...Y nun tábemos ellí, nel G-7

 

Magar l’aparatu del mundial futbolísticu, que puxa por atropar l’atención de casi tol personal -queden unos pocos irreductibles que se resisten- ye induldable que la xuntaza d’un garapiellu de líderes mundiales n’Evian, una ciudá balnearia francesa llendante con Suiza, y pernomada poles sos augues y el so tornéu femenín de golf, tien amenao l’interés de gran parte de la población mundial, conscientes de que lo qu’ellí se decidiera diba tener más repercusión nes sos vides que los resultaos futbolísticos algamaos poles sos selecciones nacionales.

Ellí, n’Evian, taban los xefes más importantes del mundiu más o menos occidental, pues faltaben l’ínclitu Putin, y el so patrón pequinés, Xi Jinping, y participaben en cambiu dalgún de los BRICS. Pel llau européu, amás del convidante, Francia, teníemos a Alemaña, Reinu Xuníu, y la enantes por dalgunos denostada Giorgia Meloni, per Italia. Completaben el cuadru Von der Leyen y Costa, nel nome de la Comisión y el Conseyu Européu.

Nun fai falta ser mui alvertiu pa dase cuenta que faltaba’l quintu gran país européu, España, y ello magar ser el campeón actual del crecimientu européu no qu’al PIB se refier, mui penriba d’esos otros “grandes”. Quiciabes poro la nuesa ausencia faise más llamativa. O quiciabes non.

La realidá ye qu’esi PIB, del que tantu presume’l nuesu presidente, amenorgase espectacularmente cuando lu dividimos pol númberu d’habitantes anguaño n’España, y sacamos el PIB per cápita. Y si vamos más lloñe, y lu dividimos pol númberu de trabayadores la resultante ye aínda más humildosa. Pero entá podemos afinar más y, tres calcular el númberu de trabayadores a tiempu completu, ocho hores, y lu utilizamos como divisor pa esu PIB, vamos escubrir qu’esa maravieya de PIB vien con munchos clarescuros; tantos que mos quedamos al altor d’esa Italia dirixí per Meloni, a la qu’ellí ponen de vuelta y media, la oposición, pol so baxu crecimientu. Ye lo qu’hai.

La nuesa realidá, la que se palpa nel día a día, lloñe de la macroeconomía, nun mos dexa en mui bon llugar, pues el nuesu crecimientu namái ye numbéricu y despinta una productividá decreciente que mos conderga a siguir na cola d’Europa en casi tolos aspeutos, lloñe d’ese G-7 qu’ayero s’aconceyaba col Calígula yanqui n’Evian.

El presidente de nueso yá nun ye un referente de nada nel ámbitu internacional, non a lo menos nel nuesu vecindariu, y el descomanáu cubu de corrupción, tremendamente cutre per otra parte, déxamos más averaos de ser unos parias que non d’entrar nesi selectivu club.

Raúl Suevos

A 18 díes vencíos de xunu de 2026

Torna en castellán en repdiv.blogspot.com 

Trote ensin estribos nel Congresu

 

Tiénse tornao pal Vaticanu’l Papa dexándonos na retina, como dispidida, la imaxe del avión d’Iberia, de nome Picos d’Europa, al qu’un de los sos motores nun-y furrulaba. Una imaxe que, maxino, supón una deshonra seria pa la compañía, anque, pa compensar, la reacción arreguilada del rei d’España, ufiertando’l so propiu aparatu pa que’l Pontífice pudiera tornar, reivindícanos a nivel internacional, dempués d’una selmana d’absolutu ésitu dende’l puntu de vista organizativu y de respuesta de los aínda numberosos católicos de la nuesa nación. Ye lo qu’hai.

Nel aspeutu políticu la visita mídese polos analistes a partir de los estremaos discursos pronunciaos per So Santidá. Toos ellos mui midíos y adaptaos a l’audiencia y el llugar del momentu, como’l dedicáu a la Conferencia episcopal, cola so referencia a los casos de pedofilia, o’l encubrimientu de la mesma, habíos nel senu de la Ilesia. Anque ente tolos parllamentos de Lleón XIV quiciabes tenga sío’l de les Cortes, aconceyaes nel Congresu de diputaos, el que más tien dao que falar nos díes vinientes. Y aínda sigue.

Y ye que’l discursu, pel so conteníu y la duración de los aplausos a la so terminación, tien médula p’alimentar les escribaníes demientres abondu tiempu. Yá que no tratao pol Papa casi nada de lo qu’ocupa a la clas política de nueso quedó ensin tocar, y ello con induldable tonu de regañatu. Hebo palos, eufemísticamente, pa tolos grupos representaos, que lu escuchaben en silenciu respetuosu a lo llargo del so espiche. Y quiciabes poro llama tanto l’atención los siete minutos d’aplausos que siguieron al so acabar. ¿Tendríen fumao dalgo? ¿Toos?

La situación recordóme una historia de los míos tiempos de cadete de primeru na Academia Xeneral, na que, per aquel entós, la equitación yera una asignatura obligada. Entamaba ésta coles clases de voltéu; un asuntu casi de circu, pero normalmente ensin consecuencias lesives pal físicu del cadete. Dempués aniciaba lo serio, qu’acababa siendo sangrante, na parte interior de los muslos si te tocaba determináu capitán profesor. Y ye que’l paisanu caltenía’l criteriu de la necesidá de dominar, pol alumnu, el trote ensin estribos, y asina mos tenía tola hora dando vueltes nel picaderu.

Cayese yera la salvación, pero naide quería ser el primeru, pero, cuando un valiente se dexaba dir al sable yera siguíu, casi de momentu, per una bona docena de collacios. Y a min, paezme, qu’eso-yos pasaba a diputaos y senadores; naide quería ser el primeru en dexar d’aplaudir.

Raúl Suevos

A 14 díes vencíos de xunu de 2026

Torna en castellán en repdiv.blogspot.com 

Xubilación dorada

 

Son munchos los analistes, tantu na so versión de tertulianos como los qu’escriben na prensa tradicional, qu’anden estos díes dándo-y vueltes al asuntu de la diverxencia económica xeneracional, esto ye, al fechu de que la población qu’anguaño revicia de la so xubilación vive muncho meyor que los que-yos antecedieron nesa condición en tiempos pasaos, y lo que ye más llamativo, p’analistes y pa los propios detentadores de esi estatus, viven meyor que les xeneraciones qu’actualmente lleven el pesu económicu de la nación o intenten acceder al rangu de factores económicos de la mesma, los mozos. Ye lo qu’hai.

Tanta referencia, qué quieren que-yos diga, nun deza d’escamame, pues suéname a avisu de que la dirixencia política, falta d’idees meyores, va intentar retayar los beneficios, pocos, que la condición de venerable supón güei na nuesa España querida. Y ello magar qu’Hacienda yá grava eses xubilaciones escontra de lo que notros países asocede, y, dempués, al nun deflactar la tarifa, castiga ulteriormente esos ingresos.

A min dame por reviciar l’asuntu en compañía d’otros, particularmente los componentes d’un grupín d’amigos, carballones y xixoneses, amantes del golf, esi que se prautica nuna tierra de fama esquierdista pero que cuenta con más campos municipales que dala otra n’España. “Asturianaes” va dicir dalgún, pero que mos permite axuntanos periódicamente pa gozar de l’actividá física en marcos incomparables, y rematar l’exerciciu con un bon yantar nes cercaníes del campu de golf.

Esti mes la “xuntanza” tevo llugar en Berbes, un pueblín, ente Carabía y Ribesella, que cuenta con un campu de golf de condiciones estraordinaries, pues haza¡l sureste enmarcalu la Sierra de Cuera, llugar de la cabera batalla de montaña, el Mazucu; al suroeste la Sierra del Sueve, tierra de los pernomaos asturcones; y ente dambes, más al sur, los Picos d¡Europa aínda allumaos polos grandes neveros qu’entá permanecen. Una maraviella que casi te distraye de l’atención que’l golf requier.

Al norte, dende la salida del 1, la costa de Ribesella ofrezsemos, siguía nes cais vinientes pela sablera de Vega, col so Güeyu Mar, famosu polos sos pexes y mariscos a la brasa, pa continuar haza los arenales de la Espasa y la Islla; más alló les de Colunga y al fondu la figura inconfundible de Llastres. Y too ello col encuadre d’un Cantábricu espléndidamente azul nun día de sol magnificu y con una brisa sele qu’ayudaba a refrescar.

Echamos de falta la representación uvieina, quiciabes deprimida nesta vegada pol descensu del Uviéu y la perspectiva de tornar a enfrentase al Sporting, o eso comentó daquién mientes disfrutábemos unos escelentes chipirones en Carabia.

Raúl Suevos

A 14 díes vencíos de xunu de 2026

Torna en castellán en repdiv.blogspot.com