Paramount

 

Son delles les tornes que se pueden atopar pa esi términu inglés, un axetivu, que normalmente va nel sentíu de supremu, o primordial, o quiciabes principal, pero que, anque nun se domine l’idioma, casi tol mundiu tendrá visto’l vocable al entamu de dalguna producción cinematográfica llegada de la tierra de los gringos. Y ye que la Paramount yera, hasta ayeri, una de les cinco grandes acaparadores del mercáu audiovisual del gran país, y, per ende, del restu del mundiu.

Eso yera’l pasáu inmediatu, porque ayeri saltó la noticia de qu’esta compañía acaba d’absorber a otru de los componentes del quintetu, la Warner, otra, como ella, compañía histórica del vieyu Hollywood, lo que va facer aínda más reducío’l mercáu y con ello les opciones culturales del públicu; o si vustedes prefieren, l’adoctrinamientu cultural del ciudadanu occidental, esi que, se supón, vive en llibertá. Anque non tanto.

Equí ye cuando toca falar del dominiu cognitivu, o de lo malo que yeren, pal personal de cierta edá, los apaches mezcaleros y los chiricaguas, a los que xeneralmente se enfrentaba John Waine; o de les munches vegaes que Jack Ryan, esi axente estupendu de la CIA, tien salvao a los USA, y de pasu al mundiu, de dalgún conspirador malváu. Y ye que, anque nun seyamos conscientes, el consumu cultural que llevamos a cabu, de forma casi involuntaria, vános atrapando nuna rede qu’agora llámase dominiu cognitivu, y qu’enantes se nutría, ente otres coses, de lo que llamaben operaciones psicolóxiques.

La operación económica algama casi cien mil millones de dolares, un pocu menos del préstamu que la Xunión Europea acaba d’otorgar a Ucrania, dempués de meses d’espera, pa caltener la so supervivencia; esto ye, una cantidá estelante que mos da cuenta d’hasta qué puntu ye importante’l mercáu qu’hai detrás, y que los compradores esperen dominar en gran parte gracies a esti desembolsu.

Agora va ser más fácil pa les axencies del gobiernu norteamericanu controlar les producciones del sistema, como asocediera con los Top-gun, Black Hawk derribado, o Argo, por poner dalgún exemplu, nes que se retuerce la realidá pa presentar una imaxe meyor de l’aición de los yanquis, y, dao’l coste de les grandes producciones, va ser más difícil que se produzan histories independientes como foron Apocalipsis Now, Platoon, o Nacido el cuatro de julio. Con cauna d’estes operaciones económiques estréchase mas el círculu cognitivu nel que mos movemos, y ca vegada ye más difícil aportar, ellí y acá, a productos culturales independientes, y con cada compra’l nuesu mundiu imaxinariu estréchase pa convertinos en consumidores más inconscientes del mundiu que la gran industria, eso que los yanquis nomen show business, decide que ye’l de nueso. Ye lo qu’hai.

Raúl Suevos

A 25 díes vencíos d’abril de 2026

Torna en castellán en repdiv.blogspot.com