“Tien de procurar ser siempres un pronósticu feliz pal aflixíu, y qu’a la so presentación el que se creyía cercáu d’asesinos, se vea llibre d’ellos; el que tenía la so casa presa de les llames, considere l’incendiu apagáu; el que ve al so fiu arrastráu pela corriente de les augues, lu creya salváu; y, a les últimes, siempres debe velar pola propiedá y seguridá de toos.”
Ye lo que señalaba l’artículu 6 de la vieya Cartilla del Guardia Civil, redactada personalmente pol fundador del Cuerpu, el Duque d’Ahumada, y que sigue calteniendo la vixencia y l’espíritu anguaño penrriba de tolos avances téunicos que los tiempos modernos ponen a la so disposición, y con independencia de la evolución de la propia sociedá española, que al so serviciu se creyó la institución.
Vien esto a cuentu, una vegada más, de la traxedia qu’estos díes sofre’l sureste español a cuenta de una gota fría tarrecible, de dimensiones y virulencia inédites y que dexó temporalmente a les zones afectaes güérfanes de l’aición de les instituciones del estáu, quitando una, la de siempres.
L’espliegue capilar de la Guardia Civil, ca vegada más tenue desgraciadamente, fai que los so homes y muyeres, anque con medios precarios, seyan siempres los primeros en aportar o acudir n’ausiliu de los que padecen dalgún d’esos avatares que señala l’artículu 6 de la vieya cartilla, anque seya, en munchos casos, al coste de la integridá física, de la propia vida; y estes aiciones, siempres evidentes en casu de catástrofe, faense ca oportunidá más difíciles pal Cuerpu.
Faise complicao acudir n’ausiliu del aflixíu por una simple razón, porque l’espliegue del Cuerpu, nos años caberos, tien privilexao, supongo que siguiendo les consignes polítiques, l’esfuerciu en ciudaes y en competencies nueves, descuidando lo que fuera la razón de ser del so nacimientu, el mediu rural. El resultáu vemoslo nel día a día.
La catástrofe valenciana, ye d’esperar, debe servir pa introducir meyores nel funcionamientu de les estructures del estáu, nos so estremaos niveles, especialmente na coordinación ente les distintes alministraciones, au, a la vista de lo asocedido, paez qu’esisten disfuncionalidaes evidentes qu’acaben costando vides, pero, nel casu de la Guardia Civil, debiera llevar a una reflexón per parte del mandu políticu sobro la oportunidá de dar más importancia al espliegue nesa España rural ca vegada más abandonada a la so suerte.
Son tiempos complicaos, coles redes, ensin control, funcionando como axitadores sociales, guetando un motín d’Esquilache nuevu, pero la Guardia Civil, como siempres, pue ser balsámica. Ye lo qu’hai.
Raúl Suevos
A 2 díes vencíos de pallares de 2024
Torna en castellán en repdiv.blogspot.com
No comments:
Post a Comment