Cuando s’anicia una tribuna con esi nome, y teniendo en cuenta l’actualidá europea, el llector pue sentise inclináu a pensar que se trata de la presidente del gobiernu italianu, la señora Meloni, pero, neste casu, y obligao poles eleiciones parlamentaries que tuvieron llugar esti fin de selmana en Xeorxa, vieya y gloriosa nación allugada al suroeste de la imponente cadena montañosa del Cáucaso, púnxeme a navegar na páxina de la OSCE, la organización de seguridá y cooperación n’Europa, que tien sío la encargada d’organizar una misión d’observación internacional en tales eleiciones.
L’afición al asuntu, más allá de la que me cumple como ciudadanu interesáu nel devenir de los asuntos europeos, y dao que Xeorxa atópase en procesu d’adhesión a la Xunión Europea, viénme pol fechu de tener sío observador internacional, precisamente cola OSCE, en Tadjikistán pa ser más exactos, y conocer poro’l procesu y los procedimientos d’estes misiones.
El casu xeorxanu ye importante, tol Cáucasu lo ye, por ser encruz de civilizaciones, relixones y rutes loxístiques históriques, pero esti país foi de los primeros en soltase del xugu postsoviéticu, lo que-y valió l’alzamientu orquestáu por Moscú de dos de les so repúbliques, Abjasia y Osetia del sur, y, darréu, la axitación constante hasta llograr llantar nel gobiernu a un partíu gustante de les directrices moscovites. El que güei gobierna.
Estes eleiciones, ganaes pol partíu del gobiernu per marxe estrechu, según les so propies noticies, llegaron tres cambeos lexislativos fonderos que provocaron manifestaciones tumultuoses na capital, pues la población entendía que se tornaba haza’l dominiu rusu, o lo que ye lo mesmo, Putin, abandonando la ruta prometedora del ingresu na Xunión Europea.
Na conferencia de prensa de la misión OSCE, tenía esta mañana, con representación y observación amás del Conseyu d’Europa, l’Asamblea parllamentaria de la OTAN, y el Parllamentu Européu, toos tienen espresao duldes sobro la llimpieza del procesu, si bien tien sío’l representante del PE, un parllamentariu español de nome Antonio López-Isturiz el que con mayor franqueza y durez se tien manifestao, dando a entender coles su pallabres que podemos escaecenos, nel futuru viniente, de contar con Xeorxa como miembru futurible de la Xunión Europea, lo que tien como corolariu que, mui posiblemente, se produza un averamientu a Moscú, al llau escuru de la fuercia.
Ésperase l’aportar ellí pa estos díes del señor Orban, presidente semestral de la Xunión, yá desautorizáu varies vegaes por ésta nos so periplos supuestamente europeos, lo que confirma esti devenir aciagu pa los xorxanos.
Raúl Suevos
A 28 díes vencíos d’ochobre de 2024
Torna en castellán en repdiv.blogspot.com
No comments:
Post a Comment