Matizando una tribuna

 

Lleo esta mañana en La Nueva España una tribuna del casi siempres acertáu Luis Sánchez Merlo, na que s’estiende sobro’l significáu del votu en blancu, una opción eleutoral que yo mesmu utilicé nel pasáu y que nun descarto que recupere nel futuru. Y la so llectura tiénme aguiyao pa escribir unes llínees sobro’l conceutu.

 Tengo d’aniciar l’asuntu confesando que, va dellos años, casi nula atención-y prestara al tema. Fo col mío primer destinu n’Estrasburgu en 2005 cuando, con ocasión d’unes eleiciones en Francia, los matices del tema llegaron énte la mío vista. El día dempués toa la prensa, entamando por Les Dernières Nouvelles d’Alsace, del que yera suscriptor d’oficiu, abríen páxina col votu en blancu, pa ellos un indicador de máxima importancia sobro la calidá del so sistema políticu. Dalgo asina como una estación medidora de la polución nel aíre que respiramos.

Nos díes vinientes, pa la mío sorpresa, pude comprobar cómo, tolos medios de comunicación social, yeren tiempos de Jacques Chirac como presidente, analizaben pormenorizadamente l’asuntu del votu en blancu, dalgo que, por compararanza colo qu’asocedía, y aínda acontez, n’España, nun dexaba de sorprendeme fonderamente.

A la mío vuelta, quiciabes influyío por aquella esperiencia, y, sobremanera, pol desencantu que me producíen los protagonistes del nuesu sistema políticu, paséme al partíu del votu en blancu, anque tres cada votación veníame un refluxu de frustración ente la nula repercusión qu’esa postura eleutoral obtenía nos medios de comunicación.

Pasáu un tiempu decidí que, dao que nun taba dispuestu a cayer nel pozu de la abstención, y como quiera que siguía sintiéndome desafectu colos protagonistes del nuesu espectru partidista, decidí que, al mou de les guerres de las potencias mundiales, recurriría a los proxy parties, esto ye, otorgaría’l votu a partíos interpuestos, o delegaos, o pantalla, sobro lo que realmente consideraba.

Agora voto a un partíu que nun me convence en munches de les sos propuestes, pero que creyo que puede actuar como una especie de banderilles de fueu sobro aquel que tien cuadros, estructura y recorríu como pa cargar cola responsabilidá de la nación pero que, al mesmu tiempu, la so trayeutoria anterior, haz presaxar que podría llendase a “xestionar” los asuntos del estado, ensin camudar la deriva ideolóxica que, na mío opinión, tiénse producío nesta España de nueso nos tiempos caberos.

A lo último, que’l señor Sánchez Merlo tien toa la razón no qu’esplicaba col votu en blancu pero, a mío entender, la probe repercusión mediática fai que nun consiga los oxetivos qu’algama en países de la nuesa redolada.

Raúl Suevos

A 5 díes vencíos d’abril de 2026

Torna en castellán en abellugunelcamin.blogspot.com 

El valláu taba en Londres

 

En 1969, el ministru d’esteriores del xeneral Franco, el señor Castiella, fartu de que los fíos de la Gran Bretaña se pasaren pel forru les múltiples resoluciones de Naciones Xuníes tocantes la cuestión xibraltareña, eludo conscientemente l’usu de la pallabra descolonización pues nunca se trató d’eso, decidió allevantar un valláu na faza del istmu y tisoriar toa mena de rellación colos llanitos.

El valláu entamó a abrise parcialmente trece años dempués y agora, tres l’alcuerdu oscurantista ente la XE y los británicos, paez que va a desapaecer por completo. Y señalo la so falta de clarencia pol fechu de que, magar tratase d’un asuntu de la soberanía española, tien sío llevao con un secretismu sospechosu, del que creo que, interesadamente, tien participao’l sostitutu anguaño d’aquel Castiella. Una falta de lluz que s’acompaña del poquísimu efeutu que l’aprobamientu definitivu tien tenío nos medios de comunicación nacionales, que pasaron penriba como si se tratara d’un asuntu de menor cuantía.

Y ye que l’asuntu tien munchos pelendengues, especialmente tres el Brexit, que pudo llevar a pensar a los pardillos, entee los que m’incluyo, qu’agora, dende la nuesa posición europea atopábamonos nuna posición de fuercia pa negociar. Nada d’eso. Creo que mos tienen vendío una manta zamorana de poliester.

De soberanía ni un res se tien tratao, ehí sigue, nel llimbu; pero sicasí los llanitos van siguir col so sistema fiscal, lesivu pa España, y especialmente pa les zones vecines; los españoles van siguir trabayando ellí, cola cuestión de les pensiones aparentemente más nidia, pero va ser España quién pague la so sanidá y la escolarización de los sos fíos; los llanitos van poder mercase una casa en Sotogrande, los qu’aínda nun la tienen, y así podríemos siguir. Un chollu, pa ellos.

Agora, metanes el pandemónium bélicu y económicu que supunxo la “operación” del ogru naranxáu, en combinación con Israel, escontra’l réxime iraní, atopámonos con una cume convocada pol señor Starmer, el xefe de gobiernu de SM británica. Más de treinta y cinco países dicen, práuticamente toa Europa, quitando España, o nun sé si debería dicir Sánchez. Y ye que paez que-y punxeron un valláu, nesti casu virtual, anque nun aporto a discernir si va ser polos sos posicionamientos “pacifistes”, y de confrontación col amu de Mar-a-Lago, siempres de forma intempestiva y ensin coordinar colos socios europeos, o quiciabes por nun distrayelu de la cume que va tener llugar en Barcelona, con asistencia de lo meyor del Foru de Portalegre, au paez que nun hai vallaos, más alló de los ideolóxicos. Ye lo qu’hai.

Raúl Suevos

A 2 díes vencíos d’abril de 2026

Torna en castellán en repdiv.blogspot.com 

Xestos inamistosos

 

Col pasu del tiempu dalgunos fechos vanse escaeciendo. Dacuando, por aquello del interés políticu nacional, saquense de ñuevo a rellucir, como nel casu daquella sentada énte’l pasu de la bandera de los Estaos Xuníos protagonizada pol entoncenes secretariu xeneral de los socialistes, esi qu’agora se dedica a eso que n’economía se conoz como lobismu, y que siempre se llamó venta de favores.

El mesmu protagonista, tamién por interés partidista, decidió la retirada intempestiva de les tropes españoles d’Iraq -l’italianu Berlusconi tamién lo fizo, pero negociando’l calendariu colos EEXX- con gran peligru y trabayu pal mío amigu Pedro, que dirixó’l repliegue loxísticu, y la so tropa. Y el xestu zapateril fo aplaudío por munchos, notoriamente na entrega de los Goya, pero a les Fuercies Armaes españoles costó.yos caro.

Foron años de distanciamientu y ostracismu. Yo vivílo nel Eurocuerpu, onde, magar ser un Cuartel Xeneral européu, mascábase la friura; especialmente de los representantes polacos, a los que, tres convencelos pa entrar n’Iraq, dexamos tiraos y a cargu d’una división que, suponíase, díbamos a dirixir nós. Nun se escaez.

El JEMAD d’entoncenes, que darréu dirixiría’l CNI, emplegó muncho tiempu y dedicación, amás de dalgunos de los sos meyores homes, pa recuperar el créditu nel Pentágonu, y les nueses bases y les sucesives ampliaciones de los Alcuerdos colos yanquis tuvieron la so importancia pa ello. Agora, posiblemente, torneremos al puestu de salida.

La prohibición d’usu de les bases pa sofitar l’ataque a Irán ye un dolor de tiesta na Operación, con mayúscula; y la prohibición del espaciu aéreu tampocu ye que vaya a romper los planes yanquis, pero, el xestu inamistosu d’un sociu de la OTAN, escríbese con lletres de molde, y el so ministru de esteriores, Marco Rubio ya tien fecho referencia a ello. Y dalgunos, dende la so curtia mira llocalista, quiciabes lo aplaudan, resalvando que, como señaló va nada’l vieyu JEMAD Alejandre, Ceuta y Melilla nun tán amparaes pola OTAN, y que, tres los Alcuerdos d’Abraham, los EEXX rearmen a Marruecos y cuenten con él como sociu principal n’Africa y nel mundiu islámicu.

Nel mundiu políticu anguaño, nel que los intereses partidistes prevalecen sobro los nacionales ¿qué ye eso? Van dicir dalgunos, toa esta problemática ye posible que se contemple como daqué d’importancia menor, especialmente cuando hai una campaña eleutoral pel mediu, pero nun-yos quepa dulda que, camude o non el gobiernu, ehí espéranos una xera internacional importante; y a caballas y melillitas munches nueches de velea. Ye lo qu’hai.

Raúl Suevos

A 31 díes vencíos de marzu de 2026

Torna en castellán en repdiv.blogspot.com

Domingu de Ramos, domingu d'estrenu

 

Taba guapa la ciudá esta mañana buría de domingu. Nun yera pa menos, domingu de Ramos, domingu de Procesión, y ésta, muncho más humildosa que les que se pueden güeyar por munches ciudaes d’España, toes elles más barroques y, posiblemente, vieyess que la de nueso, atrae ca vegada más al paisanax, magar los desavenientes.

Nunca fo Xixón de muncha procesión; a lo último, dende los tiempos de la Restauración yá entamó la cosa a movese, dempués sedría Burgos Riestra al aniciu del XX el que diría dando forma al asuntu. El casu ye que, anque agora l'agrupación socialista tea pidiendo un andamiu pa evitar el derribu, la ciudá lleva munchu tiempu d’etiqueta roxera, y tamién anticlerical. Poro la puxanza procesional renovada comporta más valir aínda.

Güei tocaba la de Ramos, la qu’en munchos llugares conocen como de la borriquilla, y ellí, al altor del Campu Valdés, marchaba'l personal; munchos con un ramu de llauréu na mano, posiblemente mercáu a les varies vendedores que con acentu de país del este, y aviespaes elles, poníenlu a disposición. Tamién dalgunos guaḥes coles sos palmines, que non palmes. L’ambiente, con un marcu incomparable como ye San Pedro y l’arenal de San Lorenzo, engalanáu por un folaxe tremendose trayío pol norte que mos azota estos díes, llevóme irremediablemente a l’alcordanza de los mios díes infantiles.

Yeren tiempos nos que’l domingu de Ramos tenía un signu especial. Mío má echaba’l restu y poníame d’estrenu, como casi tol mundiu; caún al so nivel, pero nun se concebía salir de cualquier manera; los pás coles sos gales meyores, y los neños lluciendo ropa ñueva y repeinaos. Toos a Misa, cola palma, pa lluéu llevala al padrín, del que nel mío casu yá nun recuerdo la so cara magar que me dexó el son nome ne heriedu, pa recibir, posteriormente, el bollu, de la so parte. Un gran día.

Dempués, si la cosa cuadraba bien, podíase dir tomar el vermú, con unos calamares fritos pa la xente menudo, enantes de tornar a casa, o a comer fuera los más pudientes. Yeren otros tiempos. Güei yo diba solu, ensin prisa y con tiempu pa reparar, abondo pa dame cuenta que yá nun ye domingu d’estrenu. Anguaño casi tol mundiu va cola moda global, esa de casi usar y tirar, esa que se nutre, nun se sabe mui bien ónde, con salarios de miseria pa poder ofrecer precios convenientes, esa qu’adoramos, y que yá nun mos permite estrenar pa Ramos. Ye lo qu’hai.

Raúl Suevos

A 29 díes vencíos de marzu de 2026

Torna en castellán en repdiv.blogspot.com

Defensa con mayúscula y defensa con minúscula

 

Demientres s’anuncien midíes sobro la Defensa, unu nun puede evitar entrugase aú fina’l xestu y aú entama la realidá. Porque n’España, de xemes en cuando, la política alcuerdase de quienes sofiten el sistema, anque casi siempres lo faga dende la distancia afayadiza de los conceutos.

La iniciativa recien de Margarita Robles pa declarar la profesión militar como de riesgu tien daqué de reconocimientu tardíu y dalgo, tamién, de exerciciu retóricu. Non porque’l riesgu nun esista —basta güeyar les rotaciones per misiones nel esterior— sinon porque la so torna práutica paez, una vegada más, llendada. Nómase’l problema, pero bordíase la so consecuencia.

Y mentanto, nesi espaciu onde la Defensa conviertese en defensa, siguen quedando fuera quienes viven l’esgaste ensin rellevu nin rellatu. Ehí tán los homes y muyeres de la Guardia Civil, que nun roten per ciclos curtios, nin se beneficien de carrieres acotaes, sinon qu’acumulen años, serviciu y riesgu cotidianu con una constancia menos visible, menos rentable, menos política. Porque d’eso se trata, a lo fonderu. La Defensa —con mayúscula— nun ye namai un sistema, ye tamién una narrativa. Y nesa narrativa encaxen meyor los espliegues nel esterior, los continxentes contaos en cifres redondes, les bandieres n’escenarios llonxanos que permiten a España presentase énte la OTAN como un sociu fiable ensin necesidá de alteriar n’esceso los sos equilibrios internos.

Unos cuatro mil efeutivos esplegaos. La cifra repítese, esíbese, conviertese n’argumentu; y, sicasí, detrás d’esi númberu hai rotaciones constantes, trayeutories fragmentaes y un esfuerciu humanu que nun siempres alcuentra reflexu nes decisiones que se tomen en casa.

Equí ye au la política amuesa la so lóxica. Reconocer ye cenciello; tresformar ye costoso. Declarar una profesión de riesgu tien un impautu simbólicu inmediatu. Reformar de verdá les condiciones materiales —xubilaciones, carrieres, equiparaciones— implica entrar nun tarrén más incómodu: el del presupuestu, el del agraviu comparativu, el del conflictu ente ministerios como’l de Defensa y el del Interior d’España.

Y asina, adulces, consolÏdase una forma de facer les coses. La Defensa decide qué riesgos cuenten, cuálos se visibilicen y cuálos queden esleíos na rutina. La defensa, sicasí, nun tien esa capacidá d'eleición: simplemente asúmelos. Nun hai equí necesariamente cinismu, pero sí una inercia difícil d’ignorar. Nun país onde la menacia nun se percibe como inmediata y onde’l debate públicu rara vegada se detien nestos asuntos, la política tiende a optimizar lo visible frente a lo necesario.

Quiciabes poro too encaxa. La proyeición esterior, el reconocimientu selectivu, les reformes parciales. Un sistema que se lexitima haza fuera mientes s’axusta haza dientro, y, ente dambos planos, les persones. Ye lo qu’hai.

Raúl Suevos

A 25 díes vencíos de marzu de 2026