Esta selmana tengo repartío’l mío consumu televisivu ente dos actividaes que, a primer vista, pudieren paecer mui alloñaes, y dalgún llector va haber que considere la mío apreciación casi ofensiva, anque, ciertamente, nun sabría dicir dende cuálu de los dos campos se recibiría esto como talo. Quiciabes dende los dos.
Sicasí, p’allegría y gayola d’aficionaos, el canal andaluz tien ofrecío la feria taurina d’abril n’abierto, lo que mos permitió reviciar de dalgunos momentos memorables del Arte del toréu -Escríbolo con mayúscula intencionadamente- col regresu de Morante, y l’asistencia del rei Xuan Carlos, como momentu cume, quiciabes.
Y notru requexu del panel televisivu esistía la posibilidá d’acompañar a los gladiadores del golf nel su periplu polos tarrenos del Augusta National Golf club, au se competía pol primer master del añu y quiciabes el de más nombradía y resonancia ente los d’esa categoría. Tou un eventu de repercusión mundial y económica que va, como ye fácil sunponer, muncho más alló del algame de la nuesa Fiesta Nacional.
N’Augusta primen les tradiciones previes, como esa cena de campeones; nos Toros too ta reglao, como esa magnífica entrada/desfile de les cuadrilles énte’l públicu, nesi marcu espectacular que ye la Real Maestranza de Sevilla. Dempués hai qu’entrar en faena, en dambos llugares, un abiertu y l’otru, como los anfiteatros romanos, zarráu; col públicu, espectante y observante, de traxe y corbata en Sevilla, lixeru y en tonos verdes n’Augusta; magnolies y azalees alló pa enmarcar l’aición, y l’alberu doráu sevillanu cortáu pol burladeru sangrín, y penriba les arcaes clásiques del templu taurín, n’Hispalis.
Pero ye quiciabes nos momentos cume de dambos exercicios atléticos cuando se pueden columbrar les semeyances mayores, o a lo menos eso me paez a mín, aficionáu a los Toros y practicante del golf. Y aporto a esa conclusión viendo la tensión contenía nel rostru d’esi MacIlroy empobinándose al guelpe caberu nel 18, concentráu, güeyada fuxidiza, resoplando, pensando nel fierru ua imaxinando la parábola perfeuta que tien de dexar la bola averao del furacu; quiciabes tamién nel so pensamientu baillen los cuatro millones de premiu y el prestixu que conlleva.
En Sevilla contemplo paecida tensión. Ellí’l prestixu ye semeyante, el premio económico muncho menor, pero nos pitones del toru cabalga la muerte, y el toreru sábelo, y podemos velo na so güeyada, tensa, concentrada y vixilante énte la salida del morlacu. Nun son varies hores como ellí, ye un tiempu tasáu en minutos, nel que la pasión y el conocimientu del públicu, a falta de tarxeta a rellenar, va dicir quién ye’l campeón. Arte y peligru, ye lo qu’hai.
Raúl Suevos
A 17 díes vencíos d’abril de 2026
Torna en castellán en repdiv.blogspot. com
No comments:
Post a Comment