Lo de la cuadratura ye un problema que, dicen, yá intentaben resolver los babilonios, y a lo llargo los sieglos matemáticos de toa mena siguieron intentándolo de baldíu, hasta qu’a finales del s. XIX un eruditu alemán, y gracies a aquel pernomáu númberu pi, algamó a demostrar que tábemos énte un imposible. Ye lo qu’hai.
Va un par de díes, por embargu, ensin formación matemática especial, el nuesu nacional Alberto Feijoo demostrómos nuna declaración curtia que sí yera posible llograr la cuadratura, anque non en xeometría sinon en política, que yá se sabe que tien los bordes muncho más flesibles. Y ye que nel entamu d’esi finde d’amiguetes que tienen organizao los Populares, de credibilidá casi tan amenorgada como’l miniconclave feminista del antiputeros doctor Sánchez, descolgóse diciendo que’l PP pretende desarrollar una ideoloxía que nun ye d’izquierda nin de dreches, sinon de centru y, ehí vien lo bono, a la vegada tresversalista. ¡Dios, que xeómetra¡
Centrista, esto ye, un programa que toca elementos suavizaos de los dos estremos del espectru, creo recordar, yera Ciudadanos hasta que Rivera decidió qu’al poder llegábase per la drecha. Y acabó como acabó. Tresversalista yera Rosa Díez, con un programa que fuyía de les dos ideoloxíes mayoritaries pa, al mesmu tiempu, adoptar dambes, pelos sos estremos, según tuviéremos nel ámbitu social o’l nacional; hasta que la mercadotecnia de Rivera la taramió.
Agora’l señor Feijoo, trayemos, quiciabes ye un galleguismu 2.0. y nun mos enteramos, l’equilibriu de les tres pates, con un pie na esquierda, otru na drecha, y nel centru… vienme aquello de tenelos cuadraos, pero la espresión asociábase a un tipu con arroxu y valentía, y, paezme, escabulleciendo les declaraciones diáfanes, fáciles d’entender pol votante xenéricu, nun creyo que consiga más votos pela so esquierda –el votu perdíu de Ciudadanos- que los que pierde pela so drecha –el votu cabriáu de VOX- y eso va tornar a dexalu, nel meyor de los casos, au yá s’atopa en munches rexones, na dependencia de los mozos de Santiago Abascal. Trípode ineficiente.
Esa cuadratura del círculu que gueta don Alberto ye mui peligrosa, por imposible, yá qu’implica’l riesgu de la desconfianza, y eso induz, non yá al votu en blancu que preconiza Felipe González, sinon a l’abstención, la peor de les opciones, y esti congresín, con Isabel y Cayetana en sordina, nun paez que sirva a muncho, más alló del control internu.
Nel slang militar n’operaciones, nesti casu de los españoles, esiste una espresión perfeuta pa describir estes situaciones: Güeving suckling.
Raúl Suevos
A 5 díes vencíos de xunetu de 2025
Torna en castellán en repdiv.blogspot.com
No comments:
Post a Comment