Traye güei il Corriere della Sera, si non el más importante sí’l más conocío, y puede que lonxevu, de los grandes diarios italianos, una reseña sobro un ensayu que va salir a la venta mañana nes llibreríes italianes.
La semeya qu’acompaña l’artículu ye tou un anzuelu pa lleelu; un cuadru del S. XIX que representa al propiu Pericles dedicando-yos nel Ágora la pernomada Oración fúnebre a los cayíos en batalla defendiendo los ideales de la ciudá. Un discursu de llectura obligada en primer cursu de Ciencies polítiques puesto que n’él sustanzaríense les esencies del gobiernu democráticu al estilu ateniense, que non el gobiernu representativu, que ye otra cosa, talu como anguaño lo entendemos.
L’ensayu, de títulu La Gran guerra del Peloponeso, afonda y espeñica lo que yá escribiera va 25 sieglos el gran Tucidides sobro esi conflictu, sobro’l que se fondamentaría la conocía Trampa que lleva’l so nome, esto ye, aquella na que cayó la potente Esparta, y la so lliga, al declarar guerra a la emerxente potencia d’Atenas, y la so lliga. Un conflictu de varios años que llevaría a la victoria de los espartanos, al preciu de dexar a dambos consumíos y significando, a la fin, l’accesu al mar Exéu de los persas, los sos enemigos de siempres.
Ye oportunu trayer a colación aquella engarradiella, y les so consecuencies, porque, tres les alegríes de la globalización, que paecíen trayenos un mundiu multipolar, la realidá tienmos devuelto a la bipolaridá, col cambéu únicu de la URSS pola China emerxente y potente, resultao de la revolución interna de Deng Xiaoping, “nun importa si’l gatu ye blancu o negru, namái que cace mures”. Col resultàu, como tantes vegaes a lo llargo de la historia, de la tentación de siguir creciendo, a costa de les zones d’influyencia del otru, lo que puede llevar a esa trampa qu’esplicaba Tucidides.
Na tapa anterior, la de los bloques, aquella Guerra fría tan desfamada, fo una forma d’evitar el choque direutu, resueltu n’ocasiones pente medies les llamaes Proxy wars, guerres “menores” por delegación, que teníen como oxetivu esgastar al contrariu, comprobar les so fortalezes y debilidaes, y dar un mediu de desafogu a los ferres del equipu propiu ensin llegar a enfrascase nuna confrontación direuta, que corría’l riesgu d’acabar nun conflictu nuclear. Y funcionó.
Tamos agora nuna tapa nueva de la historia, que nun tien acabao magar Francis Fukuyama, na que vemos lo que queda de la otrora potencia, Rusia, reconvertida en potencia rexonal, dependiente del aspirante nuevu a hexemón, China, y esperando a ver qué fae l’emperador nuevu nesa Proxy war que ye Ucrania.
¿Qué va facer Donald?
Raúl Suevos
A 14 díes vencíos de pallares de 2024
Torna en castellán en repdiv.blogspot.com
No comments:
Post a Comment