¿Y entrúguesmelo tú?

 

La situación nun tien un res de poética, pero vienenme a la tiesta aquellos versos de Gustavo Adolfo Becquer: ¿Qué ye poesía? Dices mientes claves na mío güeyada la to güeyada azul ¿Qué ye poesía? ¿Y entruguesmelo tú? Poesía yes tú. Tala cavilgadura mental provocamela Donald Trump y la so deriva política, que paez abasnar al campeón de la democracia lliberal, los EEXX, haza’l fascismu. Y ello nun vien amenao pola güeyada azul del interesáu.

Del fascismu, ideoloxía qu’anguaño vien usada como preséu de descalificación de cualquier alversariu políticu, anque la mayoría de quienes lu utilicen nun conozan lo básico del términu, sabemos qu’anicia nel periodu d’entreguerres de la mano de Benito Mussolini, como respuesta a lo qu’él consideraba falta de soluciones del socialismu o la democracia lliberal énte los problemes de la dómina.

El fascismu caracterizase, ente otros detalles, pol nacionalismu, totalitarismu, propaganda, uniformes y banderes, militarismu, supremacismu, ya imperiu de l’aición sobro’l pensamientu. Y si estudiamos l’enfoque que Trump-y da a estos elementos quiciabes mos llevemos una sorpresa. Abondo desagradable, yá que tal.

El nacionalismu trescala tol movimientu MAGA, make América great again, y si yá nel so enunciáu simple paez abondo nidio, les aiciones actuales nel “so” hemisferiu nun faen más que refrendalo. El totalitarismu esprésalo col so control, pente medies nomamientos allegaos, del restu de poderes y axencies del estao. La so propaganda cabalga de la mano de los magnates propietarios de Redes sociales y diarios, de lo que Bezos, y el so silenciu énte l’atropellu al Washington Post, ye l’exemplu meyor; quedando la CNN como espresión de la esceición anguaño nos EEXX. La bandera siempres tien tao ehí, pero Trump, faltu de camises pardes o negres, desarrolló l’ICE, immigration and customs enforcement agency, col so aspeutu menaciante a base d’armamentu, capuches y maltratu al ciudadán, como se repara en Minneapolis. Emplegu de les FAS, que non militarismu, como ferramienta d’aición direuta pa la so aición esterior. Supremacismu que sienten especialmente aquellos que nun respuenden al paradigma del blancu anglosaxón. Tou un conxuntu d’aiciones remataes por un cultu a la personalidá, desarrolláu por él mesmu, que recuerda al de los césares romanos.

Tenemos per delantre diez meses d’infartu hasta les eleiciones de mediu términu, en les que se van xugar un bon númberu d’escaños nel Congresu y nel Senáu que podríen dexar a Trump ensin mayoría llexislativa y enzancar dalgunes delles sos iniciatives. En casu contrariu, nos dos años restantes, podría llevanos haza’l Fin de la historia, pero non nel sentíu que Francis Fukuyama agoraba. Fascismu yes tú, Donald.

Raúl Suevos

A 18 díes vencíos de xineru de 2026

Torna en castellán en repdiv.blogspot.com

L'única vegada que-y fici casu al señor Iglesias

 

Yera’l tiempu en qu’ainda nun tinía’l sofitu económicu de los medios iraníes o rusos, y pa espublizar el so evaxelu particular prodigábase per estremaos platós televisivos; supongo que compensación monetaria mediante. Un d’ellos yera 24 Hores, cuando lu dirixía Vicente Vallés y muncho enantes de que’l programa se convirtiera n’exemplu paladín de lo que nun debe ser el periodismu d’opinión.

Ellí, en 24 Hores, prodóxose un alcuentru tirante que, posteriormente, ye posible que fuera causa pa que’l presentador camudara de caena. Y quiciabes ellí foi au oyí al vecín de Galapagar falar sobro Xuegu de Tronos, una serie que yo yá siguía, y de Borgen, otra que punxo como exemplu d'enseñu sobro la política anguaño de cualquier país. Lo que me llevó a guetala y siguila hasta la so desapaición tres cuatro temporaes.

Borgen ye’l nome del edificiu qu’en Copenhagen agospia a Parlamentu y Gobiernu, asina como los despachos de los sos componentes, qu’ellí desarrollen la so actividä ensin qu’haya cuchillaes nin disparos, aparentemente. La exa narrativa ye una moza política, líder d’un partíu pequeñu de centru que, por eses coses de la política vese dirixendo un gobiernu multipartidista metanes les intrigues, aliances, xantaxes y traiciones qu’unu nun esperaría d’un país que dende’l fin de les sagues vikingues ofrez una imaxe de tranquilidá y amabilidá.

El casu ye que, nun momentu dao de la historia ficticia, los guionistes faen apaecer un yacimientu descomanáu de petróleu nes costes de Groenlandia, desendolcando les fuercies independentistes de la islla, l’interés de petroleres y potencies varies, y too un xuegu políticu internacional ya internu en Copenhagen. Casi como güei.

Y ye qu’esa estaya embruscada del mundu ye oxetu d’interés dende’l S. XV au los nuesos pescadores, particularmente los asturianos, pesquen el bacaláu dende que les ballenes desapaecieron de la nuesa mariña, y agora, cambiu climáticu mediante, pasa a ser más interesante aínda, pues pel este bordíala la yá pernomada Ruta del Norte, viniendo del Árticu rusu, y pel oeste la Ruta del Noroeste, al traviés de la mariña d’Alaska y Canadá. Rutes que recorten un 50% los tiempos actuales pa les mercaderíes chines, 20 díes menos. Tou un mundu al qu’hai qu’amestar la promesa de Tierres rares nel so sosuelu.

Los guionistes de la serie dieron-y un final feliz al problema; agora, col ogru naranxáu de Washington y los sos esbirros obedientes, andamos los europeos, y particularmente los inquilinos d’esi Borgen real, palpándomos la ropa. Son tiempos pa dir abrigáu, y paez que mos garra ensin vestíu abondo. Ye lo qu’hai.

Raúl Suevos

A 15 díes vencíos de xineru de 2026

Torna en castellán en repdiv.blogspot.com

Nin Noriega nin Maduro, l'aviespáu yera Fidel

 

L’añu 1989 foi bayurosu n’acontecimientos nel mundiu. Pa febreru los rusos, con Gorbachov xestionando l’esbarrumbamientu de la URSS en Moscú, retirense d’Afganistán, lo que va ser el preludiu d’una serie de movimientos revolucionarios pacíficos nos países europeos baxo control soviéticu que van rematar cola cayida del Muru de Berlín el 9 de pallares. Pero esi añu asocedieron más coses, dalgunes d’elles con cierta semeyanza colo qu’acaez nestos díes.

En Panamá, a lo llargo d’esi 89, col xeneral Noriega, demientres dellos años colaborador de la CIA, al frente del gobiernu, desatárase un frenesí antinorteamericanu que menaciaba’l control del Canal, en manes panameñes dende los alcuerdos del xeneral Torrijos. Amás, Noriega, cooperaba estrechamente colos carteles colombianos p’anubrir de droga los USA y de pasu enriquecese, lo que lu punxera en busca y captura po un xulgáu en Nueva York. Too ello, como yera ñatural, encarpaba al presidente yanqui, George Bush, que yá tenía 10.000 marines na Zona del Canal.

La presidencia yanqui anterior, Reagan, desarrollara la doctrina de les operaciones encubiertes en sofitu de gobiernos o grupos políticos allegaos, como foron los casos de Chile, Arxentina o Nicaragua. Agora Bush trabayaba nun conceuto ñuevu: L’aición militar preventiva énte una menacia a la seguridá nacional. Anque Noriega nun lo sabía y, el 15 d’avientu nun discursu declaró que yá taben en guerra colos EEXX. Erru gruesu.

El día viniente, nun control policial, el teniente de marines Robert Paz foi asesinäu y un día dempués lo gringos ocuparon Panamá; Noriega refuxóse demientres dellos díes na embaxada vaticana; dempués foi lleváu a los EEXX xulgáu, condergáu, y nel 2017 morrió en prisión. Y esa mesma doctrina d’intervención, condergada entoncenes pol derechu internacional, ye la mesma que Donald Trump acaba d’emplegar en Venezuela con Maduro. La doctrina Donroe la noma él.

Fidel Castro, qu’entoncenes tenía saturaos d’espíes los EEXX, sabía lo que s’averaba, porqu’él llevaba tiempu trabayando con Pablo Escobar pa enllagar de droga los EEXX, cobrando polos sos servicios, de mou que, con rapidez y sangre frío, arrestó a la cúpula del ministeriu del interior, encarregada de la operación, col xeneral Arnaldo Ochoa, héroe de la Revolución poles sos campañes n’África, a la tiesta. Xulgólos al estilu estalinista, y el 13 de xunetu fusilólos na sablera de Baracoa, con fondu de palmeres y azul caribeñu.

Noriega, al paecer, non se enteró, y maduro tampocu. En Cuba güei nun entra droga, tampocu comida, nin petróleu, nin turistes, nin nada. Ye lo qu’hai.

Raúl Suevos

A 10 díes de xineru de 2026

Torna en castellán en repdiv.blogspot.com

Maxestá: El prestixu nun da de comer a la tropa

 

Tampocu a los suboficiales o a los oficiales, pero son ellos, les clases de tropa, los que más noten l’estáu anguaño de la situación salarial, y en xeneral de la so vida profesional. Y ye qu’ayeri, como tolos años, tevo llugar l’actu de celebración de la Pascua Militar, esi actu que mos traye l’alcordanza de la recuperación de Mahón de manes de los ingleses, el nuesu entrañable nemigu secular. Y como siempres, l’actu tevo enllenu de bones pallabres…y pocu más.

De les pallabres de la señora ministra, con ausencia, una vegada más del presidente del gobiernu, que ye’l responsable de la política de defensa, llamóme l’atención la so referencia, varias vegaes, al fechu de que les rellaciones internacionales se basen nel respeuto de les normes, supongo yo, como tol mundiu, qu’en referencia al recien asaltu yanqui en Caraques. Y tien razón la señora ministra pero, tratándose d’una xuez en activo, como ye’l casu, podría aplicalo nel so ministeriu, au delles vegaes, demasiaes, tienen-y enmendao la plana nos tribunales, y yá de pasu, podía significase dalgo tocantes les ocasiones innumerables nes que’l so gobiernu se salta la legalidá más básica nel exerciciu del poder.

Ye esti un añu nel que cabía esperar dalgo más que retórica nos discursos, pues la segunda presidencia del césar Trump, más alló de la exhibición de poder de Caraques, ta suponiendo una revolución na vieya Europa –y lo que te rondaré, morena- que, tres decenios de calma aparente agora vese abocada a llanzase a una carrera armamentística que, nel nuesu casu, llévase a cabu ensin un mínimu discutiniu, non yá en see parllamentaria, sinon ente los líderes de los grandes partíos. Tampocu hebo referencia a la construcción o desendolcu de la Defensa Europea, con mayúscules, anque sí al prestixu que les nueses Fuercies Armaes aporten a España colos sos munchos espliegues en misiones esteriores; con avisu d’unu nuevu n’Ucrania, alcuerdu de paz mediante.

Esi prestixu al que SM se refería algámase col esfuerciu de les nueses tropes. Unes tropas que devenguen menos en ranchu qu’un presu español, dalgo, por otra parte, qu’exemplifica en ciertu mou’l porqué’l reclutamientu ta en situación lastimosa anguaño, y ensin perspeutives de meyorar, a tenor de’l “silencio radio” oyío nes alocuciones.

Los soldaos asturianos de nueso, como los demás, van tener que siguir esperando dalgo más que pallabres; u opositar a  guardia civil, o meyor aínda, a policía municipal, que ta muncho meyor pagao y nun se mueven de casa. Ye lo qu’hai.

Raúl Suevos

A 7 díes vencíos de xineru de 2026

Torna en castellán en repdiv.blogspot.com

El triunviratu venezuelanu

 

Yá la espluma de la euforia que provocó la operación de ¿Secuestru? ¿Arrestu? ¿Estracción? Quiciabes esta cabera aceición ye la menos desaveniente, asina que con ella mos quedaremos, esbafóse. El casu ye que pasaes menos de 72 hores, les que n’España se puede caltener a un arrestáu ensin presentalu al xuez, hasta la comparecencia nel xulgáu de Manhattan empieza a paecer dalgo llonxanu. Yá tamos nel güei de Delcy, pa nós españoles, la Maletera, como presidente de Venezuela. Con munchos biecos, sí, na so proclamación, pero presidente, a la fin y al cabu.

La so situación política, por embargu, recuérdamos la de situaciones pasaes, históriques, pues, en realidá, con Delcy como tiesta visible, lo que mos atopamos ye un triunviratu formáu con Vladimir Padrino, el xeneral ministru de Defensa, que controla les Fuercies armaes bolivarianes, que como se pudo reparar poco o nada tienen que facer, magar la so parafernalia armamentística mercada a la Rusia de Putin, énte una fuercia como la del gran Leviatán yanqui, pero sí que sirven pa amedranar a les menacies internas al chavismu, o al so patrón, y, na otra esquina del triangulu, a Diosdado Cabello, un perfeuto patán, collaciu de Chávez dende los diés primeros, y anguaño ministru del Interior, y controlador non solamente de la policía sinon tamién de los nomaos “colectivos”, fuercies irregulares aniciaes del lumpen caraqueñu, enantes de la so reconversión conocíos como Malandros, y agora organizaos y armaos pol réximen. Ensin escaecer al güei famosu Tren d’Aragua, la versión camorristica internacional fomentada pol réximen y tamién rellacionada con Cabello.

La historia de los triunviratos naz col primer na República romana, formáu por Cesar, Pompeyo’l Grande, y el gran Craso, y que finó a cuchillaes y la prevalencia del inmortal Xulio, hasta que nos Idus de Marzo lu sangraron. El segundu foi cosa del so sobrín/fiu Octavio Augusto, el so lugarteniente Marco Antonio, y Lépido, con Cleopatra de por medio, la historia tien dao pa múltiples noveles y películes.

 episodiu atopamoslu col periodo consular de la República francesa, tres el guelpe de Brumario, y con Napoleón como primus ente los tres cónsules, triunviratu, magar cuntar con figures tan importantes como Sieyés y Ducos. El resultáu diba ser el consuláu vitaliciu de Bonaparte, enantes de proclamase emperador de los franceses.

Lo que tenemos en Venezuela ye más complicao porque’l Napoleón de Washington pretende rizar el rizu dende la distancia, asegurando la entrada de les sos petroleres, pero la sangre de Venezuela ye más caliente aínda que la española, y ellí hai más armes repartíes que na España del 36. Va a ser una gran historia para cuntar.

Raúl Suevos

A 6 díes vencíos de xineru de 2026

Torna en castellán en repdiv.blogspot.com

Nun yera el "so" Fiu de puta

 

Nos medios de comunicación suel facese referencia a una frase que se-y-imputa al recién fallecíu Henri Kissinger tocantes al xeneral Pinochet, per aquel entoncenes dictador na república de Chile: “Ye un fiu de puta, pero ye’l nuesu fiu de puta”. La frase zarra muncho fustaxe, tantu que yá enantes ye l’alxudicaran al presidente Roosevelt, falando nel so casu de Somoza, el dictador nicaragüense. Güei fálase d’otru fiu de puta.

El casu ye que, el día dempués de la “impecable” operación d’estracción llevada a cabu en Venezuela, les coses nun paecen tar tan nidies como los optimistes creyíen. Y ye que, la operación Delcy Rodríguez, aparte de tranquilizar al señor Zapatero, más paez diseñada pa convertir Venezuela en dalgo similar a lo que Lukashenko y Bielorrusia representen pa Vladimir  Putin. Esto ye, un protectoráu ensin necesidá de poner tropes sobro’l tarren.

El presidente Trump, tan volcánicu y torrencial nes sos intervenciones nes ruedes de prensa, dexó claro na relativa a la operación –veintisiete referencies al petróleu y denguna a la democracia- cuálu ye’l so interés nel asuntu. Camudar la direición del país por una más gustante a los sos intereses económicos, ensin tener que correr el riesgu nin los gastos que supón facese cargu direutamente del país. María Corina Machado, posiblemente, va tener qu’esperar, y los venezuelanos tamién.

La historia hispanoamericana ye nidia al respeutu. Les sos repúbliques nacieron de forma inopinada y de causa sobrevenida –la invasión francesa n’España- ensin que los sos cuadros nin población tuvieran preparaos pa la independencia. Amás, los empréstitos roblaos pa financiar la causa de los bandos independentistes escontra de los realistes, hipotecaron el futuru de los países ñuevos; y los británicos sangraron concienzudamente les sos finances demientres mediu sieglu, hasta que, tres la guerra de Secesión yanqui, los capitales aportaos del norte s’impunxeron nel subcontinente, pero agora, a diferencia de los británicos, con inxerencia clara nos asuntos políticos.

La creación de Panamá, a espenses de Colombia, ye’l casu más vultable, pero si vustedes introducen “intervenciones USA Hispanoamérica” nel buscador, y seleccionen la opción imáxenes, el resultáu va golpia-yos la vista. A mín, como español, toes me duelen, pero’l robu de territoriu efectuáu en México ye quiciabes el que más me impresiona. Asina son les coses.

Trump ye un paladín de la política realista nes rellaciones internacionales, pero nun sé si esto va paga-y abondo para iguar les previsiones aciagues pa les eleiciones de fin d’añu, que podríen ata-y una mano a la espalda. Mentanto, los nuesos líderes europeos, y Zelenski, debieren tomar nota de con quién xueguen.

Raúl Suevos

A 5 díes vencíos de xineru de 2026

Torna en castellán en repdiv.blogspot.com

América Nostrum

 

Dende los tiempos de Xulio Cesar hasta la cayida del Imperiu alló pel S.V asina yera como los romanos conocíen l’anguaño llamáu Mar Mediterráneu. Toes les sos oriellas taben dominaes polos sos prefeutos, y les sos augues poles trirremes de la so Flota, asina con mayúscules, pos asina yera como se nominaba, como la de los EEXX, anque estos, como tienen unes cuantes, numérenles.

Nada podía asocedr nesos dominios ensin el so permisu, nin nel Exiptu de Cleopatra, nin na Galilea de Xesús. Too taba sometío al so poder. Un poder imperial que tien sío la base pa la definición de lo qu’entendemos como imperialismu: La dominación d’un pueblu o estáu sobro otru, xeneralmente pente medies la aplicadura de la fuercia militar, económica, política, o la combinación fayadiza de toes o dalguna d’elles. Ye lo qu’hai.

Güei ye difícil sustrayese a la intervención trumpista en Venezuela, entamada manu militari, cola detención y trelláu a tierres yanquis del usurpador presidente del país, y que, acordies les pallabres del ogru anaranxáu, va dir siguía d’una segunda folada de carauterístiques ignotes pel momentu. América nostrum, ensin dulda, o Doctrina Monroe modernizada, o lo que ye lo mesmo, imperialismu en estáu puru.

El casu ye que l’aición concita, creyo, más simpatíes qu’acritú, pues casi tol mundiu ta al tantu de los padecimientos d’aquel país, especialmente los ocho millones de refuxaos salíos d’ellí nos años caberos. Un país riquísimu anguaño en casi probitú absoluta , y un presidente y réxime, ensin legalidá nin lexitimá dalguna. Paez lóxico tomar l’asuntu con esperanza.

El problema ye qu’eso del imperialismu ye cosa d’imperios, y con esti movimientu cabría esperar que China atópase lexitimada pa invadir la pequeña Taiwán -28 millones d’habitantes- y de xacíu que Vladimir Putin va sentise más que sofitao na so invasión d’Ucrania, dexando a Europa, esi oxetu políticu siempres a medio construyir, metanes d’eso que nel campu de batalla llamen Tierra de naide. Va haber qu’espabilar. Va haber que sofitar Ucrania hasta la fin. Va haber que crecer. Y ye que, esta gozosa intervención yanqui, de les que tanto Bolívar como José Martí yá alvirtieran, abre la puerta a un mundiu nel que la potencia militar, como antaño dicíen de l’artillería, conviertese na “última ratio regis”. Y si anguaño ye Venezuela, mañana, a lo menos en tiempos de Trump, podría ser Groenlandia.

Helicópteros penriba del cielu nocherniegu y nin un disparu de rempuesta. Va haber qu’esperar a ver qué fai Vladimir Padrino, el ministru de defensa, que seguro que-y preocupa’l futuru; el personal quiero dicir.

Raúl Suevos

A 3 díes vencíos de xineru de 2026

Torna en castellán en repdiv.blogspot.com