El mundiu avanza que ye una barbaridá. Tantu qu’aquelles zarzueles, como la de La Palomba, au s’acuñó la frase de marres refería a les ciencies, tán más pasáes que la mayoría de doctrines polítiques que movieron el mundiu del sieglu XX y entamu del actual. Too se mueve, avanza, camúdase, o nel peor de los casos, adáptase con ropaxes o apariencies nueves. Ye’l signu de la historia, la so evolución.
Nel ámbitu políticu, una amuesa impactante ye’l fechu de que, nel interior del partíu que sofita al gobiernu, esistan movimientos pa espulsar a Felipe González, pai de la so versión moderna, pola so actitú de conderga énte la corrupción anguaño de la so vieya formación. Coses veredes, amigu Sancho. Cervantes dixit, creo.
Y ye que Felipe, aparte de pol esgaste natural, cayó pelos casos estremaos de corrupción na so contorna, que produxeron una erosión que les urnes nun soportaron. Y el pelotazu, la so cultura, personalizao nel so ministru Carlos Solchaga, tevo la mayor parte de la responsabilidá.
Aquella España, tan camudada que “nun la reconocía nin dios”, yera, según el ministru, el país au más ricu se podía facer unu en menos tiempu, esto ye, con un bon pelotazu, y asina mos fue a la mayoría, y asina-y fue a unos pocos. Agora, cuarenta años dempués, paez que vienen tiempos de pelotazos, otra vegada, en versión 2.0.
Esta vegada ye la Defensa, con mayúscules, que presionada pol ogru anaranxáu de Washington, pel oeste, y pol estalinista Vladimir pel este, vien llanzada pa que, a nivel individual los países, y colectivu la Xunión Europea, se promuevan programes d’armamentu multimillonarios, que magar la so necesidá estratéxica, cuerren el riesgu d’acabar en fracasos industriales a costes descomanaos. Les prises nunca son bones pa la Defensa.
N’España los marinos tiénense descolgao con un proyeutu de portaviones, ensin falar, pel momentu, del grupu naval que debe protexelu ¿Ye esto el país de Xauxa? ¿Pa qué? En fin… pero a nivel rexonal ehí siguimos con esi trastu de nome Dragón, qu’encanta al presidente asturianu polos puestos de trabayu que conlleva, pero que, nel campu de batalla de los modernos drones nun ye más qu’un ataúd d’ocho ruedes pa infantes. Y no llocal, la compra del Tallerón, avísamos de cómo de rápido va l’asuntu esti, el del pelotazu.
Los hermanos Escribano, un taller de calderería va treinta años, yá controlen un gran paquete d’Indra, que yá presiden. Agora trátase de fusionar les dos empreses, cuestión de meses, pa dempués, quién sabe, asaltar Telefónica, au campexa l’home puestu por Sánchez, dempués de pasar per Indra. Suena too a pelotazu.
Raúl Suevos
A 13 díes vencíos de xunetu de 2025
Torna en castellán en repdiv.blogspot.com
No comments:
Post a Comment