El faru de Montevideo

 

Esisten varios dellos pero’l más vieyu y pernomáu ye’l del Cerru de Montevideo, construyiu pola Corona alló pel llonxanu 1802. Con él marcábase’l rumbu pa entrar nel estuariu xigantescu del Riu de la Plata y enfilar haza la gran ciudá de Bonos Aires, too ello tres dexar atrás la Punta del Este y les so anguaño pernomaes playes, meca de les fortunes uruguayes y bonaerenses.

Pero Uruguay lleva tiempu allumando políticamente al mundiu, casi dende la so nacencia como nación de la mano de Gervasio Artigas, Protector de los pueblos de la Banda oriental, aquel xinete d’ascendencia oscense, cabezudu como ellos ya incapaz de conxugar el verbu reblar, lo que lu diba llevar a enfrentar a brasileiros y arxentinos a un tiempu, cola casi desapaición de la nación.  

Depués vendríen los Batlle, estos d’orixe catalán, que diben dar hasta cuatro presidentes a la nación, el primer recién nacida la república, y el caberu entrao’l sieglu XXI, pero que diben tener nel segundu, José, dos veces presidente, al gran campeón de los sistemas democráticos, pues fo l’impulsor ya instaurador de avances sociales estremaos, especialmente no qu’al sistema eleutoral se refier.

Non too foron fiestes, ente’l 73 y el 85 el país vivió una dictadura dura, especialmente al entamu, con un non menos feroz grupu terrorista, los Tupamaros, que diba abocar nos cinco años caberos a un periodu transicional que daría pasu al periodu democráticu actual, d’una llimpieza escepcional casi pa lo qu’observamos nel conxuntu hispanoamericanu.

En pallares celebraronse eleiciones xenerales, nes que la coalición opositora venció al representante gubernamental –ellí nun se puede repetir mandatu- por mui pocos votos, pero abondos pa felicitar al ganador inmediatamente y desea-y los mayores ésitos, que van ser tamién los del país. Una alternancia exemplar como se vien produciendo dende tiempu inmemorial, y ye ello que, nel Uruguay, coesisten el partiíu Colloráu y el Blancu, nacíos de los partidarios de dos espadones de los anicios de la república y qu’anguaño siguen marcando, travestíos, los idearios políticos del gruesu de la nación. Ye lo qu’hai.

José Batlle, presidente d’inspiración krausista al entamu del sieglu XX, dexó como legáu un cuelmu d`’innovaciones, como la baxa maternal pa les muyeres, el votu universal pa los varones, la Caxa de pensiones, la enseñanza universal y gratuita, nueves y modernes facultaes universitaries, sistema eleutoral proporcional, bancu nacional de semilles, divorciu por voluntá de la muyer, etc. foi un doble periodu presidencial que diba semar les bases pal Uruguay de güei; un país que rescampla como un faru n’Hispanoamérica, al que el fanal de Pepe Múgica táse-y apagando.  

Raúl Suevos

A 25 díes vencíos de pallares de 2024

Torna en castellán en repdiv.blogspot.com

Una vegada fomos el mundiu

 

Va Europa, anque s’esfuercie en facer como que nun se entera, colos andares y la güeyada del enfiláu, o quiciabes meyor, del boxeador noquiáu, como esi contrincante caberu d’Ilia Topuria enantes de cayer al suelu tres la puñeda seca del lluchador hispano-xeorxanu. Va Europa, mediu zombi, caminando ensin ver, desplazándose ensin direición. Ye lo qu’hai.

Ye una visión, la mía, francamente pesimista, y ello vienme tres echar una mirada rápida a lo que tien sío la hestoria del mundiu, na qu’Europa, ella, fo’l mesmu mundiu demientres un periodu llargu de la hestoria de la humanidá. Y ye que, nun habiendo concencia d’ello, l’Oriente, tien sío práuticamente inesistente demientres dellos milenios. Too, o casi too, cocíase en redol a esi mar, agora tan caliente y dañín, que ye’l mar Mediterráneu. Griegos, romanos, bizantinos, árabes, turcos, toos ellos verbenaron na so redolada, hasta que, pa lo que mos interesa, en Florencia inventaron el Renacimientu y too entamó a acelerase.

Aquel mundiu pequeñu mediterránéu sufrió una expansión descomanada de la mano d’un xenovés al que-y fallaba la trigonometría esférica, pero que lleera Il Millione de Marco Polo, au atopó’l secretu de los Alisios que lu diben llevar a zarapicar con América y convertir a España nel imperiu mayor de la hestoria. Y Europa, casi ensin dase cuenta anició a quedar a un llau.

Aína siguió dellos sieglos dominando, con partitures estremaes, pero’l nacimientu del xigante norteamericanu decretaba la so escayencia a términu. Y asina foi, yá nel sieglu XX, anque Monroe y Roosevelt, el Teodorín, yá lo avisaran nel anterior. El casu ye que, dende la primer Gran Guerra, el Globu sigue xirando, pero ye en Washington au se marca’l ritmu d’esi Rock and Roll.

Tres la Segunda Guerra Mundial tuvimos los europeos un periodu d’importancia allabanciega, pues too paecía girar en redol nueso, o meyor cabría dicir qu’alredor del Muru, y dende dambos llaos, pues haza l’Este, aquella potencia de pies de barru que yera la URSS, atopábase l’otru centru de poder ¡Qué tiempu tan feliz aquel de la bipolaridá¡

Pero fíxense vustedes, dende’l 89, añu de la cayída del Muru, too españa polos aires, y, lo que ye más importante, la puxanza de la China de Deng Xiaoping y de los Tigres asiáticos  facen que too mazapile haza ellí, dexándomos otra vegada solos al nuesu destín, o aínda peor, al antoxu d’un psicopata nacionalista como Vladimir Putin.

El misil balísticu intercontinental con morra convencional llanzáu sobro Dnipro, la ciudá ucraniana, recuerdamos lo que fomos y lo que somos.

Raúl Suevos

A 22 díes vencíos de pallares de 2024

Torna en castellán en repdiv.blogspot.com

El xeneral Gan, una novedá a la italiana

 

Sospréndemos la prensa con una noticia que lo ye en delles formes, primer pol fechu simple de ser un nomamientu que s’esperaba con muncha esperanza na Comunidá valenciana, y dempués, polo novedoso de la condición militar del nomáu, el teniente xeneral Gan Pampols.

Tamos falando del gobiernu nuevu de Valencia, nel que’l xeneral Gan vase desempeñar como Vicepresidente pa la reconstrucción, dempués de tener sío xefe del Cuartel Xeneral d’Alta Disponibilidá de Bétera, y, anque yá nun se lu denome asina, Capitán Xeneral de la rexón. Enantes fo direutor del Centru d’Intelixencia de les Fuercies Armaes, nun periodu mui difícil, nel qu’al pasar el CNI a depender del Ministeriu de presidencia, dexó de prestar el sofitu n’intelixencia qu’enantes-y debía a les FAS, y Gan tevo de suplir la falta con sabencía y medios mui llendaos p’amparar l’espliegue esterior de les nueses unidaes. Previu a esi periodu, como xeneral de brigada, se encomendóse-y sacar alantre el plan nuevu d’estudios na Academia Xeneral Militar, otru desafíu al que sepo facer frente magar les estorbises de tou tipu qu’atopó nel so camín.

A lo anterior cabría amestar, dalgo que quien lo oyera en radiu o televisión aportando la so visión sobro conflictos estremaos de los que sopelexen anguaño nun tien por qué conocer, que’l xeneral ye licenciao en Ciencies polítiques, detalle que, teniendo en cuenta la esperiencia de los podemites, na so mayoría tamién licenciaos nesi palu, nun agora un res de  bonu, pero ye un detalle a tener en cuenta; como l’ésitu de la so obra “El arte de mandar bien”, que yá va pola quinta edición; tamién el que seya un de los pocos humanos en pisar los “tres polos”, Everest, Polo norte y Polo sur. Anque’l detalle que quiciabes animó al señor Mazón a so nómina, ye’l so lideralgu como coronel xefe del Equipu de reconstrucción español n’Afganistán, encomienda que desendolcó con felicitaciones internacionales. Tamos énte un toutarrén, con un motor diesel que ye a superar tou tipu de torgues y trabancos.

Güei la prensa va alborotada col nomamientu; dalgo normal si tenemos en cuenta que ye’l primer caso no que llevamos del réxime constitucional anguaño, dexando de llau, quiciabes, al xeneral Saez de Santamaria, nos años de chombu, y con un encargu más adaptáu al perfil militar y al del personax, pero si güeyamos na nuesa redolada vedríamos que nun ye tan estrañu, y vienme a la memoria’l casu más averáu en tiempu y llugar, el del xeneral Figliuolo, de les Tropes alpines italianes, encargáu pol gobiernu romanu de la operación de vacunación Covid nel so país, y dempués, col gobierno Meloni anguaño, de la reconstrucción de la Emilia-Romagna tres les  riades tarrecibles naquella zona del país.  

Nun ye nada llamativu esti nomamientu, nun debiera selo, y toi seguru que’l xeneral Gan, “Supergan” pa los so collacios cadetes na Xeneral, va cuntar col concursu total de les estructures valencianes. Espero que tamién de les nacionales. Ye lo qu’hai.

Raúl Suevos

A 18 díes vencíos de pallares de 2024

Torna en castellán en repdiv.blogspot. com

Rubin "Hurricane" Carter

 

L’automóvil, aparte de ser un mediu de tresporte, tien dalgunes coses bones. Nel mio casu, n’ocasiones, aportame momentos bonos, particularmente cuando viaxo solu y puedo oyer música, casi siempres na misma emisora, una especializada nel Rock, que ye lo que me presta. Coses de la edá, supongo.

Güei la casualidá tráxome una de les mio vieyes canciones, de cuando estudiaba inglés y trataba de progresar sofitándome na música. Güei’l dial quiso regalame al “Hurricane” de Bob Dylan, un canciu que fizo raxón alló pelos setenta del sieglu pasáu; un cantar de los llamaos protesta, de los que Dylan, xunto a Joan Báez, yera un de los esponentes máximos.

Cuenta la hestoria de un negru norteamericanu acusáu falsamente y condergáu a vida xunto a un par de collacios. Una historia repetida na historia d’esi país, “tierra de llibertá” y “escoyíu por Dios”, pero que repetidamente tien dao amuesa de ser, lloñe de les so proclames, un exemplu d’imperialismu nos niveles altos y una esplosión d’hipocresía en munchos de los so habitantes.

Rubin “Hurricane” Carter ye una hestoria como tantes. Infancia difícil, reformatorios pa neños, ingresu nel Exércitu, boxéu amateur, espulsión del Exércitu, boxéu profesional, futuru prometedor y, de sópitu, un crimen con victimes blanques y unos negros oportunos pa cargar colos muertos. Lo de siempres, una hestoria de la que Dylan vase ecu cuando Hurricane lleva yá un tiempu en prisión.

La canción ye azogosa, una maravieya de más d’ocho minutos, cola batería calteniendo de forma constante’l ritmu, y el violín aportando el toque de melancolía, tristura y traxedia, la armónica con entraes midies que-y dan el puntu folk, y penrriba de too la voz de Bob Dylan, con una vocalización nidia, cosa rara n’él, que permite al estudiante d’inglés pensar per un momentu que quiciabes tenga dalgún percorriu nel control de esa llingua.

Les estrofes nun funcionen como tales. El cantar ye un continuu que va contando la hestoria como si se tratara d’una película, o una obra de teatru, dende la escena d’entamu colos muertos y feríos xaciendo nel suelu del bar, pasando poles detenciones y les presiones a los testigos falsos, y con cinco versos que en tres ocasiones actúen como si d’un estribillu se tratara, reforzaos por esa batería, violín, armónica y la voz femenina d’una vocalista.

Here comes the story of the Hurricane

The man the authorities came to blame

For somethin' that he never done

Put in a prison cell, but one time he could-a been

The champion of the world

Un gran canciu.

Raúl Suevos

A 17 díes vencíos de pallares de 2024

Torna en castellán en repdiv.blogspot.com

¿Ú ta'l JEMAD?

 

Confieso’l mio tracamundiu. Un allorie que s’anicia dende los momentos primeros coles noticias de la riada inmensa y les primeres pérdides de vides; unes informaciones a les que, aparentemente, nun respuendía l’aición de les autoridaes, les que fueren, y escontra de lo que cabía esperar.

Col pasu de los díes, y la perceición del algame del desastre, esi desconciertu foi garrando tintes enraxonaos, como maxino que-y asocedería a la mayoría del personal que siguiera les noticies nos medios de comunicación. Y nesi camudar del mio ablucamientu dalgunos momentos tiénense dío marcándose na mio memoria, como esa primer intervención del xeneral xefe de la UME afirmando con rotundidá qu’él, magar tener llisto al so personal, nun podía esplegar nel territoriu valencianu ensin l’autorización de la Comunidá, dalgo que chocaba con toa una vida, nel mio casu, creyendo que l’Exércitu español nun necesitaba autorizaciones n’España, aínda menos pa intervenir en socorru de la población. ¿Tiempos modernos o estáu autonómicu?

A min, esta ausencia aparente de lo militar, magar l’espliegue trupu que les nueses fuercies armaes cantienen na Comunidá valenciana, rinchábame fonderamente, tanto como’l fechu de que’l gobiernu de la nación nun tomara’l mandu na direición de les operaciones, o si vustedes prefieren, que nun declarara l’estáu d’alarma cuando les circunstancies, como los fechos tienen probao, siguen manifestando, requeríen un mandu únicu del nivel máximu. Ye lo qu’hai.

Güei otra vegada’l xeneral xefe de la UME tiénme vuelto a sosprender al afirmar que dende les tres de la tarde del día fatídicu los so subordinaos yá taben na zona d’Utiel salvando vides -¿Nun quedáramos que necesitaba l’autorización de la Rexón pa esplegar?- Dalgo, el salir en socorru de la población, pa lo que nació la UME, dalgo natural y que nun necesita encomiu pero que me dexa, una vegada más, col interrogante sobro la tardanza na actuación de les unidaes regulares del Exércitu. ¿Por qué?

Nel nivel 3 d’emerxencia, potestá del gobiernu o petición de la rexón, la direición operativa, según ensayos d’esi nivel llevaos a cabu, puede recayer nel xeneral xefe de la UME, pero, nesti casu, col mayor espliegue del Exércitu en tiempu de paz nel nuesu país, llama l’atención que’l Mandu d’operaciones, dependiente del JEMAD, aquel de la Operación Balmis, tenga sío canteníu fuera, al igual que’l Cuartel Xeneral d’Alta Disponibilidá de Betera, el mesmu que n’el 2005 dirixó, a cuenta de la OTAN, la operación humanitaria en Pakistán tres el tarrecible terremotu. Un Mandu de Cuerpu de exércitu capacitao pa dirixir hasta 60.000 individuos. Un estáu mayor aparentemente ociosu nesti casu, como’l Mandu d’operaciones del JEMAD.

¿Ú ta’l JEMAD?  

Raúl Suevos

A 16 díes venciós de pallares de 2024

Torna en castellán en repdiv.blogspot.com