Suañando una ciudá

 

Ca ciertu tiempu, el de les revisiones programaes del coche, subo andando dende La Calzada, el mío vieyu barriu d’infancia temprana, hasta’l centru. Fágolo con cachaza, contemplando dellos finxos urbanos colos güeyos del pasáu, como esi IES, au con nome joseantonianu y separtáu entós per praos del Cerilleru, entamé a trepar coles lletres, y la riegla de don Severino; o’l Atenéu ñuevo, au posé apavoriáu al llau del embetunáu embaxador de los Reis Magos. Pasado Santa Olaya desvíome haza l’astilleru y reparo construcciones ñueves con fechura mui bona, alloñaes de lo qu’enantes yera la imaxe del Natahoyo, y supongo que acolumbrando un futuru más rescamplante. Y más alló la estructura imponente del Tallerón, toa una promesa de puestos de trabayu especializaos tres el cartel qu’anuncia’l propietariu ñuevu y magar les “movíes” polítiques que s’observen na so presidencia.

Sigue la zona provisionalmente urbanizada del Xixón Azul, que tamién implica una espectativa de futuru pa la ciudá si se lleven a cabu los planes del consistoriu, con tantu d’empreses rellacionaes coles tecnoloxíes marines. Yá podía. Más alló, un área discontinua cola zona de Fomento y el Acuariu per un barbechu industrial que, imaxino, tará contempláu nos planes d’esi futuru ideal que los nuesos ediles mos prometen, anque pel momentu ye una empresa, PYMAR, la responsable d’esa aberración estética actual. Tamién ehí una zona d’espectatives y promeses que per agora ta nun veremos.

Nun cuesta muncho, nuna mañana asoleyada y amable, pa un pasiante ocasional, dexar volar la imaxinación haza les posibilidaes que la nuesa ciudá tien, pero los años que llevamos de proyeutos anunciaos poles estremaes alministraciones que dempués tienen cayío nel escaezu, o inundaos d’augua como’l túnel del Metrotren, o siempres esperando una primer piedra como la estación intermodal, o esa necesaria ZALIA, derriten les ales d’esos suaños y trayenme lluéu a tierra. ¿Va ser otra oportunidá perdía? ¿Vamos ver un desendolcu urbanu, paisaxísticu, llaboral y humanu nesa fachada impresionante del nuesu vieyu Xixón? O como n’ocasiones anteriores vamos tener que constatar que quedamos mui lloñe de Madrid, y tampocu suponemos un sacu de votos abondo importante como pa que la so pérdida o alquisición mueva a quien gobierna en la capital a prestar atención a esta ciudá, ca vegada más de vieyos y turistes, que paez conformase con esta agonía lenta.

Xixón tien posibilidaes de futuru, como amuesa l’ampliamientu del Polu tecnolóxicu, la Universidá europea, o’l proyeutu Quirón, pero, sunponiendo que los playos seyamos a remar na mesma direición, necesita l’ayuda de les alministraciones superiores, rexonales y nacionales. Ye lo qu’hai.

Raúl Suevos

A 14 díes vencíos d’abril de 2026

Torna en castellán en repdiv.blogspot.com