Una flotilla pa L'Habana

 

En L’Habana, magar los más de 60 años d’abandonu, aínda resiste un bon númberu d’edificios que merez la pena visitar, anque namái seya nel so esterior. Un de los más conocíos ye’l de les industries Bacardí, n’estilu art decó. La so torre, coles sos estampes n’azulexu, actúa como un imán pa les güeyaes del interesáu. Pocu más queda de la familia, que tevo que salir por piernes cuando aportaron los barbudos. Como’l rei del zucre de entoncenes, Xulio Lobo, del qu’aínda atopamos na parte alta de la ciudá el so muséu napoleónicu, quiciabes el más importante del mundu, y los sos Sorollas nel muséu nacional de belles artes, allugáu nel edificiu fabulosu de Manuel del Busto y requisáu al Centru Asturianu de L’Habana.

Toa L’Habana, toa Cuba, tán enllenes de rastros, d’alcordances, de lo que fue… y yá nun va tornar. Anque estos díes, metanes otru “periodu especial” non declaráu, y de les bravates inconesas del ogru naranxáu, el personal va desatáu y tentándose la ropa, polo que pudiera pasar. Y ye que, esta vegada, la situación paez más difícil de sofitar qu’en crisis anteriores. Quiciabes porque yá nun ta Fidel, y Raúl va cumplir en xunu los 95.

Dicen que Trump quier dalgo como lo de Venezuela. Un gatopardu caribeñu supongo, ente otres coses porque, si’l cambéu ye demasiao rápido, namái coles reclamaciones y xuicios que se van desendolcar por cuestiones de propiedá, el país podría gripase, aínda más de lo que yá ta. Convien dir con pies de chombu.

Estos díes, énte lo que pueda asoceder, yá apaecen chollos inmobiliarios ellí. Vayan con cuidao. La Perla del Caribe ye anguaño una gran incógnita, anque los capitales cubano-americanos, como esos Bacardí, o los Fanjul, o los munchos empresarios que, dedde los sos oríxes isleños, tienen levantao lo que güei ye’l puxante estáu de Florida, tean atentos y dispuestos a acudir a la llamada de los sos ancestros.

El cubanu d’a pie, el que sofre ellí la situación, yá nun cuenta los apagones, ye más fácil cuntar los periodos con enerxía, menos y más curtios. Tampocu presta atención a les parolaes de Díaz Canel, un funcionariu puestu al frente por Raúl, que paez destináu, como Maduro, a pagar los platos rotos, mientes el centollu, el nietísimu, nel nome de la “familia”, negocia’l futuru colos yanquis. Con too, la noticia de qu’Iglesias, Pisarello y Corbyn organicen una flotilla, al estilu d’aquella de Gaza, faime pensar que, esta vegada, la fin definitiva de los Castro ta mui averao. Ye lo qu’hai.

Raúl Suevos

A 19 díes vencíos de marzu de 2026

Torna en castellán en repdiv.blogspot.com 

El discursu del rei

 

Esti fin de selmana caberu tevi la oportunidá de güeyar, una vegada más, esa gran película, de magnificu guion, direutor y elencu actoral. Cuéntamos los esmolecimientos del güelu del rei anguaño de los británicos al entamu del so reináu, a cuenta del so tatexar. El Colin Firth ta que lo borda.

Equí tamién tuviemos discursu real, pequeñín, nun actu modesto d’inauguración d’una esposición sobro la muyer indíxena mexicana nel Muséu arqueolóxicu nacional. Un discursín curtiu con pallabres aclaratories posteriores nes que’l rei conderga’l presentismu moral, esto ye, l’enxuiciamientu del pasáu coles normes morales del presente, dalgo no que, l’interés nacionalista de la presidente mexicana anguaño y el so antecesor, cayen sistemáticamente, esixendo a España, y particularmente al rei, que se disculpe por, según ellos, los abusos perpetraos polos conquistadores.

El rei faló de les Lléis d’Indies, el primer tratáu de drechos humanos de la dómina moderna, impulsaes pola Reina Católica, y dempués les Lléis Nueves, qu’impulsara’l so ñetu, l’emperador Carlos, y asumió que se cometieron abusos, condergables dende la nuesa óptica actual; y creyo que tamién dende la de entoncenes, como dexaron dicho Montesinos y De las Casas. Pero, los titulares de prensa, como dexó dicho aquella espontanea memorable que casi liquida a una comunidá col cloru de la piscina, tiénenla liao parda, polo de los abusos. Ye lo qu’hai.

A mín un abusu paezme lo que’l gobiernu fae cola So Maxestá, pues nun fai falta munchu fustaxe pa dase cuenta de que la esposición d’ayeri nun yera del tipu que cabe esperar l’apertura pol monarca, que diba, creyo, com’asocede últimamente, ensin acompañamientu ministerial; nin siquier el ministrín d’Esteriores, que ye quien, posiblemente, s’atopa detrás del movimientu. Y too pa intentar que la señora Sheinbaun asista a la cume hispanoamericana que se va tener en Madrid el pallares viniente. ¡Ay, señor¡

Les pallabres del rei, pa quien pierda tres minutos en lleeles, son impecables; y la so participación nel actu, siendo como ye la de nueso una monarquía parllamentaria, entra dientro de lo que ye d’esperar, anque nun mos preste’l gobiernu de turnu, qu’aínda asina ye’l nuesu. Y la rellación con México nun se va resentir más alló de les necesidaes que’l so gobernante ellí tenga; prueba d’ello ye que Peña Nieto, Calderón o Salinas de Gortari, expresidentes, tienen casa n’España, esti caberu hasta la nacionalidá alquirió, y, la muyer de López Obrador, nun sé si fuxendo del plasta del so home o por amor a la nuesa capital, tamién se tien instalao equí. Nun temen los abusos.

Raúl Suevos

A 17 díes vencíos de marzu de 2026

Torna en castellán en repdiv.blogspot.com

Chalamet ye un mazcayu

 

Recuérdame esti mozu a los tiempos primeros de Leonardo di Caprio, que ganara notoriedá, creyo remembrar, con una versión de Roméu y Xulieta. Tamién algamoo a güeyar al so collaciu de “Yérase una vegadda…”, Brat Pitt na so apaición naquella inolvidable  Telma y Louise. Anque nun me vien a la memoria que, a lo menos naquellos años iniciales de la so carriera profesional, se prodigaran mucho a la hora de facer declaraciones. Yeren discretos. O eso paecía.

Al Timothe Chalamet, esi mozu d’ésitu ablucante que va propuestu pal Oscar d’esti añu, téngolu visto nes dos partes de Dune, y lleí en delles ocasiones que ye la gran figura de la xeneración anguaño d’actores. Y supongo que debe ser verdá, pero, ciertamente ye, a lo que paez, más peploxeru de lo que yeren aquellos nos sos años primeros.

El mozu, nun programa estrella de la televisión, tiénse metío a descalificar la Ópera y el Ballet, porque, según él, ta demodé y a nadie-y interesa, y, na mio opinión, cabría aplica-y equí aquello de que calláu tas más guapu. Y ye que, nun puedo dicir que seya aficionáu a la Opera, pero, demientres los años florentinos tevi oportunidá d’acompañar a la fía, entoncenes neña, a les eshibiciones -una especie de popurrí de diversos cachos d’óperes- que l’ayuntamientu de la ciudá promocionaba nel so teatru municipal pa dir creando afición ente la población infantil. La esperiencia nun algamó a aficioname, pero sí a maraviame énte l’espectáculu, y ello dende’l respetu.

Tiempu dempués, en Cuba, demientres la bienal de ballet, invitaronme al Gran Teatru de la Habana, el vieyu teatru del Centru Gallegg, que entoncenes calteníase tal cualu, col escudu gallegu presidiendo l’escenariu. Y ellí llegó pa min la conmoción, una esplosión de sensaciones énte la simbiosis maraviosa de música, cuerpos y movimientu; un descubrimiento qu’en dalu mou esperaba y que, dende entoncenes, me tien engabitao, coles llimitaciones que la mío situación actual me permite.

 Resulta estraño, viniendo d’un personax artísticu como Chalamet, una afirmación tan negativa como la qu’espresó l’otru día, especialmente teniendo en cuenta lo que se xuega en Los Ánxeles ¿La pasión de la mocedá quiciabes? Sicasí, y pensando n’Europa, tantu Opera como Ballet, paezme a mín, a diferencia de lo qu’asocede n’USA, marchen perfeutamente ensin necesidá de tantes ayudes del estáu como les que recibe’l cine, la industria de la qu’él forma parte.

Chalamet ye un gran actor, con muncho percorríu per delantre, y seguramente vános dar aínda munchos bonos ratos nes pantallas, pero va tener d’aprender a controlase pa nun quedar como un mazcayu.

Raúl Suevos

A 12 díes vecíos de marzu de 2026

Torna en castellán en repdiv.blogspot.com

El realismu del putu amu

 

Anda’l gallineru nacional revueltu coles declaraciones de la señora Von der Leyen, nes que vien a dicir que’l vieyu orden internacional -supongo que, anque nun lu noma, ta pensando en NNXX- tien quedao caederu y, poro, superao; col corolariu de qu’Europa tien d’asumilo y actuar en consecuencia si quier ser respetada nel mundiu anguaño. O lo que ye lo mesmo, si quiere pintar dalgo.

La so declaración, criticada por nun tener competencies en materia internacional según los puristes, anque yo véola un día sí y otru tamién roblar trataos nel nome d’Europa, vien dempués del discursu que’l canciller alemán, Merz, dio na Conferencia de Munich va dellos díes, nel que declaró que “l’orden mundial basáu en riegles yá nun esiste” y que “pa Europa la llibertá yá nun ye dalgo que se pueda dar por sentao”, declaraciones que nun paecen necesitar muncha aclaración.

Pero quiciabes fora’l discursu del señor Carney, presidente del gobiernu de Canada, en Davos, au señaló “la rotura del orden mundial, la fin d’una ficción agradable y l’entamu d’una realidá brutal na que la xeopolítica de les grandes potencies nun ta suxeta a dala torga”. Nel so perimportante discursu abogaba pola xunión de les potencies medies pa facer frente a esos retos ñuevos que los nuesos puristes, o quiciabes debiéremos dicir llacayos del putu amu, nun paecen contemplar pel momentu.

Más alló del Títulu VII de la Carta de Naciones Xuníes, mui guapu, pero siempres inútil más alló de los intereses particulares de les grandes nacioness, tien sío siempres la conceición realista de les rellaciones internacionales lo que prevaleció, esto ye, un sistema de estaos egoístas y racionales a la gueta de la medría de la so seguridá y poder. Nin más nin menos.  

Poro la constatación que fae la señora Von der Leyen, tres les afirmaciones de Merz y Carney, ye bienvenida, por realista y europeísta, y los ataques qu’equí-y faen, entamando pol nuesu patéticu ministru d’esteriores, nun faen sinon poner n’evidencia la so subordinación servil a los intereses particulares del putu amu, que ve cómo los tiempos se van estrenchando y necesita marcar y definir un territoriu que-y permita sobrevivir eleutoralmente, y con ello protexese xudicialmente pa lo que pudiera llegar. Ye lo qu’hai.

La señora Von der Leyen, güei na so segunda presidencia de la Comisión, dempués de tener sío ministra de defensa d’Alemaña cola señora Merkel, nun paez que seya precisamente una becaria de la política internacional, y bien faríamos n’España, n’oyer con atención les sos pallabres y dexanos de monsergues interesaes como les del señor Albares.

Raúl Suevos

A 10 díes vencíos de marzu de 2026

Torna en castellán en repdiv.blogspot.com 

Méritu versus heriedu

 

Va yá abondo d’años, otra vida, cuando exercía d’estudiante, tevi la fortuna de dir a dar con un llibru de los que marquen una dómina. Estratificación social y desigualdad, de Harold Kerbo, nel que l’autor, al traviés de dellos artículos con diferentes protagonistes, muyeres, negros, minoríes etc, y sociedaes, Xapón, Alemaña, los Estados Xuníos, averanos a la realidá de les sociedaes modernes, preferentemente les occidentales, con una constante nes sos apreciaciones, la importancia del Méritu, como’l sistema que promueve’l progresu de les persones a partir de la capacidá personal y profesional  del individuu; en contraposición al Heriedu, que promueve l’ésitu personal dende la posición de salida que la pertenencia a una determinada familia-y da a esi otru individuu.

Vien esto a cuentu de la eleición del fiu de Xamenei, n’Irán, pa ser el líder másimu de la República Islámica. Un individuu, esti Mojtabá, qu’aporta al poder dende la so posición de fiu de, y la so rellación estrecha con pasdaranes y guardies de la revolución, los amos autenticos del poder, y xestores, xunto al lider ñuevu, que nin siquier tien la condición d’ayatolá, del sistema estensísimu de corrupción qu’agobia’l país, ente otres coses, y que fae que’l susodichu seya conocíu en Londres como un de los grandes propietarios inmobiliarios.

Trump tiénse amosao contrariáu cola eleición; y Netanyahu promete eliminalu lo más llueu, pero, si atendemos a Kerbo, deberíen alegrase, puestu que, según él, la primacía del heriedu sobro’l méritu representa namái la primer fase de lo qu’acaba siendo la decadencia d’una sociedá y principiu de la fin.

Nos EEXX, a lo que se ve, el problema nun ye l’heriedu, o la falta de méritu, sinon el lacayísmu, condición que cumplen los secretarios d’estáu del Cesar yanqui actual; distinguíos toos ellos pola so obediencia bovina a los deseyos del so amu, y que lleva a ver con esmolimientu’l futuru de la qu’hasta agora se contemplaba como faru de les democracies lliberales. Los controles periódicos del sistema, en forma d’eleiciones, quiciabes puedan apangar los daños. Vamos ver.

En casa, n’España, trepamos col cáncer del clientelismu, casi tan dañible como les anteriores dolencies sociales, y que, pocu a pocu, dende’l poder y los partíos, va anubriando les instituciones del estáu, dalgo que pon n’evidencia l’actuación axustada del poder xudicial, ca día más afogáu pol trabayu que-y da la nuesa clas política; o cuerpos con dos sieglos d’antigüedá qu’agora vense aboquiaos a güeyase les costures.

Kerbo piesllaba’l so llibru apareyando méritu con progresu, per un llau, y heriedu con decadencia, pel otru. Ye lo qu’hai.

Raúl Suevos

A 9 díes vencíos de marzu de 2026

Torna en castellán en repdiv.blogspot.com

De la catedral de Friburgu al Burj Khalifa

 

Va dellos años, cuando vivía n’Estrasburgu, solíemos colar hasta Friburgu, bien averao de Suiza. Yera un placer paseyar les sos cais y tomar dalgo na plaza, al pie de la so catedral espectacular. Una catedral gótica d’una sola torre campanariu que, aparte del so valir histórico y artísticu, ye amada fonderamente polos habitantes de la ciudá. Forma parte de la so esencia; namái se-y avera, como institución, la Universidá, qu’acoyera como maestru al fabulosu Max Weber.

Dicen los d’ellí que cuando, a la fin de la Segunda Guerra Mundial, los aliaos decidieron arrasar, esto ye, dexar al ras, les ciudaes alemanes pente medies bombardeos d’área combinaos colos incendiarios -los nazis perdonaron a Roma y París- llegó-y el turnu a Friburgo, con preavisu, como agora faen los israelites en Beirut, la xente subióse a les llombes pa librase de les bombes, y dende ellí contemplaron como too desapaecía baxo l’infiernu aéreu. Too non, la catedral quedó intauta. Un milagru.

Nun había talu. El bombardeu d’entoncenes nun cuntaba con GPS nin satélites, y los aviadores necesitaben una referencia sobro’l tarrén. L’aguya de la catedral yera perfeuta, poro too desapaecía al so alredor, anque nun había milagru. Yera la téunica de bombardeu d’aquella dómina.

Estos díes ye otra la téunica qu’impera, tantu pa bombardeos, como pa misiles, como pa drones, y anque los que más reciben son los iranís, estos tamién respuenden, incluyendo a los sos vecinos del Golfu, como Dubái, que tien recibío envites estremaos, anque la so aguya principal, el Burj Khalifa resiste impertérritu, y eso que dalguna bola al respeuto tien probao a dicir lo contrario.

Los iranís intentáronlo, y ye posible qu’insistan, pero’l gran edificiu paez intocable, y ye que’l so valir nun ye relixosu, como la catedral, pero sí d’imaxe, poro en Dubái echen el restu, y dicen que, nel conxuntu del Golfu, nos dos díes primeros d’ataques tiénense llanzao más misiles Patriot, 2.5 millones de dólares la unidá, que nos cuatro años de invasión n’Ucrania ¿Será per perres? ¿Será por Trump?

Detrás de les guerres, toes, hai motivaciones económiques, siempres, anque se pueden esconder tres rellatos de toa mena que les xustifiquen y que, col pasu del tiempu, los estudiosos suelen afayanos a la xente del común. En tou casu, les perres nun son eternes, y los arsenales tampocu, y esi edificiu maxestuosu y espodáu va siguir siendo una atracción pa los drones y misiles mientes el conflictu perdure. Per otra parte, baxo’l Burj, nun sé si hai terraces, pero atrévome a aventurar que nun habrá cerveza. Ye lo qu’hai.

Raúl Suevos

A 8 díes vencíos de marzu de 2026

Torna en castellán en repdiv.blogspot.com

Ataque a Irán, la hora d'Ucrania

 

Entramos na segunda selmana del ataque a la república islámica d’Irán y con ello frentes y aiciones ñuevos paecen abrise nel paisax bélicu que tenemos per delantre, y ello, más alló de los sobresaltos que’l mandatariu yanqui ye a xenerar ca vegada que da una rueda de prensa o fala con dalgún periodista.

Nel aspeutu esclusivamente técnicu del combate aéreu, tres la primer folada afaradora, con supresión de los líderes principales del país, tamos asistiendo al bombardeu sistemáticu de los arsenales misilísticos iraníes, y de les sos plataformes llanzadores, dalgo que se mide nel descensu del númberu de vectores que lleguen a Israel, y que taría llevando a los ayatolás al usu de silos llanzadores, muncho más protexíos y alimentaos dende arsenales en bunker fonderos, una reacción que, probablemente, va llevar a los yanquis al usu de la táctica que yá emplegaron en las montañas de Tora Bora contra Al-Qaida, y que agora, amás, contaría cola tarrecible GBU-43/B, la MOAB, conocía como la madre de toles bombes.

Pero Irán nun se queda quietu. Ellos son los padres de los Sahed, los drones que tantu dañu tienen causao n’Ucrania y que los rusos meyoraron. Son baratos, mui baratos en comparación colos Patriot que los balten, y yá tán faciendo estragos nos países del Golfu; inclusive n’Azerbaiyán, pa sorpresa de munchos, pues trátase d’un país chiita y la zona fronteriza, pegada a Armenia, tien lloríes separatistes.

Ye una fase ñueva, flexible y con sorpreses, con sofitu de Rusia con drones y China con componentes pa Irán, y con Ucrania unviando asesores a los países del Golfu y, posiblemente, interceptores de drones d’última xeneración, de los que se tienen convertío en númberu unu mundial, tantu en diseñu como en fabricación nes sos fabriques soterránees. Un capital industrial y bélicu qu’agora, col frente del Golfu recién abiertu, puede da-y una capacidá de palanca sobro Washington nun momentu nel que n’Ucrania paez achisbase una posibilidá de cambéu de los equilibrios tres cuatro años de guerra, y ye que Rusia, económicamente, ta nun puntu que podría facer peligrar toa la so estratexa, más alló del so fracasu militar rescamplante.   

Esos drones ucranianos y el so “saber facer” pueden ser la moneda de cambéu que renueve’l fluxu de suministros militares a los homes y muyeres de Zelensky , que tantu lo necesiten y que, por razones que namái él sabe, Donald Trump  vieno retayando dende l’entamu de la so segunda presidencia. Son les sorpreses de les guerres, aniciaes por políticos que, munches vegaes, nun saben cómo poner fin, y acaben dando llugar a situaciones impensaes, desagradables pa unos y benignes pa otros.

Raúl Suevos

A 6 díes vencíos de marzu de 2026

Torna en castellán en repdiv.blogspot.com