Pueblu vieyu de Belchite

 

Va cuantayá que visité per primer vegada’l pueblu, les ruines. Casi unos cincuenta años, como cadete, mozu, formando parte d’una actividá académica sobro los campos de batalla vieyos de la nuesa Guerra Incivil. Aínda recuerdo la intervención d’un vieyu profesor que fuera axente de tresmisiones, un puesto de los más peligrosos, demientres el cercu de Belchite y la ofensiva republicana fallida sobro Zaragoza. Toa una esperiencia aquella escursión.

La otra alcordanza ye la de la puerta de la que fuera ilesia formosa daquella villa. Nella, escrita con tiza, llucía una copla curtia: “Pueblu vieyu de Belchite, yá nun te ronden zagales, yá nun s’oirán les xotes que te cantaron los mio páis”. Una declaración que lluéu supe dio pie pa una xota qu’aínda güei se canta de cutiu n’Aragón. Ca vegada menos, pues ca vegada hai menos zagales.

Estos díes caberos llégamos la noticia de la desapaición, autoinflixida dicen, de David Lafoz, un mozu de 27 años de Belchite que se ficiera conocíu estos años poles sos intervenciones nes manifestaciones pola cuestión agraria, y tamién por ser de los primeros en presentase col so tractor na zona de Paiporta tres la Dana tarrecible de va dellos meses. Una noticia absolutamente dramática.

El zagal dexó escrito, al paecer, que “taba cansáu de trabayar diez y ocho hores pa nun poder vivir”, y ehí, más alló de la desgracia personal tremenda que supón la so perdida, ye au s’alluga’l drama, porque detrás d’ello subyaz una presión económica voraz sobro los agricultores que llega dende tres frentes a lo menos: los costes de producción ca vegada más elevaos, la presión a la baxa de los precios por parte de los grandes grupos agroalimentarios, y la competencia, pa munchos desleal, de los productos que lleguen dende l’esterior, con especial mención a Marruecos.

A tolo anterior convien, non yá amestar sinon anteponer, la presión alministrativa de tou tipu qu’aporta pente medies les polítiques agraries de la Xunión Europea, que na mayoría de los casos convierten la vida del agricultor pequeñu nuna velea difícil o casi imposible de xestionar. El zagal de Belchite nun pudo con too esto y tiró la toalla. Ye lo qu’hai.

Les polítiques modernes muevense averáes de les bolses potenciales de votos, y nel campu hai pocos, tantu n’Aragón como nos valles asturianos, ca vegada más despoblaos, y, de xacíu, con menos futuru. Namái hai que güeyar los pocos neños que paseen per Xixón, y los perros que los suplanten. Ehí ta’l futuru, y la política.

Descansa en paz, David.

Raúl Suevos

A 11 díes vencíos de xunetu de 2025

Torna en castellán en repdiv.blogspot.com