Cruceristes

 

Güei, al paecer, entamó la costera de cruceros en Xixón. Y ello porque’l primer d’una serie atracó nel puertu’l Musel, abriendo’l calendariu d’esa particular faceta de la industria turística que, según quien la presente, ye un indicador positivu pa la ciudá, y según quien la sufre, nun aporta un res al nuesu yá saturáu panorama estivu.

La noticia llégame vía radiofónica, cola entrevista a una responsable, que la so filiación nun identifiqué, pero que s’amosaba casi eufórica énte la posibilidá de batir otra vegada esti añu la cifra de visitantes con esa modalidá, con casi noventa mil pagantes, y unos treinta mil currantes nes tripulaciones. Dalgo que, pol so tonu, debiéramos celebrar los xixoneses. Nun lo tengo tan nidio.

Siendo la industria de cruceros un negociu multimillonariu, son abondos los artículos y reportaxes emitíos tocantes los particulares de talu asuntu, ente los que nun ye un menor el de la polución, dalgo qu’a simple vista puése constatar viendo lo que suelten poles sos chimenees, que tamién trabayen cuando tán atracaos, anque nel nuesu casu, los vecinos más averaos, de la Calzada, Xove y el Tocoti, supongo que con callu pulmonar tres tantos años de respirar los fumos de la siderúrxica, malapenes lo van notar. Pero ehí ta.

L’aspeutu del gastu, que se-y supón a los visitantes, véolo menos claro. Quitando dalgún coleccionista d’imanes de frigoríficu, nun me paez que seyan de munchu consumu, nin siquier nos restaurantes, pues a bordu tienen too pagao y nun ye que’l crucerista modernu se distinga por pertenecer a la clas más pudiente ente los que viaxen; antes al contrario, ca día más, paecen pertenecer a la de los vuelos baratos qu’observamos anguaño na mayoría d’aeropuertos del mundiu; esto ye, consumidores de pizza al taglio nel meyor casu, o del almuerzu en bolsa plásticu sacada nel desayunu del barcu, como tengo visto nalgún bancu de la cai Corrida.

Dalgo sacarán los autocares que los lleven d’escursión a Cuadonga va dicir dalgunos, y cierto ye, anque, tratándose de viaxes axustaos polos operadores turísticos, ue probable que los márxenes seyan muncho más estrechos de lo que pudiéramos pensar. Asina que, llegaos equí, namái mos queda maxinar que la Xunta’l Puertu dalgo va ganar polos atraques, que nun sé si se paguen en función de la eslora’l cruceru o del númberu de turistes que tresporta, pero que nun creyo que seya regalao.

A la fin, quedenmos a los xixoneses esos grupos de xente con aire de despiste pel Muru, que nun sé si nun deberíen pagar cuota turística, como notros llares. Ye lo qu’hai.

A 8 díes vencíos d’abril de 2026

Raúl Suevos

Torna en castellán en repdiv.blogspot.com