Sufrencia y paternidá

 

Non, nun toi escribiendo sobro un embaranzu sorpresivu o inesperáu; tampocu sobro les nueches d’insomniu ineludibles que suelen acompañar al fechu na mayoría de les families; non. L’empareyamientu d’estos dos conceutos tien llegao a la mio tiesta ente les penúltimes noticies sobro los problemes, rebexos, desconsuelos, taquicardies, disgustos, y en dalgunos casos drames, que tienen provocao los más recien fallos producíos na nuesa rede de tresporte ferroviariu. Y voi di-yos por qué.

Lo de la sufrencia ye obligao cuando oyimos a los distintos reporteros que les cabeceres informatives únvien a los diferentes puntos de la llínea férrea, incluyendo los descampaos au dalgunos trenes se tienen quedao paraos, entrevistar a los viaxeros. Toos, o a lo menos una mayoría, paecen aceutar l’estáu de incertidume nel que se tien convertío’l viaxar n’España nesi otrora envidiao pol restu d’Europa, del mundiu según dalgunos, AVE, y qu’anguaño camudóse nuna fuente de respingos y disgustos mayores pa los que s’atreven a subir nes sos plataformes, especialmente na llínea que dende Madrid baxa al sur, y que fo la primer n’abrir alló pel llonxanu 1992.

L’Alta velocidá sigue siendo cara, pero yá nun ye tan rápida, inclusive, si garres la bolina negra, puede suponer un retardu abondo como pa esbaratar unes vacaciones preparaes con mimu, tiempu y aforros importantes. Pero nun importa, los españoles aguanten too, o a lo menos eso ye lo que debe pensar el gobiernu, pues el so representante nel ramu, el tantes vegaes gritón ministru Puente, davezu más dicharacheru que Gustavu, nun atopa, metanes esa paternidá tardana, que-y tien otorgao una baxa llaboral  de varies selmanes, el momentu de salir a les redes pa tranquilizar, o a lo menos dar dalgún tipu d’esplicadura, a esos usuarios abandonaos demientres delles hores metanes les planicies manchegues, o nes sales d’espera atestaes de Madrid y Sevilla. Nun hai motivu pa sacalu del so mutismu. Si a lo menos dalgún políticu opositor se viera atrapáu, como n’ocasiones anteriores. Pero nin eso.

Sufrencia y paternidá. Sufrencia énte una España que yá nun aguanta la propaganda gubernamental y, corrupción aparte, dexa ver les sos entreteles, que nun son otres que les d’un país d’apariencies más que realidaes, al que los acontecimientos van acabar por despertar de sópito, esperemos que lluéu. Y una paternidá nes altes maxistratures de la nación que, baxo una pantalla de legalidá, dámos tamién una raxona deplorable de la clas política que mos gobierna, que, en lenguaxe modernu, pasa de too, sacantes lo que seya la permanencia nes sos poltrones. Ye lo qu’hai.

Raúl Suevos

A 2 díes vencíos de xunetu de 2025

Torna en castellán en repdiv.blogspot.com