Ayeri, organizada pol club Rotariu nel Gran Hotel de Zaragoza, asistí a una conferencia magnífica sobro xeopolítica a cargu del teniente xeneral Gan, retiráu, condición esta que-y amestaba un plus d’interés, pos como ye sabío, cuando algamen esa condición venerable, los militares recuperen tolos sos drechos civiles, particularmente'l d'espresión, totalmente restrinxíu demientres tán n’activu o reserva.
El repasu que-y dio’l xeneral a les árees estremaes del mundiu, y la prospectiva inherente a elles, dientro de lo escarsu del so tiempu, y too ello chiscao con medíos granos de pimienta, dióme la impresión, polos comentarios oyíos a la salida, que dexó un pocu de acongoxamientu nel ánimu de los asistentes, asustaos pola imaxe d’un mundiu n’equilibriu inestable y nel que la España anguaño nun se presenta como especialmente preparada. Ye lo qu’hai.
El xeneral nun cuntaba con tiempu pa esplica-yos con crudeza que’l mundiu, los estaos, funcionen, anque nun lo reconozan por aquello de lo políticamente correutu, sacantes Donald Trump, baxo la teoría realista de les rellaciones internacionales, asuntu mui estudiao yá dende los tiempos de Tucídides y la so Guerra del Peloponesu, y que consiste pura y simplemente nuna llucha constante pola supremacía del propiu estáu, xeneralmente magar o a costa d’otros, más o menos preparaos pa crecer y prevalecer nesa redolada contraria que representa’l mundiu.
Describió con clarencia la multipolaridá anguaño con tendencia haza dos hexémones, USA y China, a que la so solombra’l restu va deber, quier o non, abellugase, y dexomos, a los europeos, cola inquietú de columbrar haza u va dir el presidente eleutu de los USA na cuestión ucraniana –nun hai que fiase de los programas eleutorales, yá lo saben vustedes- pues esa decisión va tener repercusiones induldables pa nós.
Y ye qu’ehí, nesi nosotros, Europa, ye onde creo que s’alluga la clave de la bóveda del nuesu futuru viniente. Una Europa que necesita imperiosamente correr, si nun galopiar, haza la so integración como unidá política federal, pero que s’atopa colos so dos campiones, Francia y Alemaña, nel momentu más baxo de los años caberos; un Reinu Xuníu que namái aspira a comparsa de les so vieyes colonies americanes, y, pa plasmu de munchos, una Italia con un gobiernu tripartitu pero de lonxevidá y estabilidá ablucante pa los estándares del país, y con una líder que ye a rellacionase con diestra y siniestra, hasta col hipermagnate Musk, y servir como nexu posible ente unos y otros.
Europa necesita más Europa. Si Trump xuega la carta de la billateralidá colos europeos, y estos entren al xuegu, tamos acabaos. Nós yá tamos.
Raúl Suevos
A 13 díes vencíos de pallares de 2024
Torna en castellán en repdiv.blogspot.com
No comments:
Post a Comment