La fecha escapóse per unos pocos díes. Fo’l 13 de febreru de 1972, en Sapporo, Xapón, cuando Paquito Fernández Ochoa ganó la medalla d’oru nel Slalom, pa sorpresa del mundu y, particularmente, de los españoles. Yera mui bonu.
A min l’asuntu garróme n’Uviéu, reviciando l’internáu de los escolapios del Loyola, pero con salvoconductu pa los domingos escapanos a Payares, nel mío casu col autobús del CAU, el club atléticu universitariu, a esquiar, o dalgo paecío pa los que’l presupuestu namái mos llegaba p’avanzar en plan autodidacta.
Esperando la salida del autocar, alló enrriba, a l’altor de Llamaquique, tuvimos tiempu pa ver en direuto’l descensu, creo recordar que la segunda manga, de Paquito. Una emoción que mos llevó luéu en volandes naquel vieyu Setra Seida hasta’l Brañilín. Ellí, en Payares, la realidá del autodidacta empapó los sufríos pantalones de pana, y ablandó les botas de cueru de segunda mano. Poco importaba, la mocedá y les ganes podíen con casi too, anque aínda nun se pusiera en marcha lo del skipas y l’encarregáu del telearrastre de la Picorota cobrara los duros direutamente a la so faldriquera de cueru. Otros tiempos, tan vieyos que nun tengo alcordanza de cómo se pagaba la siella del Cuitu Negru.
Güei contemplo, tamién en direuto, el triunfu xeneral del nuesu sky de montaña, nomáu skimo en términos de competición deportiva, y no que, visto la eshibición d’anguaño, somos una potencia. Alló, en Bormio, metanes los Alpes italianos, pudimos esultar, dempués de 54 años, col desempeñu maxistral de los nuesos esquiadores, anque, pa min, la gayola s’eleyera cola noticia de un vieyu amigu, montañeru militar, que güei, sorpresivamente, perdío la batalla cola enfermedá na que taba empeñáu. Ye lo qu’hai.
La eshibición, espectáculu deportivu, tiénme paecío ablucante dende’l puntu de vista visual, anque la nevada que cayía apagara un pocu la imaxe, pero dos minutos y mediu, que ye lo que dura, más o menos, la prueba olímpica, déxamos un ciertu tastu a pocu a los que tenemos reviciao y sofrío les subíes agotadores y los descensos inolvidables na nieve virxen. Unes imáxes, les olímpiques, que me lleven a pensar que, quiciabes, nes vinientes, organizaes por Francia, potencia nestos deportes, ye posible que veamos apaecer una prueba na que se pueda apreciar más y meyor la dureza, l’esfuerciu y la belleza d’esti deporte.
Mentanto, reviciemos l’ésitu de los nuesos esquiadores, l’oru de Oriol y el bronce d’Ana.
Raúl Suevos
A 19 díes vencíos de febreru de 2026
Torna en castellán en repdiv.blogspot.com
No comments:
Post a Comment