu relixosu o étnicu, dalgo que yá, n’España, a nivel municipal tendría consecuencies.

L'Islam ye totalitariu, supremacista y universalista, conceutos que choquen col humanismu europeu, y les nueses instituciones deben defendese.

Raúl Suevos

A 3 díes vencíos de febreru de 2026

Torna en castellán en repdiv.blogspot.com