Supongo que la mayoría de quienes lleen estes llínees tendrán oyío falar de Phill; esa marmota de Pensilvania, un de los estaos del norte de los EEXX, y poro de clima abondo frío, que tolos años mos trayen a los medios de comunicación pa contanos, en función de lo que tarda n’abellugase otra vegada na so lluriga, del aportar de la primavera, o, visto dende l’otru llau, de la fin del hibiernu.
A min, esti domingu, garróme cola misión autoimpuesta de dir a la caza y captura de un par de sfogliatelle; postre italianu que-yos recomiendo fervorosamente, y que de la mano d’unos italianos tien llegao a Zaragoza va bien poco, donde paso estes feches de borrasques y vientos casi furacanaos. Asina que, cola fuercia que da’l tener un oxetivu qu’algamar, llancéme a atravesar media ciudá, entamando pela plaza de San Francisco.
Ellí, nesi centru neurálxicu de la ciudá en aspeutos estremaos, reencontréme col mercadín tradicional de monedes y sellos, que va yá tiempo que se tien ampliao a cartes de xuegos de rol y semeyantes, pero, pa la mío sorpresa, descubrí agora’l puntu d’intercambiu de cromos; una zona onde un montón de guahes, acompañaos de los sos pás -poques madres vi- dedícase a guetar y camudar les pieces que-yos falten pa completar les sos coleiciones de futbol, les de tola vida.
Dempués, camín del barriu de Delicias, con un cielu azul tapizáu de rápides mases d’algodón blancu, fo’l cantu de les grulles lo que llamó la mío atención. Díben en tolo alto ¿a doscientos metros? En formaciones bien nutríes n’uve, soltando los sos gritos agudos, que supongo-yos servirán p’allugase dientro de la organización y nun perder el ritmu. Pasaron varies d’elles camín de los Pirineos, camín de les sos zones de crianza nel norte d’Europa y escaeciendo per unos meses les zones d’hibernación españoles, no que ye y supón un anunciu, normalmente muncho más efectivu, anque menos televisivu, que les salíes añales de la marmota Phill.
La esperiencia de los vieyos, a lo menos nesta tierra, diz qu’esti movimientu, el de les grulles, ye un indicador casi infalible del avance estacional, y supongo qu’en conxunción colo que los meteorólogos anuncien, que l’anticiclón de les Azores, por fin, posicionase na so zona tradicional. Podríemos pensar que l’aparentemente inagotable tren de borrasques atlántiques ta a puntu d’esmorecese per esti añu. Vamos ver.
Ente grulles y marmotes, y magar toles que tenemos nel Pirinéu, creo que, pa los urbanites, son les primeres muncho más práctiques y abordables. Ye lo qu’hai.
Raúl Suevos
A 15 díes vencíos de febreru de 2026
Torna en castellán en repdiv.blogspot.com
No comments:
Post a Comment